1 kurintus 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tawuri n‑urqqas

¹ is‑ur‑ẓḍarġ ad‑skarġ ġmknna riġ? is‑ur‑giġ arqqas? is‑ur‑ẓriġ siditnnġ yasuɛ? is‑ur‑tgim kunni ṣṣabt lli‑f‑h̬dmġ s‑ism n‑siditnnġ?

² wah̬h̬a illa ma‑yyi‑ur‑igin d‑urqqas, tssnm kunni is‑t‑giġ, ašku iban gigun ma‑iskr siditnnġ f‑ufus‑inu s‑trqqast lli‑yyi‑ifka.

³ ġmkad a‑s‑a‑traraġ awal i‑willi sri taštkkanin.

⁴ is‑ur‑dari lḥqq ad‑šttaġ ar‑ssaġ ula nkki?

⁵ iġ‑a‑tmudduġ is‑ur‑dari lḥqq a‑didi‑tawiġ tamġart tamumnt zund irqqasn yaḍni d‑aytmas n‑siditnnġ d‑bṭrus?

⁶ izd ġir nkki d‑barnaba ka‑ih̬ṣṣa a‑nth̬dam ġ‑twuri yaḍni baš a‑ntamẓ ma‑nštta?

⁷ man aɛskri ikšmn s‑imiġ ar‑sul‑itṣiyyar f‑ih̬f‑ns? ma‑iẓẓan aḍil ur‑a‑ištta zġ‑lġllt‑ns? ma‑iksan tawrut ur‑a‑issa zġ‑ukkʷfay‑ns?

⁸ walaynni urd ġir lmɛni n‑bnadm a‑s‑nssn tiġawsiwin‑ad. ar‑fllasnt‑ittini ššrɛ ula ntta.

⁹ ašku ġ‑ššrɛ n‑musa a‑ġ‑ityara: «a‑ur‑tgt aġamu i‑uzgr lli‑isrwatn.» izd ġir izgarn a‑iqṣad rbbi ġ‑wawal‑ad?

¹⁰ is‑urd nkkʷni a‑iɛna ġ‑ma‑inna? hati f‑ssibt‑nnġ a‑f‑ityara‑wawal‑ad, ašku ġwalli ikkrzn ula ġwalli imggrn iqqan‑tn‑d a‑n‑trjun ġ‑taġamt n‑ṣṣabt.

¹¹ nkkʷni nluḥ‑n darun amud n‑rruḥ. is‑ur‑darnnġ lḥqq a‑darun‑nmgr kra l‑lh̬ir lli‑tḥtajja ddat?

¹² llan wiyyaḍ ar‑darun‑tamẓn taġamt l‑lh̬ir, imma nkkʷni is‑ur‑rad‑aġ‑tili taġamt yugʷrn tinsn? walaynni ur‑jju‑nḍalb lḥqq‑nnġ. nṣamḥ ġ‑mayan kullut, baš a‑ur‑ntḥṣar tabrraḥt l‑lh̬bar ifulkin l‑lmasiḥ.

¹³ is‑ur‑tssinm, ġwilli th̬damnin ġ‑tgmmi n‑rbbi izd ma‑ityawfkan i‑tgmmi n‑rbbi a‑zġ‑a‑šttan? is‑ur‑tssinm, ġwilli skarnin tawuri n‑uẓru n‑tġrsi izd tiġrsiw‑an a‑zġ‑a‑šttan?

¹⁴ ġmkan a‑yuṣṣa siditnnġ ula f‑willi tbrraḥnin ġilad s‑lh̬bar ifulkin, baš ad‑tamẓn mad‑ḥtajjan f‑ssibt n‑twuri n‑tbrraḥt lli‑skarn.

¹⁵ imma nkki ur‑jju‑ḍalbġ lḥqq‑inu. tabrat‑ad, ur‑awn‑tt‑in‑uriġ baš ad‑amẓġ kra i‑ih̬f‑inu. ašku yuf dari ad‑mmtġ ula ikkis flla kra n‑yan lfrḥ‑ad dari illan s‑mayd skarġ.

