1 timutaws 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ imma ġwilli llanin ġ‑uzaglu n‑twuri išqan, illa fllasn ad‑tuqqarn id‑siditsn, baš a‑ur‑d‑irar yan tirggam i‑ism n‑rbbi ula almmud‑nnġ.

² wanna mi iga sidis amumn, ih̬ṣṣa‑t a‑ur‑iḥgr sidis f‑ssibt n‑ma‑iga gʷmas. illa fllas a‑ith̬dam s‑uggʷar d‑nniyt, ašku ġwalli itamẓn lh̬ir ġ‑twuri‑ns iga amumn ig zġ‑aytmas ɛzzanin. sslmad tiġawsiwin‑ad i‑aytmatn ar‑asn‑ttinit ad‑skarn ġmkad.

lh̬ir lli‑aġ‑illan ġ‑uġaras n‑rbbi

³ han kra n‑mddn ar‑sslmadn tinbaḍin yaḍni ur‑d‑mšaškant d‑iwaliwn ṣḥanin n‑siditnnġ yasuɛ lmasiḥ ula almmud lli‑s‑irḍa rbbi.

⁴ ntni ar‑bahra‑ssimġurn ih̬f‑nsn walaynni ur‑ssinn yat. iɛjb‑tn ad‑tmḥakkan ar‑tmjaḥadn f‑iwaliwn, aylliġ a‑twrrin ar‑tḥsadn ar‑tẓin ar‑rggmn ar‑ttuhamn.

⁵ ur‑a‑tiẓḍarn mddn‑an ad‑d‑mšaškan, ijlu‑asn lɛaql ffuġn zġ‑lḥqq. ġaln is‑rad‑amẓn iqaridn i‑ih̬f‑nsn ġ‑uġaras n‑rbbi.

⁶ illa‑nnit lh̬ir i‑yan imunn d‑uġaras n‑rbbi iqnɛu s‑mad‑dars‑illan.

⁷ lliġ‑d‑nkšm ddunit‑ad ur‑d‑niwi yat. iġ‑ra‑stt‑nffuġ ur‑ra‑nawi yat.

⁸ walaynni iġ‑darnnġ ma‑nštta d‑ma‑nlssa nqnɛu s‑mayan.

⁹ imma ġwilli ranin ad‑ssmunun ayda iggutn, hati ar‑šškšamn ih̬f‑nsn s‑tẓqqurt ula tassast. ar‑tn‑itnru kullu ma‑igan ṭṭmaɛ, ar‑tn‑issnuful ar‑tn‑issyaggas ar‑tn‑itawi s‑lhalak.

¹⁰ ašku tayri n‑iqaridn ar‑di‑ttawi kullu ma‑yʷh̬šnn. llan kra n‑mddn ar‑bahra‑ttirin iqaridn aylliġ ffuġn aġaras l‑lmasiḥ, ssyaggasn ulawn‑nsn s‑tguḍi iggutn.

luṣit i‑uh̬ddam n‑rbbi

¹¹ imma kiyi ay‑ah̬ddam n‑rbbi, aggug zġ‑kullu ġayan. tgt‑n tiqqi‑nnk a‑bdda‑tskart afulki ula kullu ma‑irḍan rbbi. amn awal‑ns ar‑ttḥnnut ġ‑wiyyaḍ ar‑ttṣbart ar‑ttrh̬ut d‑kullu mddn.

¹² bkis ar‑tkkatt takrrayt l‑liman, tamẓt ġ‑tudrt idumn lli‑s‑ak‑iġra rbbi lliġ tnnit i‑inagan ggutnin f‑mamnk a‑tumnt s‑lmasiḥ.

¹³ imma ġilad uṣṣaġ‑k ġ‑lgddam n‑rbbi lli‑yakkan tudrt i‑kraygatt kra, ula lmasiḥ yasuɛ lli‑ifkan tugga l‑lḥqq ġ‑dar bilaṭus gu‑bunṭus,

¹⁴ iniġ‑ak a‑bdda‑tskart s‑tnbaḍin‑ad baš a‑ur‑gik‑yili kra l‑lɛib ula kra f‑a‑irggm yan, ar ass lli‑ġ‑ra‑d‑yašk siditnnġ yasuɛ lmasiḥ ibayyn.

¹⁵ ra‑d‑yašk ġ‑uzmz lli‑ira rbbi ambarki lli‑iḥkamn kullu ma‑illan, ig agllid n‑igldan ig anmġur n‑inmġurn.

¹⁶ nttan waḥdut a‑bdda‑iddrn, izdġ ġ‑tifawt lli‑s‑ur‑iẓḍar yan a‑n‑srs‑yakmur. ur‑jju‑t‑iẓri yan ula iẓḍar yan a‑t‑iẓr. nttan a‑mi‑illa lmjd d‑lquwwa, ġilad ula kullu mayd‑d‑iftan, amin.

¹⁷ ini i‑willi dar iggut‑wayda n‑ddunit‑ad, a‑ur‑ssimġurn ih̬f‑nsn ula‑da‑tawin rrja s‑maylli ur‑ssinn is‑rad‑darsn‑iqama. tinit‑asn ad‑gn rrja ġ‑rbbi lli‑irḍan ad‑aġ‑yakka kullu ma‑igan lh̬ir a‑srs‑ntfraḥ.

¹⁸ ini‑asn ad‑skarn afulki, igatn darsn iskkirn šwanin, ar‑tɛawann ar‑akkan i‑wiyyaḍ.

¹⁹ ġmkan a‑s‑rad‑ssmunn i‑ih̬f‑nsn lh̬ir l‑lih̬rt, baš a‑ig llsas izgan ma‑f‑a‑bnnun tudrt lli‑igan tudrt iṣḥan.

²⁰ wa‑timutaws, gabl lamant lli‑ak‑ifka rbbi. anf i‑tjmmaɛt ih̬wan d‑imjaḥadn n‑willi ur‑ssinnin rbbi. ar‑ttinin is‑darsn lfhmt walaynni ur‑fhimn yat.

²¹ ašku lfhmt‑an a‑ijlan kra gisn zġ‑uġaras l‑lmasiḥ. ad‑awn‑tili lbaraka n‑rbbi.