1 tasaluniki 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus d‑sila d‑timutaws, i‑umnaggar n‑willi ganin win rbbi babatnnġ d‑siditnnġ yasuɛ lmasiḥ ġ‑tmdint n‑tasaluniki. ad‑awn‑tili lbaraka d‑sslamt.

lfrḥ n‑bulus s‑aytmatn

² ar‑bdda‑ntškar rbbi fllawn kullukn. ġakud nna‑ntẓalla ar‑kʷn‑d‑naddr,

³ ar‑d‑nswingim ġ‑lgddam n‑rbbi babatnnġ mamnk a‑kullu‑tskarm s‑liman‑nnun, ar‑tth̬damm s‑lḥnant, tzgam ġ‑rrja n‑siditnnġ yasuɛ lmasiḥ.

⁴ way‑aytmatnnġ lli‑f‑iḥnna rbbi, nssn is‑kʷn‑iẓli a‑tgm wins,

⁵ ašku ilkm‑awn‑in lh̬bar‑nnġ ifulkin, urd ġir s‑iwaliwn walaynni s‑lquwwa ula s‑tḥkimt n‑rruḥ lqudus aylliġ‑awn‑iban is‑iga lḥqq. tssnm kunni mamnk a‑nga ġ‑uwssan lli‑nzzri ġ‑gratun, nskr kullu f‑a‑kʷn‑ntɛawan.

⁶ twrrim tskrm ula kunni ġmklli nskar nkkʷni ula siditnnġ. wah̬h̬a trfufnm bahra, tumẓm ġ‑wawal‑ns s‑lfrḥ n‑rruḥ lqudus.

⁷ ġmkan a‑s‑tmlam i‑kullu imumnn ġ‑tmizar n‑makiduniyya d‑ah̬aya mamnk a‑tn‑d‑iqqan ad‑skarn ula ntni.

⁸ walaynni urd ġir makiduniyya d‑ah̬aya a‑n‑ilkm‑wawal n‑siditnnġ f‑ssibt‑nnun, ašku sfldn mddn ġ‑kraygatt mani f‑mamnk a‑tumẓm aġaras n‑rbbi, aylliġ ur‑aġ‑ih̬ṣṣa a‑nini yat f‑mayd ijran.

⁹ ašku ar‑kullu‑ttinin mddn f‑mamnk ad‑aġ‑tqblm lliġ‑n‑darun‑nuška, tflm ilahat n‑ddunit‑ad, twrrim s‑rbbi baš a‑tth̬damm i‑rbbi l‑lḥqq lli‑iddrn.

¹⁰ ar‑ttinin f‑mamnk a‑ttqlm ġilad s‑yus lli‑d‑issnkr zġ‑lmut ar‑d‑iwrri zġ‑ignna, a‑t‑igan d‑yasuɛ lli‑aġ‑ijjnjmn zġ‑lġaḍab lli‑ra‑ittut f‑ddunit.