1 tasaluniki 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tinbaḍin n‑uġaras n‑rbbi

¹ imma ġilad ay‑aytmatnnġ ra‑kʷn‑nḍalb, nnṣḥ‑kʷn s‑ism n‑siditnnġ yasuɛ, a‑ttidum ġ‑uġaras lli‑zginnġ‑tlmdm, ar‑bdda‑ttnawalm ma‑irḍan rbbi. zaydat f‑mayd tskarm, ar‑ti‑tskarm s‑uggʷar.

² tssnm maylli‑f‑kʷn‑nuṣṣa s‑ism n‑siditnnġ yasuɛ ġayd izrin,

³ ašku ira rbbi a‑issġus ulawn‑nnun, yiri gigun a‑tanfm i‑lfsad.

⁴ illa f‑kud yan a‑yissan mamnk a‑ra‑yuqqr tamġart‑ns yili‑tt s‑uwl iġusn.

⁵ a‑ur‑tgm zund ayt‑tmizar lli‑ur‑ssinnin rbbi, ar‑tn‑tnrunt ššhwat‑nsn.

⁶ illa f‑kud yan a‑ur‑iffuġ zġ‑mayan ula itɛdda f‑gʷmas. ašku nenna‑yawn yadlli s‑lmɛqul, ra‑yut siditnnġ lɛqubit f‑kullu winna skarnin wan tiġawsiwin‑an.

⁷ ašku iġra‑yaġ‑d rbbi a‑nġus, ur‑akkʷ‑iri a‑nrku.

⁸ wanna yagʷin a‑isfld s‑wawal‑ad, urd bnadm a‑yagʷi walaynni yagʷi rbbi lli‑awn‑ifkan ula kunni rruḥ‑ns lqudus.

⁹ walaynni ur‑tḥtajjam mad‑awn‑in‑itaran mamnk a‑ttḥubbum aytmatun, ašku rbbi ad‑awn‑isslmdn mamnk a‑ttḥnnum i‑ngratun.

¹⁰ s‑ṣṣaḥt ar‑ttḥubbum kullu aytmatn ġ‑tmazirt n‑makiduniyya kullutt, walaynni ra‑kʷn‑sul‑nḍalb ay‑aytmatnnġ, a‑tzaydm ar‑tn‑ttḥubbum s‑uggʷar.

¹¹ iriyat a‑bdda‑ṭṭrrḥm ar‑ttlhum s‑twuri n‑ih̬f‑nnun ar‑tth̬damm s‑ifassn‑nnun, ġmklli‑awn‑nenna ġayd izrin.

¹² ġmkad a‑f‑ra‑kʷn‑tuqqarn mddn lli‑ur‑ginin win lmasiḥ, ur‑ra‑tḥtajjam yan.

tankra n‑willi mmutnin

¹³ way‑aytmatnnġ, nra a‑tissanm ma‑ra‑ijru i‑willi mmutnin, baš a‑kʷn‑ur‑taġ‑tguḍi zund mddn yaḍni lli‑ur‑dar rrja.

¹⁴ ašku numn is‑immut yasuɛ, inkr‑d zġ‑lmut. namn is‑ra‑dids‑yawi rbbi kullu willi mmutnin umnnin s‑yasuɛ.

¹⁵ maylli‑s‑aġ‑imla siditnnġ a‑rad‑awn‑nini: nkkʷni lli‑ra‑iqama nsul ar ass lli‑ġ‑ra‑d‑yašk siditnnġ, ur‑ra‑nzwur ġwilli mmutnin.

¹⁶ ašku s‑lamr itjhhdn, s‑wawal l‑lmalak imqqurn, s‑tijjijt n‑nnffar n‑rbbi a‑s‑ra‑d‑igguz siditnnġ zġ‑ignna, nkrn‑d mddn l‑lmasiḥ lli‑mmutnin, ntni a‑ra‑izwur.

¹⁷ ġakudan ra‑ntyalal ula nkkʷni lli‑isuln, rad‑kullu‑didsn‑nmun ġ‑imdla, nmnaggar d‑siditnnġ ġ‑ignwan. ġmkad a‑s‑rad‑bdda‑nili d‑siditnnġ.

¹⁸ zzɛamat i‑ngratun s‑iwaliwn‑ad.