1 tasaluniki 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tawuri n‑bulus ġ‑tasaluniki

¹ way‑aytmatnnġ, tssnm kunni is‑urd bla lfaytt a‑nzzri ussan‑an ġ‑gratun.

² tsfldm f‑mad‑aġ‑ijran lliġ ur‑ta‑n‑nruḥ s‑darun, ssrfufnn‑aġ mddn ġ‑tmdint n‑filibbi rgmn‑aġ bahra, walaynni izzɛam‑aġ rbbi‑nnġ baš ad‑awn‑nsawl f‑lh̬bar ifulkin lli‑aġ‑imla wah̬h̬a illa ma‑yaġ‑itẓin bahra.

³ ašku ur‑a‑nsskirkis f‑mddn lliġ a‑tn‑ntḍalab ad‑aġ‑sflidn, ula‑da‑nttiri ma‑igan winsn ula‑da‑nttiri a‑stt‑fllasn‑nzzri.

⁴ walaynni ar‑nsawal s‑mklli ginnġ ira rbbi lli‑aġ‑yurmn ifk‑aġ ad‑asn‑nsslkam lh̬bar‑ad ifulkin. ur‑a‑nskar f‑a‑ntrḍu bnadm walaynni ar‑nskar f‑a‑nrḍu rbbi lli‑itarmn ul‑nnġ.

⁵ tssnm is‑ur‑a‑kʷn‑ntalġ ġ‑uwssan‑an s‑iwaliwn h̬wanin ula‑da‑nskar sin‑uwdmawn baš a‑ntamẓ kra f‑wawal‑nnġ. rbbi a‑fllannġ‑igan inigi.

⁶ ur‑jju‑nskir f‑ad‑aġ‑talġm kunni ula wiyyaḍ.

⁷ wah̬h̬a nẓḍar a‑zgigun‑nḍalb ma‑iggutn f‑ssibt n‑ma‑nga irqqasn l‑lmasiḥ, nrh̬a‑bdda didun zund tamġart lli‑stt‑itawin ġ‑tarwa‑ns mẓẓinin.

⁸ tɛzzam darnnġ s‑kigan aylliġ nujad ad‑awn‑in‑nfk urd ġir lh̬bar ifulkin walaynni nfrḥ a‑fllawn‑nfk ula ih̬f‑nnġ. ġunškad a‑darnnġ‑tɛzzam.

⁹ way‑aytmatnnġ, is‑ur‑di‑tswangmm mnšk a‑nth̬dam ar‑ntnhataf ġ‑gratun? nkka‑ttin ar‑nth̬dam ġ‑iyḍ ula azal baš a‑fllawn‑ur‑nẓẓay lliġ a‑yawn‑ntbrraḥ s‑lh̬bar ifulkin n‑rbbi.

¹⁰ kunni tgam inagan fllannġ, ula rbbi iga fllannġ inigi n‑is‑išwa ifulki kullu ma‑nskr ġ‑gratun kunni lli‑yumnn, ur‑jju‑ginnġ‑illi kra l‑lɛib ġ‑darun.

¹¹ tissanm is‑a‑nskar d‑kraygatt yan gigun ġmklli iskar‑urgaz d‑tarwa‑ns ɛzzanin. ar‑kʷn‑nzzɛam ar‑fllawn‑nssfjjij,

¹² ar‑kʷn‑ntnṣaḥ nini‑awn a‑tskarm ġmklli‑d‑iqqann ġwilli ganin win rbbi lli‑awn‑d‑iġran a‑tkšmm s‑tgldit‑ns ula lmjd‑ns.

¹³ mayad‑daġ a‑f‑a‑bdda‑ntškar rbbi, ašku ġakud lliġ tsfldm i‑wawal n‑rbbi lli‑awn‑in‑niwi, tamẓm gis tamnm izd awal n‑rbbi a‑iga, urd awal n‑bnadm. s‑ṣṣaḥt awal n‑rbbi a‑iga, ih̬dm ġilad ġ‑uwlawn‑nnun kunni lli‑srs‑yumnn.

¹⁴ ašku ijra ġ‑darun ay‑aytma, ġmklli ijran ġ‑dar imnaggarn n‑rbbi lli‑umnnin s‑lmasiḥ yasuɛ ġ‑tmazirt n‑yudaya. trfufnm f‑ufus n‑ayt‑tmazirt‑nnun ġmklli rfufnn ntni f‑ufus n‑ayt‑yudaya.

¹⁵ ašku ayt‑yudaya a‑inġan siditnnġ yasuɛ ula lanbiya, ssmsrn‑aġ ula nkkʷni. ar‑tt‑ssṭiyyarn i‑rbbi ar‑skarn gar ġ‑kullu mddn,

¹⁶ ašku ar‑n‑tggan tiqqi‑nsn f‑ad‑aġ‑ssfssan a‑ur‑ntbrraḥ i‑ayt‑tmizar yaḍni s‑wawal lli‑s‑rad‑njmn. ġmkad a‑s‑a‑tɛmmarn lɛbrt n‑ddnub‑nsn. imma ġilad ġ‑tgira igguz‑d fllasn lġaḍab n‑rbbi.

iẓuẓḍ bulus a‑iẓr aytmatn

¹⁷ išqa fllannġ a‑didun‑nngara ay‑aytmatnnġ. wah̬h̬a‑d‑fllawn‑yaggug‑uwdm‑nnġ, iqama‑n‑bdda‑didun‑uwl‑nnġ. mnšk a‑bahra‑nttiri a‑kʷn‑nẓr.

¹⁸ nskr kullu f‑a‑kʷn‑nẓr. mnnawt‑twal ẓuẓḍġ nkki bulus a‑n‑darun‑wrriġ, walaynni ar‑aġ‑itḥṣar šiṭan.

¹⁹ ašku ġakud lliġ ra‑d‑yašk siditnnġ yasuɛ, ma‑ra‑ig ttaj n‑rrja‑nnġ d‑lfrḥ‑nnġ lli‑s‑ra‑nzɛm ġ‑lgddam‑ns, abla kunni?

²⁰ iyah, kunni a‑igan lmjd‑nnġ d‑lfrḥ‑nnġ.