2 bṭrus 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑simɛan bṭrus ah̬ddam d‑urqqas n‑yasuɛ lmasiḥ. i‑willi mi ityawfka liman iɛzzan lli‑aġ‑d‑ityawfkan ula nkkʷni s‑ufulki n‑rbbi‑nnġ d‑unjjam‑nnġ yasuɛ lmasiḥ.

² a‑fllawn‑tigat lbaraka d‑sslamt ġilad ġ‑tssnm rbbi ula siditnnġ yasuɛ.

zaydat timġurm ġ‑ufulki n‑rbbi

³ s‑tḥkimt‑ns itjhhdn a‑s‑aġ‑d‑ifka rbbi kullu ma‑nḥtajja baš a‑nddr ġ‑ddunit ar‑t‑ntrḍu. ašku nwrri nssn ġwalli‑aġ‑d‑iġran a‑nkšm s‑lmjd‑ns d‑ufulki‑ns.

⁴ d‑ġmkad a‑s‑aġ‑llant lbarakat hiyyanin ɛzzanin lli‑f‑inna rad‑aġ‑tnt‑ifk, baš a‑twrrim tgm ġmklli iga rbbi, tnjmm zġ‑kullu ma‑itawin ġ‑ddunit s‑lhalak f‑ssibt n‑maylli ittiri bnadm i‑ih̬f‑ns.

⁵ f‑mayan a‑f‑kʷn‑d‑iqqan a‑n‑tgm tiqqi a‑tzaydm f‑liman‑nnun a‑bahra‑tfulkim, tzaydm f‑ufulki a‑bahra‑tissanm rbbi,

⁶ tzaydm f‑twassna n‑rbbi a‑bdda‑tġwim ġ‑ih̬f‑nnun, tzaydm f‑mayan a‑bahra‑tzgam ġ‑lḥqq, tzaydm f‑mayan a‑bdda‑trḍum rbbi,

⁷ tzaydm f‑mayan a‑bahra‑ttḥubbum mddn, tzaydm f‑mayan a‑bdda‑tḥnnum ġ‑wiyyaḍ.

⁸ iġ‑a‑gigun‑ttigatnt kullu‑tġawsiwin‑ad, ra‑tiẓḍarm i‑kigan ar‑di‑ttawim lġllt iggutn ġilad ġ‑tssnm siditnnġ yasuɛ lmasiḥ.

⁹ imma wanna ur‑dar tiġawsiwin‑ad, hati ibukḍ ur‑a‑ittisfiw yat, ittu is‑t‑issġus lmasiḥ zġ‑ddnub lli‑iskr ġayd izrin.

¹⁰ way‑aytma, f‑mayan a‑f‑rad‑awn‑iniġ, gat‑n tiqqi‑nnun s‑uggʷar a‑bahra‑tzgam ġ‑uġaras lli‑s‑awn‑d‑iġra rbbi iẓli‑kʷn‑d srs. ašku iġ‑a‑tskarm s‑ġmkan ur‑ra‑sar‑tjlum,

¹¹ hati ra‑tkšmm s‑lfrḥ iggutn s‑tgldit idumn n‑unjjam siditnnġ yasuɛ lmasiḥ.

¹² riġ‑bdda a‑yawn‑d‑ssktayġ tiġawsiwin‑ad, wah̬h̬a‑tnti‑tssnm tzgam ġ‑lḥqq lli‑mi‑tsfldm.

¹³ ašku swangmġ is‑išwa a‑bdda‑ssrġaġ ma‑illan ġ‑ih̬f‑nnun kullu mad‑sulġ ġ‑uh̬iyyam‑ad lli‑igan ddat‑inu.

¹⁴ ašku ssnġ yan imikk rad‑h̬wuġ ah̬iyyam‑ad. mayad, imla‑yyi‑t‑id siditnnġ yasuɛ lmasiḥ,

¹⁵ walaynni ra‑n‑tggaġ tiqqi‑nu baš a‑tiẓḍarm a‑bdda‑tswingimm ġ‑tġawsiwin‑ad ġakud lliġ ur‑ra‑sul‑didun‑iliġ.

tugga f‑tmuġra l‑lmasiḥ

¹⁶ ur‑a‑nbnnu f‑kra n‑tḥajiyin tyawskarnin s‑lɛaql n‑bnadm ġakud lliġ‑awn‑nsawl f‑mamnk a‑d‑yuška siditnnġ yasuɛ lmasiḥ s‑tḥkimt itjhhdn. ašku nkkʷni nẓra timuġra‑ns,

^17-18 nili dids f‑uwrir amẓlay, nsfld i‑wawal zġ‑ignwan lliġ‑d‑issbayyn rbbi babatnnġ lmjd l‑lmasiḥ d‑lhibt‑ns. isawl‑d‑wawal zġ‑lmjd n‑tattuyt inna: «ġwad iga iwi iɛzzan. frḥġ srs bahra.»

¹⁹ mayan a‑darnnġ‑izzgan iwaliwn l‑lanbiya s‑uggʷar. afulki a‑ra‑tskarm iġ‑a‑stti‑ttawim ġ‑mad‑nnan ntni, ašku iga‑wawal‑nsn zund tifawt l‑lqndil, ar‑ittisfiw ġ‑tillas ard ifaw‑wass iġli‑d itri n‑ṣṣbaḥ ġ‑uwlawn‑nnun.

²⁰ walaynni taġawsa ihiyyan a‑stt‑igan, a‑tissanm is‑ur‑iẓḍar yan s‑ih̬f‑ns a‑ifhm lmɛna n‑mad‑nnan lanbiya ġ‑warratn n‑rbbi.

²¹ ašku ur‑d‑yuški kra n‑wawal n‑rbbi zġ‑lɛaql n‑bnadm, walaynni ar‑sawaln mddn‑an s‑iwaliwn lli‑asn‑d‑imala rbbi ġmklli‑tn‑itguwwad rruḥ lqudus.