1 timutaws 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ a‑ur‑tššḥššmt kra n‑ufqqir iġ‑iskr kra yʷh̬šnn, walaynni ssfhm‑as ma‑t‑ih̬ṣṣan zund iġ‑iga babak.

² skar d‑iɛyyaln zund aytmak, ar‑tskart d‑tfqqirin zund innak, ar‑tskart d‑tfrh̬in zund istmak s‑uwl iġusn.

tihjjalin

³ bidd d‑thjjalin lli‑ur dar yan.

⁴ walaynni tahjjalt nna‑dar tarwa‑ns nġd tarwa n‑tarwa‑ns, iqqan‑tn‑d ad‑issann is‑gisn‑ira rbbi ad‑thallan ġ‑tilli ganin tinsn. illa fllasn ad‑traran lh̬ir i‑ayt‑darsn, ašku rbbi irḍa s‑mayad.

⁵ imma tahjjalt nna‑iqaman waḥdutt bla yan, tga rrja‑ns ġ‑rbbi ar‑as‑ttẓalla ar‑zgis‑ttḍalab ġ‑iyḍ ula azal.

⁶ imma tahjjalt nna‑isalan ma‑ira ih̬f‑ns, han tmmut ġ‑rruḥ wah̬h̬a tsul ġ‑ddat.

⁷ uṣṣa‑tn kullu f‑mayad baš a‑ur‑yili kra ġ‑illa lɛib.

⁸ ašku wanna ur‑itɛawann tagʷmat‑ns, han iffuġ aġaras l‑lmasiḥ, yʷh̬šn uggʷar n‑willi ur‑akkʷ‑ssinnin aġaras, d‑bahra iġ‑ur‑a‑itɛawan ayt‑dars.

⁹ šškšm ġ‑warra n‑thjjalin tanna irgln sḍiṣ id‑mraw n‑usggʷas, iġ‑ttin dars ikka ġir yan‑urgaz,

¹⁰ ar‑tti‑talġn mddn f‑lh̬ir lli‑tskar, trbbu tarwa‑ns f‑ma‑ifulkin, ar‑tssmrḥba s‑willi tmuddunin ar‑ttqasa imẓlayn n‑rbbi, ar‑ttɛawan winna llanin ġ‑tnukmut, ar‑n‑bdda‑ttgga tiqqi‑ns a‑tskar afulki d‑kullu mddn.

¹¹ walaynni a‑ur‑tšškšmt timẓẓiyin ġ‑warra n‑thjjalin, ašku ra‑ttirint ad‑tahlnt tis snat‑twal. ra‑ttidunt ard ttunt lmasiḥ

¹² ffuġnt zġ‑wawal lli‑s‑as‑nnant awind‑d f‑ih̬f‑nsnt lḥukm n‑rbbi.

¹³ wan ntnti ar‑tmyarnt inifsisn ar‑tlullint zġ‑tgmmi s‑tayyaḍ. urd ġayan kad‑skarnt walaynni ar‑sawalnt f‑mddn ar‑kššmnt ma‑ur‑igin winsnt, ar‑ttinint ma‑ur‑tnd‑d‑iqqann a‑ti‑ttinint.

¹⁴ mayan a‑f‑riġ tihjjalin lli‑mẓẓinin ad‑tahlnt, arunt tarwa awint‑stt ġ‑tgmmi‑nsnt, baš a‑ur‑yili dar inuwwašn‑nnġ ma‑s‑a‑yaġ‑rggmn.

¹⁵ ašku kra gisnt ijla, amẓnt aġaras n‑šiṭan.

¹⁶ walaynni tamġart tamumnt nna‑dar tihjjalin ist‑dars, illa fllas a‑tnti‑ttɛawan baš a‑ur‑iẓẓaynt f‑umnaggar n‑imumnn. ġmkad a‑s‑ra‑yiẓḍar‑umnaggar a‑itɛawan tihjjalin nna‑ur‑dar yan.

imġarn n‑umnaggar

¹⁷ imma imġarn lli‑tnbaḍnin ġ‑umnaggar s‑nniyt d‑ufulki, iqqan‑d aytmatn a‑tn‑tuqqarn bahra, s‑kigan ġwilli th̬damnin f‑tbrraḥt d‑ulmmud.

¹⁸ ašku ityara ġ‑warra n‑rbbi: «a‑ur‑tgt aġamu i‑uzgr lli‑isrwatn.» ityara‑daġ: «ah̬ddam isthlla tiġrad‑ns.»

¹⁹ a‑ur‑tsfldt s‑yan itaštkkan s‑umġar iġ‑ur‑d‑yiwi sin nġd kraḍ inagan.

²⁰ imma yan iskarn ddnub, ini‑as f‑ma‑iskr ġ‑lgddam‑nsn kullutn baš ad‑iksaḍn wiyyaḍ.

²¹ ha‑yyi ġ‑lgddam n‑rbbi d‑lmasiḥ yasuɛ d‑lmalayka n‑ignna a‑k‑uṣṣaġ a‑tzzgat tiġawsiwin‑ad bla‑da‑tskart s‑uwdmawn ula‑da‑ttirit a‑ttrḍut ih̬f‑nnk.

²² a‑ur‑tzrbt a‑tsrst ifassn‑nnk f‑yan a‑ti‑tẓlit i‑twuri n‑rbbi, a‑ur‑imil‑tkšmt ġ‑ddnub n‑wiyyaḍ. gabl ul‑nnk a‑bdda‑iġus.

²³ a‑ur‑sul‑tssat ġir aman, walaynni zayd‑asn imikk n‑win‑waḍil iktin baš a‑ijji‑udis‑nnk, ašku mnnawt‑twal ayd ttaḍnt.

²⁴ kra n‑mddn, ar‑gisn‑tbann ddnub‑nsn, ar‑malan is‑ra‑fllasn‑ittut lḥukm. imma wiyyaḍ rad‑bann ddnub‑nsn tigira.

²⁵ ġmkan a‑di‑tbann ula ifulkitn lli‑skarn mddn. ula afulki lli‑irgsn ra‑d‑iban tigira.