1 timutaws 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ingabaln n‑umnaggar

¹ izga‑wawal‑ad: wanna iran a‑ig angabal n‑umnaggar, hati tawuri ihiyyan ayd ira.

² iqqan‑d angabal a‑ig wad ġ‑ur‑illi lɛib, iṭṭaf ġir yat‑tmġart, izga‑bdda ġ‑lɛaql‑ns ar‑itnbaḍ ġ‑kullu ma‑iskar, ar‑itfulki d‑mddn ar‑issmrḥba s‑willi tmuddunin, yissan mamnk a‑isslmad wiyyaḍ.

³ a‑ur‑ig wad bahra issann tissi iktin, nġd wad itmmaġn d‑mddn. iqqan‑d a‑ig wad itṣbarn, urd wad itẓin nġd wad dar ɛzzan iqaridn.

⁴ iqqan‑t‑id a‑ig wad itnbaḍn ġ‑ayt‑tgmmi‑ns s‑sslamt, ar‑srs‑sflidn tarwa‑ns ar‑ti‑tuqqarn s‑nniyt‑nsn.

⁵ ašku iġ‑ur‑issin mamnk a‑itnbaḍ ġ‑ayt‑tgmmi‑ns, mamnk a‑ra‑yissan a‑igabl amnaggar n‑rbbi?

⁶ a‑ur‑ig wad bḥra yumẓn aġaras l‑lmasiḥ, ad‑as‑ur‑iml ih̬f‑ns is‑iga kra, iḍr ġ‑lhalak n‑iblis.

⁷ iqqan‑d a‑ig wad‑f‑akkan ayt‑brra tugga šwanin, baš a‑ur‑iḍr tigira ġ‑trggam n‑mddn, tamẓt‑t‑ilmma‑tẓqqurt n‑iblis.

imɛawann n‑umnaggar

⁸ ula imɛawann n‑umnaggar, iqqan‑tn‑d ad‑gn wid zganin ġ‑ufulki. a‑ur‑gn wid sskirkisnin nġd wid ttblanin s‑tissi iktin nġd wid ttirinin ad‑ssmunn ma‑iggutn i‑ih̬f‑nsn.

⁹ iqqan‑tn‑d ad‑ġwin s‑uwl iġusn ġ‑ulmmud lli‑aġ‑d‑imla rbbi.

¹⁰ ula ntni ih̬ṣṣa‑tn ad‑zwar‑tyaramn. iġ‑ur‑gisn‑ityafa kra l‑lɛib, rad‑iẓḍarn ad‑qasan tawuri‑ad n‑imɛawann.

¹¹ ula timġarin, iqqan‑tnd‑d ad‑gnt tid zganin ġ‑ufulki, ar‑tnbaḍnt ġ‑ih̬f‑nsnt, ar‑skarnt s‑lḥqq. a‑ur‑gnt tid sawalnin ġ‑mddn.

¹² iqqan‑d amɛawn a‑iṭṭaf ġir yat‑tmġart, ar‑itnbaḍ ġ‑tarwa‑ns d‑ayt‑tgmmi‑ns s‑sslamt.

¹³ winna skarnin tawuri‑ad n‑imɛawann s‑nniyt‑nsn, rad‑ɛzzan dar mddn, zɛmn bahra ġ‑uġaras l‑lmasiḥ yasuɛ.

¹⁴ ar‑trjuġ a‑n‑dark‑aškġ ġ‑mayd‑d‑yakmurn, walaynni uriġ‑ak‑n tiġawsiwin‑ad baš a‑tnti‑tissant iġ‑d‑maṭlġ,

¹⁵ tẓrt ma‑d‑iqqann a‑ti‑tskar tagʷmat n‑rbbi, a‑stt‑igan d‑umnaggar n‑willi ganin win rbbi lli‑iddrn, tg llsas ula tannalt l‑lḥqq.

liman lli‑aġ‑d‑imla rbbi

¹⁶ maylli‑aġ‑d‑imla rbbi, ar‑kullu‑gis‑ntɛjjab: iban‑d ġ‑ssift n‑bnadm, inru s‑tḥkimt n‑rruḥ, ẓrn‑t lmalayka. ilkm lh̬bar‑ns timizar aggugnin, amnn srs ġ‑kullu ddunit, ityalal s‑lmjd.