1 tasaluniki 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ lliġ ur‑nẓḍar a‑sul‑nṣbr, nini i‑ih̬f‑nnġ ra‑yaf a‑nqama waḥduyaġ ġ‑tmdint n‑atina.

² ġakudan nuzn‑n s‑darun gʷmatnnġ timutaws lli‑igan ah̬ddam n‑rbbi didnnġ ġ‑twuri l‑lh̬bar ifulkin l‑lmasiḥ. nazn‑t‑in a‑kʷn‑izzɛam issdus‑kʷn ġ‑uġaras n‑rbbi,

³ baš a‑ur‑iḍr yan gigun f‑ssibt n‑trfufnt lli‑ġ‑a‑tzraym. tssnm kunni is‑iqṣad rbbi a‑nzri ġ‑mayad,

⁴ ašku ġ‑uwssan lli‑ġ‑didun‑nlla nenna‑yawn bahra is‑ra‑ntrfufun. tẓrm ġilad is‑ijra ġmklli nenna.

⁵ mayad a‑f‑t‑in‑uznġ s‑darun, ašku ur‑ẓḍarġ ad‑sul‑ṣbrġ. ih̬ṣṣa‑yyi ad‑issanġ is‑sul‑tzgam ġ‑uġaras n‑rbbi nġd uhu, ašku ksuḍġ a‑kʷn‑ur‑issḍr iblis, tḍr ula tawuri‑nnġ ġ‑gratun bla lfaytt.

lh̬bar n‑ayt‑tasaluniki

⁶ imma ġilad ġ‑d‑iwrri timutaws zġ‑darun, yawi‑aġ‑d lh̬bar n‑is‑tzgam ġ‑liman‑nnun ula lḥnant n‑ingratun. yini‑aġ is‑a‑ttfraḥm f‑ssibt‑nnġ ġakud nna‑ginnġ‑tswingimm, tirim bahra ad‑aġ‑tẓrm zund ma‑nra bahra a‑kʷn‑nẓr.

⁷ way‑aytmatnnġ, wah̬h̬a nzri ula nkkʷni ġ‑tnukmut d‑trfufnt iggutn, ha‑yaġ nthnna ġilad f‑ssibt‑nnun, ašku nsfld is‑tzgam ġ‑uġaras n‑rbbi.

⁸ nwrri s‑tudrt‑nnġ ašku tbiddm tdusm ġ‑siditnnġ.

⁹ mnšk a‑bahra‑ntškar rbbi fllawn. mnšk a‑bahra‑ntfraḥ f‑ssibt‑nnun ġ‑lgddam n‑rbbi‑nnġ.

¹⁰ ha‑yaġ ġ‑iyḍ ula azal ar‑ntḍalab rbbi ad‑aġ‑ifk a‑kʷn‑nẓr a‑nkmml ma‑kʷn‑sul‑ih̬ṣṣan baš a‑tzaydm ġ‑uġaras l‑lmasiḥ.

¹¹ ar‑ntḍalab rbbi babatnnġ d‑siditnnġ yasuɛ ad‑aġ‑ijjujad aġaras baš a‑n‑nwrri s‑darun.

¹² ar‑ntḍalab siditnnġ ad‑awn‑bahra‑issigat tayri n‑ingratun ula tayri n‑kullu mddn, ġmklli‑kʷn‑bahra‑nttiri nkkʷni.

¹³ ar‑t‑ntḍalab a‑kʷn‑issdus baš a‑tbiddm ġ‑lgddam n‑rbbi babatnnġ s‑uwlawn‑nnun ġusnin bla gigun illa kra l‑lɛib ġakud lliġ ra‑d‑yašk siditnnġ yasuɛ d‑imẓlayn‑ns kullutn.