1 tasaluniki 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ġmklli‑s‑ra‑d‑iwrri lmasiḥ

¹ way‑aytmatnnġ, ur‑aġ‑ih̬ṣṣa ad‑awn‑in‑nara kra f‑uwssan ula izmaz lli‑ġ‑rad‑jrunt‑tġawsiwin‑ad,

² ašku tssnm izd zund amh̬h̬ar n‑iyḍ a‑s‑ra‑d‑ilkm‑wass n‑siditnnġ.

³ ra‑ttinin mddn «labas thnna luqt,» imil igguz‑d fllasn lhalak. ḥayna ra‑tn‑iġwi ġmklli iqqʷay‑ungaẓ tamġart lli‑ra‑yaru, ur‑akkʷ‑rad‑njmn.

⁴ imma kunni ay‑aytmatnnġ, ur‑tllim ġ‑tillas. ur‑ra‑kʷn‑yamẓ‑wass‑an zund amh̬h̬ar.

⁵ ašku kunni kullukn tgam ayt‑tifawt, tgm ayt‑uzal. hati urd win‑iyḍ a‑nga nġd win tillas.

⁶ mayad a‑f‑aġ‑d‑iqqan a‑ur‑nṭṭas zund mddn yaḍni. illa fllannġ a‑bdda‑nrar lɛaql ar‑ntnbaḍ ġ‑ih̬f‑nnġ.

⁷ hati ġ‑iyḍ a‑ġ‑a‑ṭṭasn mddn ar‑ssnufuln ih̬f‑nsn s‑tissi.

⁸ imma nkkʷni nga win‑uzal, yili fllannġ a‑ntnbaḍ ġ‑ih̬f‑nnġ, ng i‑idmarn‑nnġ abannk n‑‹ttiqa ġ‑rbbi› ula ‹lḥnant›, ng i‑ih̬f‑nnġ asddul n‑‹rrja n‑ujnjm›.

⁹ ašku ur‑iqṣad rbbi a‑fllannġ‑yut lɛqubit, walaynni iqṣad ad‑aġ‑ijjnjm f‑uwdm n‑siditnnġ yasuɛ lmasiḥ.

¹⁰ immut nttan f‑ssibt‑nnġ baš a‑dids‑nddr, iġ‑nmmut nġd iġ‑nnit‑nsul ard‑d‑yašk.

¹¹ zaydat ar‑tzzɛamm ar‑ttmɛawanm i‑ngratun ġmklli tmyarm a‑tskarm.

tamunt l‑lfrḥ ula sslamt

¹² imma ġilad ay‑aytmatnnġ, ra‑kʷn‑nḍalb a‑ttuqqarm ġwilli skarnin tawuri n‑rbbi ġ‑gratun, ar‑kʷn‑tgabaln s‑ism n‑siditnnġ ar‑kʷn‑tnṣaḥn.

¹³ mlat‑asn mnšk a‑s‑darun‑ɛzzan f‑ssibt n‑twuri‑nsn. gat s‑sslamt i‑ngratun.

¹⁴ ra‑kʷn‑nḍalb ay‑aytmatnnġ, a‑ttnṣaḥm wanna ur‑ittirin a‑ih̬dm, ar‑tzzɛamm wanna itiksaḍn, ar‑ttɛawanm wanna iḍɛfn, ar‑ttṣbarm d‑kraygatt yan.

¹⁵ rarat lɛaql iġ‑illa mad‑awn‑iskrn kra yʷh̬šnn, ad‑as‑t‑ur‑trarm s‑lh̬ʷšant. gat‑n tiqqi‑nnun a‑bdda‑ttirim a‑tskarm afulki ġ‑gratun ula d‑kullu mddn.

¹⁶ frḥat‑bdda,

¹⁷ ar‑ttẓallam ġ‑kraygatt luqt,

¹⁸ ar‑ttškarm rbbi ġmknna iga lḥal, ašku ġmkad a‑gigun‑ira ġ‑tamunt l‑lmasiḥ yasuɛ.

¹⁹ a‑ur‑tssh̬sim rruḥ lqudus,

²⁰ ula‑da‑ttḥgarm iwaliwn n‑yan ittinin s‑mad‑as‑imala rbbi.

²¹ ssmaqqlat kraygatt kra, tamẓm ġ‑ma‑ifulkin,

²² tanfm i‑kullu ma‑yʷh̬šnn.

²³ imma ġilad ḍalbġ zġ‑rbbi lli‑bdda‑yakkan sslamt a‑kʷn‑issġus zġ‑kullu ma‑gigun‑yʷh̬šnn, ijjnjm ul‑nnun ula rruḥ‑nnun ula ddat‑nnun zġ‑kullu kra igan lɛib ard‑d‑yašk siditnnġ yasuɛ lmasiḥ.

²⁴ ġmkan a‑ra‑iskr rbbi lli‑awn‑d‑iġran, ašku iqama‑bdda ġ‑wawal‑ns.

²⁵ way‑aytmatnnġ, ẓẓallat tḍalbm rbbi f‑ssibt‑nnġ ula nkkʷni.

²⁶ nsallamat d‑aytmatn kullutn s‑unsallam n‑tagʷmat.

²⁷ ra‑kʷn‑uṣṣaġ s‑ism n‑siditnnġ a‑tġrm tabrat‑ad f‑aytmatn kullutn.

²⁸ ad‑awn‑tili lbaraka n‑siditnnġ yasuɛ lmasiḥ.