¹⁶ walaynni iġ‑a‑tbrraḥġ s‑lh̬bar ifulkin, ur‑ẓḍarġ ad‑alġġ ih̬f‑inu f‑mayd skrġ, ašku iqqan‑iyi‑d ad‑skarġ ġmkad. taguḍi a‑rad‑iyi‑yili iġ‑ur‑a‑tbrraḥġ s‑lh̬bar ifulkin.

¹⁷ mrad izd nkki a‑iqṣadn tawuri‑ad, rad‑iriġ a‑fllas‑tamẓġ tiġrad‑inu. walaynni tqqan‑iyi‑d‑twuri‑ad, ašku rbbi a‑zgigi‑iran a‑stt‑skarġ.

¹⁸ imma ġilad ma‑igan tiġrad‑inu? a‑tnt‑igan d‑mayad. ẓḍarġ ad‑sslkamġ lh̬bar ifulkin i‑mddn bla zgisn ḥtajjaġ yat, ula‑da‑zgisn‑tḍalabġ mad‑sthllaġ f‑twuri‑ad n‑tbrraḥt.

¹⁹ nkki giġ win ih̬f‑inu, ẓḍarġ ad‑skarġ mknna riġ. walaynni giġ ih̬f‑inu d‑ismg i‑kullu mddn, baš a‑zgisn‑rarġ wid ggutnin i‑rbbi.

²⁰ giġ ih̬f‑inu d‑gu‑yudaya ġ‑dar ayt‑yudaya, baš ad‑rarġ ayt‑yudaya i‑rbbi. gġ ih̬f‑inu d‑bu‑ššrɛ ġ‑dar ayt‑ššrɛ, wah̬h̬a ur‑iyi‑d‑iqqan ššrɛ, baš ad‑rarġ ula ayt‑ššrɛ i‑rbbi.

²¹ gġ ih̬f‑inu d‑wad ur‑issinn ššrɛ ġ‑dar willi ur‑ssinnin ššrɛ, baš ad‑rarġ ula ġwilli ur‑ssinnin ššrɛ i‑rbbi. walaynni ur‑jjud nkkin a‑iffuġn zġ‑ššrɛ n‑rbbi ašku ar‑bdda‑skarġ s‑ulmmud l‑lmasiḥ.

²² gġ ih̬f‑inu d‑wad iḍɛfn ġ‑dar willi ḍɛfnin, baš ad‑rarġ ula ġwilli ḍɛfnin i‑rbbi. ġ‑dar kullu mddn ar‑twrriġ gġ zġ‑gisn baš ad‑afġ mamnk ad‑zgisn‑jjnjamġ kra.

²³ kullu mayad, ar‑t‑skarġ baš ad‑sslkmġ lh̬bar ifulkin i‑mddn, kšmġ didsn ġ‑tamunt‑ns.

²⁴ tssnm is‑iggut ma‑iskarn šala n‑tizzla walaynni ġir yan a‑ra‑gisn‑yamẓ lkas. tazzalat ġilad baš a‑tamẓm lkas.

²⁵ kullu wanna itazzaln ar‑issdus ih̬f‑ns. ar‑t‑issdus baš a‑yamẓ kra l‑lkas lli‑ur‑ra‑idum. imma nkkʷni ar‑nssdus ih̬fawn‑nnġ baš a‑namẓ lkas lli‑rad‑bdda‑idum.

²⁶ ur‑a‑tazzalġ nkki bla lfaytt ula‑da‑skarġ tukkʷimt zund yan ikkatn ġir aḍu.

²⁷ walaynni ar‑ssdusġ ddat‑inu ar‑gis‑tnbaḍġ, baš a‑ur‑iyi‑issufġ rbbi ġ‑isiggʷra nkki lli‑yad‑itbrraḥn i‑wiyyaḍ.