2 bṭrus 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

imslmdn n‑tkrkas

¹ ġayd izrin kkan‑ttin kra n‑mddn ġ‑gr ayt‑rbbi ar‑ttinin izd lanbiya ad‑gan walaynni ar‑sskirkisn. ġmkan a‑s‑rad‑daġ‑ilin imslmdn ayt‑tkrkas ġ‑darun. s‑tntla a‑s‑ra‑n‑šškšamn iswingimn ur‑ʷġẓannin ar‑ttawin s‑lhalak. rad‑traran tiġurdin‑nsn s‑siditsn itjhhdn lli‑tn‑ifran ad‑gn wins. rad‑zzugzn lhalak f‑ih̬f‑nsn ġ‑yat‑tasaɛt.

² iggut ma‑ra‑itamẓ aġaras‑nsn l‑lfsad. f‑ssibt‑nsn a‑f‑rad‑rggmn mddn ġ‑uġaras l‑lḥqq.

³ ra‑kʷn‑šttan s‑iwaliwn h̬wanin, ašku ar‑bdda‑ttirin ma‑igan win wiyyaḍ. walaynni zġ‑isizwar a‑gisn‑itmnad ġwalli ra‑fllasn‑yut lḥukm. ur‑a‑igan ġwalli ra‑tn‑ihlk.

⁴ ašku ur‑iṣamḥ rbbi i‑lmalayka lli‑ffuġnin zġ‑wawal‑ns, walaynni iluḥ‑tn‑in ġ‑tdrut, idḥi‑tn‑in s‑tuggugt n‑tillas a‑ġin‑tyamaẓn ar ass l‑lḥsab.

⁵ ur‑iṣamḥ rbbi i‑isizwar n‑ddunit, walaynni yull‑d aman aylliġ dln kullu ddunit n‑willi srs rurnin tiġurdin‑nsn. ur‑zgisn‑ijjnjm abla nuḥ lli‑itbrraḥn s‑maylli irḍan rbbi, ntta d‑ssa n‑mddn yaḍni.

⁶ yut ilmma rbbi lḥukm f‑tmdinin n‑sadum d‑ɛamura, ihlk‑tnt s‑lɛafit, baš ad‑ẓrn kullu willi srs rurnin tiġurdin ma‑ijran i‑tmdinin‑an, issann ma‑rad‑asn‑ijru ula ntni.

⁷ walaynni ijjnjm luṭ lli‑igan argaz ifulkin, ašku ṭiyyr‑as i‑luṭ bahra f‑mamnk ad‑fsadn mddn‑an ʷh̬šnnin.

⁸ izdġ‑urgaz‑an ifulkin ġ‑gratsn. ass f‑wass ar‑ti‑ttaġ‑tguḍi ġ‑uwl‑ns ifulkin ġakud lliġ a‑itmnad ar‑isflid i‑iskkirn‑nsn ʷh̬šnnin.

⁹ kullu mayan imla‑yaġ is‑issn siditnnġ mamnk a‑ijjnjam ġwilli tuqqarnin rbbi zġ‑tnukmut nna‑tn‑itarmn, yissan mamnk a‑itḥḍu ġwilli ʷh̬šnnin ar ass l‑lḥsab lli‑ġ‑ra‑fllasn‑yut lɛqubit lli‑asn‑igan.

¹⁰ ra‑stt‑yut s‑uggʷar f‑willi skarnin s‑ššhwat lli‑bahra‑rkanin ḥgrn ġwalli fllasn iḥkamn. imma imslmdn‑an šqan bahra. ar‑zzɛamn ih̬fawn‑nsn, ar‑rggmn ula ġ‑inmġurn n‑ignwan bla‑da‑tiksaḍn.

¹¹ wah̬h̬a‑tn‑ugʷrn lmalayka tjhhdn fllasn bahra, ur‑a‑rggmn ntni ġ‑mddn‑an ġ‑dar rbbi.

¹² walaynni imslmdn‑an ar‑rggmn ġ‑ma‑ur‑fhimn, gn zund luḥuš šqanin lli‑skarnin walaynni ur‑ssinn mah̬ aylliġ a‑skarn, ar‑tlaln ġir baš a‑tyamaẓn tyawhlakn. ula mddn‑an ra‑tyawhlakn zund luḥuš.

¹³ rad‑asn‑d‑irar rbbi arfufn f‑urfufn lli‑skarn i‑wiyyaḍ. ntni iɛjb‑tn ad‑skarn ma‑ittiri ih̬f‑nsn ula ġ‑uzal ġ‑lgddam n‑mddn. irkan d‑lɛar ad‑gan ġ‑darun, ar‑tfraḥn s‑tillay‑nsn lliġ a‑didun‑tmunun f‑imnsiwn‑nnun.

¹⁴ ar‑bdda‑ttirin ad‑ẓrn lfsad, ur‑a‑tšbaɛn zġ‑ddnub, ar‑n‑lddin ġwilli ur‑zganin, myurn ad‑ssmunun mad‑ran i‑ih̬f‑nsn. tarwa n‑h̬zit ad‑gan.

¹⁵ ffuġn aġaras lli‑inmn, munn d‑uġaras n‑balɛam yus n‑baɛur lli‑dar iɛzza a‑yamẓ iqaridn s‑ma‑yʷh̬šnn.

¹⁶ ntta, iẓi dids ula uġiyyul‑ns f‑ddnub lli‑iskr. wah̬h̬a ur‑a‑sawalnt lbhaym, tsawl srs lbhimt‑an s‑wawal n‑bnadm, baš a‑tḥṣar nnabi‑an ġ‑unufl‑ns.

¹⁷ imma mddn‑an, zund lɛyun qqurnin ad‑gan, ula zund imdla idḥi‑tn‑waḍu itjhhdn. iskr‑asn rbbi adġar ġ‑tillas aggugnin.

¹⁸ ašku ar‑ssfurrugn s‑iwaliwn h̬wanin. s‑ššhwat ʷh̬šnnin a‑s‑a‑n‑lddin mddn lli‑bḥra‑d‑wrrinin zġ‑gr willi jlanin.

¹⁹ ar‑ttinin rad‑asn‑fssin zġ‑iskraf, imma ntni sul gan ismgan i‑lfsad. ašku kullu wanna inra kra, iga ismg i‑ġaylli‑t‑inran.

²⁰ iġ‑d‑njmn mddn zġ‑irkan n‑ddunit s‑twassna n‑unjjam siditnnġ yasuɛ lmasiḥ walaynni wrrin tigira tyassasn‑daġ s‑irkan‑an aylliġ‑tn‑nran, hati iwrri isiggʷra n‑mddn‑an yʷh̬šn uggʷar n‑isizwar‑nsn.

²¹ yuf‑asn mrad is‑ur‑akkʷ‑ssinn aġaras n‑ufulki, ula ard‑t‑issann rarn ilmma tiġurdin s‑wawal lli‑f‑tn‑yuṣṣa rbbi.

²² skrn ntni zund lmɛna‑yad illan: yuḍa‑widi s‑iraran‑ns, twrri tilft lli‑yarudn a‑trurḍ ġ‑tallaġt.