1 timutaws 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

imslmdn n‑tkrkas

¹ isawl rruḥ lqudus ġilad s‑wawal izgan yini: ġ‑uwssan ggʷranin rad‑fln kra n‑mddn aġaras l‑lmasiḥ, ar‑sflidn s‑tkrkas l‑larwaḥ ʷh̬šnnin ula s‑ulmmud l‑ljnun

² dar imslmdn sskirkisnin ayt‑sin‑uwdmawn lli‑mi‑qqurn‑uwlawn‑nsn bahra.

³ imslmdn‑an ar‑ssḥramn littihal ula kra ih̬lq rbbi i‑umššu, ifk‑t i‑willi srs umnnin issann lḥqq, baš a‑t‑šttan ar‑t‑fllas‑tškarn.

⁴ ašku ifulki kullu ma‑ih̬lq rbbi. ih̬ṣṣa‑yaġ a‑ur‑nssḥram yat, walaynni a‑t‑nškr f‑kullu ma‑nštta.

⁵ ašku ar‑t‑issḥlla rbbi s‑wawal‑ns ula s‑tẓallit lli‑s‑a‑t‑fllas‑ntškar.

ah̬ddam išwan l‑lmasiḥ

⁶ iġ‑a‑tmalat tiġawsiwin‑ad i‑aytmatn ra‑tgt ah̬ddam išwan l‑lmasiḥ yasuɛ, tdust s‑tnbaḍin l‑liman ula s‑ulmmud ifulkin lli‑tumẓt.

⁷ walaynni anf i‑tḥajiyin h̬wanin ula lh̬rayf n‑ddunit‑ad, ar‑tssdust ih̬f‑nnk a‑ttazzalt ġ‑uġaras n‑rbbi.

⁸ ašku yan issdusn ddat‑ns, afulki ayn iskr, walaynni yan issdusn rruḥ‑ns s‑ma‑irḍan rbbi, rad‑as‑ifulki s‑uggʷar i‑tudrt‑ns n‑ddunit‑ad ula tin lih̬rt.

⁹ izga mayd‑ak‑nniġ, iqqan‑d kud yan a‑t‑yamn.

¹⁰ f‑mayan a‑f‑a‑nth̬dam ar‑fllas‑nkkat takrrayt, ašku nga rrja‑nnġ ġ‑rbbi lli‑iddrn. nttan a‑ijjnjamn kullu mddn, s‑uggʷar ġwilli umnnin.

¹¹ sslmad‑asn tiġawsiwin‑ad ar‑tn‑ttuṣṣat a‑srsnt‑skarn.

¹² ad‑ur‑tadjt yan a‑k‑iḥgr f‑ssibt n‑ma‑sul‑tmẓẓit, walaynni skar‑bdda f‑ufulki s‑iwaliwn‑nnk d‑iskkirn‑nnk, ar‑ttḥnnut ġ‑wiyyaḍ ar‑ttamnt awal n‑rbbi s‑uwl iġusn, baš ad‑ẓrn imumnn mamnk a‑tskart irin ad‑skarn ula ntni ġmkan.

¹³ lhu ih̬f‑nnk ar‑taqrat arratn n‑rbbi f‑aytmatn ar‑tn‑tzzɛamt ar‑tn‑tsslmadt ard‑n‑aškġ.

¹⁴ a‑ur‑tettut tawafka n‑rruḥ lli‑gik‑illan, ifka‑yak‑t rbbi s‑wawal lli‑d‑imla ġakud lliġ‑n‑munn imġarn, srsn fllak ifassn‑nsn.

¹⁵ fk ih̬f‑nnk i‑twuri‑ad ar‑srs‑ttlhut, baš ad‑ẓrn kullu mddn mamnk a‑gis‑ttzayadt.

¹⁶ awi‑tt‑bdda ġ‑ih̬f‑nnk d‑ulmmud‑nnk, tzgat ġ‑kullu tiġawsiwin‑ad, ašku ġmkad a‑s‑ra‑tjjnjmt ih̬f‑nnk tjjnjmt ula imsflidn‑nnk.