1 timutaws 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tiẓulla f‑kullu mddn

¹ f‑mayan a‑f‑rad‑ḍalbġ zġ‑aytmatn ad‑tẓallan f‑kullu mddn, ar‑tḍalabn rbbi a‑tn‑irḥm ibark‑tn, ar‑ti‑tškarn f‑ma‑iskar i‑kraygatt yan.

² illa fllasn ad‑tẓallan f‑igldan ula kullu willi tḥkamnin, baš a‑nddr s‑lhna d‑sslamt nskr afulki ula kullu ma‑ira rbbi.

³ išwa mayad, irḍu srs rbbi anjjam‑nnġ

⁴ lli‑iran kullu mddn ad‑njmn wrrin issann lḥqq.

⁵ ašku illa yan rbbi, yili yan lli‑ibiddn ġ‑gr rbbi d‑bnadm, a‑t‑igan d‑lmasiḥ yasuɛ lli‑igan bnadm.

⁶ ifka ih̬f‑ns a‑ifru kullu mddn ġ‑uzmz lli‑iqṣad rbbi a‑gis‑issbayyn tugga‑ns.

⁷ d‑ġmkad a‑s‑iyi‑iga d‑ubrraḥ d‑urqqas ġ‑gr ayt‑tmizar aggugnin, baš ad‑asn‑sslmadġ aġaras l‑liman ula lḥqq. lḥqq ayad nniġ, ur‑akkʷ‑sskarksġ.

⁸ riġ irgazn ġ‑kraygatt amnaggar ad‑tẓallan ar‑tḍalabn rbbi, ar‑n‑tggan ifassn‑nsn lli‑s‑a‑skarn afulki bla‑da‑tqlaqaln ula‑da‑tẓin.

⁹ riġ ad‑ḥšmnt‑tmġarin lsnt malssa ingaddan lli‑tnt‑id‑iqqann, urd s‑tallamin n‑wazzar nġd urġ nġd ljuhr nġd timlsa ġʷlanin,

¹⁰ walaynni s‑ifulkitn lli‑skarnt ġmklli‑d‑iqqan timġarin lli‑tuqqarnin rbbi.

¹¹ illa f‑tmġarin ad‑lmdnt ar‑tḥšamnt bla‑da‑sawalnt.

¹² ur‑udjiġ kra n‑tmġart a‑tsslmad ula‑da‑ttḥkam ġ‑irgazn. iqqan‑tnd‑d ad‑fssant.

¹³ ašku rbbi iskr adam ġ‑isizwar, iskr ilmma ḥuwwa.

¹⁴ urd adam a‑f‑tt‑izzri iblis ġ‑isizwar walaynni tamġart a‑f‑tt‑izzri, tffuġ zġ‑wawal n‑rbbi.

¹⁵ walaynni ra‑tnjm‑tmġart s‑tlalit n‑tarwa iġ‑a‑ttqama ġ‑liman ar‑ttḥnnu ġ‑wiyyaḍ ar‑ttzga ġ‑ih̬f‑ns s‑uwl iġusn.