1 timutaws 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus arqqas l‑lmasiḥ yasuɛ, ġmklli yumr rbbi anjjam‑nnġ d‑lmasiḥ yasuɛ lli‑ġ‑n‑nrja.

² i‑timutaws iwi iɛzzan ġ‑tagʷmat l‑lmasiḥ. ad‑ak‑tili lbaraka d‑rrḥmt d‑sslamt zġ‑rbbi babatnnġ d‑lmasiḥ yasuɛ siditnnġ.

imslmdn lli‑ffuġnin zġ‑ulmmud yʷġẓann

³ ḍalbġ zġ‑gik ġilad a‑n‑tqamat ġ‑tmdint n‑afsus ġmklli‑ak‑nniġ ġakud lliġ‑n‑zriġ s‑tmazirt n‑makiduniyya. ašku llan ġin kra n‑mddn ar‑sslmadn ma‑ur‑igin lḥqq. riġ a‑tn‑tamrt ad‑fssan,

⁴ tinit‑asn a‑ur‑tlhun ih̬f‑nsn s‑tḥajiyin h̬wanin ula s‑ismawn ggutnin n‑kullu tasutin lli‑zrinin. han tiġawsiwin‑an, ar‑trarant mddn ad‑tmjaḥadn i‑ngratsn. ur‑a‑tn‑tɛawannt ad‑amnn ar‑skarn ma‑gisn‑ittiri rbbi.

⁵ ġmkan a‑s‑k‑uṣṣaġ ašku riġ a‑nzayd ar‑ntɛmmar s‑lḥnant n‑willi dar ul iġusn issann is‑ur‑gisn lɛib amnn s‑lmasiḥ s‑nniyt ikmmln.

⁶ walaynni kra n‑mddn ffuġn aġaras‑ad, ar‑jllun ih̬fawn‑nsn s‑imjaḥadn h̬wanin.

⁷ ar‑ttirin ad‑gn imslmdn n‑ššrɛ, walaynni ur‑fhimn ma‑ttinin ula ssnn tiġawsiwin lli‑s‑a‑sslmadn s‑zzɛamt.

⁸ nssn nkkʷni is‑ifulki ššrɛ ġ‑dar wanna srs iskarn ma‑ira rbbi.

⁹ walaynni iqqan‑d a‑nissan izd f‑ssibt n‑willi ʷh̬šnnin a‑f‑d‑ifka rbbi ššrɛ, urd f‑ssibt n‑willi fulkinin. ifk‑t‑id f‑willi ur‑rinin ššrɛ ffuġn zġ‑gis. ifk‑t‑id f‑willi rurnin tiġurdin‑nsn s‑rbbi ar‑tsalan ddnub, ur‑a‑tuqqarn rbbi ula‑da‑ttirin aġaras‑ns. ifk‑t‑id f‑willi nqqanin babatsn nġd innatsn ula ġwilli nqqanin wiyyaḍ.

¹⁰ ifk‑t‑id f‑willi tfsadnin ula ġwilli tšthunin iwtman zund ntni. ifk‑t‑id f‑willi takʷrnin iḥšmay ula ġwilli sskirkisnin ula ġwilli akkanin tugga n‑tkrkas. ifk‑t‑id f‑kullu willi skarnin aynna iffuġn zġ‑ulmmud yʷġẓann.

¹¹ almmud‑ad iga lh̬bar ifulkin l‑lmjd iggutn lli‑yyi‑d‑imla rbbi ambarki ad‑srs‑tbrraḥġ.

ma‑iskr lmasiḥ i‑bulus

¹² ar‑tškarġ lmasiḥ yasuɛ siditnnġ ašku iga‑yyi d‑wad izgan ġ‑ufulki. iẓli‑yyi issdus‑iyi baš ad‑qasaġ tawuri‑ns.

¹³ kkiġ‑ttin ar‑rggmġ lmasiḥ ar‑t‑ssrfufunġ ar‑dids‑tmmaġġ, walaynni irḥm‑iyi‑d ašku ur‑ssinġ mad‑skarġ ġ‑uwssan‑an, ur‑ta‑srs‑uminġ.

¹⁴ ġakudan ibark gigi siditnnġ s‑lḥnant‑ns iggutn, iɛmmr‑iyi s‑liman d‑tayri n‑willi ganin win lmasiḥ yasuɛ.

¹⁵ awal izgan ayad, iqqan‑d kud yan a‑t‑yamn: yuška‑d lmasiḥ yasuɛ s‑ddunit baš a‑ijjnjm mddn ʷh̬šnnin, d‑nkki a‑kullu‑gisn‑yʷh̬šnn.

¹⁶ walaynni f‑mayan a‑f‑iyi‑d‑irḥm nkki lli‑gisn‑yʷh̬šnn, baš a‑iml is‑iẓḍar lmasiḥ yasuɛ a‑iṣbr d‑wanna ka‑illan, baš a‑srs‑amnn wiyyaḍ kšmn ula ntni s‑tudrt idumn.

¹⁷ imma ġilad rad‑bahra‑ntalġ agllid lli‑idumn. ur‑ra‑immt ula iẓra‑t yan. nttan waḥdut a‑igan rbbi, yili‑as lmjd d‑luqr, ġilad ula kullu mayd‑d‑iftan, amin.

¹⁸ wa‑iwi timutaws, fkiġ‑ak luṣit‑ad ġmklli fllak nnan aytmatn ġayd izrin s‑iwaliwn lli‑asn‑imla rbbi. amẓ ġ‑iwaliwn‑nsn baš a‑tbkist ar‑tkkatt takrrayt f‑ufulki.

¹⁹ zzga ih̬f‑nnk ġ‑uġaras l‑lmasiḥ, d‑a‑ur‑tadjt kra yʷh̬šnn a‑ikšm s‑uwl‑nnk. han kra n‑mddn ur‑a‑stti‑tawin ġ‑mad‑asn‑imala‑uwl‑nsn. d‑ġayan a‑f‑a‑trẓẓa tanawt l‑liman‑nsn,

²⁰ zgisn himinayus d‑iskandr. dḥiġ‑tn‑in ntni i‑šiṭan baš ad‑lmdn a‑ur‑rggmn rbbi.