1 kurintus 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

asqsi f‑ma‑ityawġrasn i‑laṣnam

¹ imma tifiyi n‑tġrsiw l‑laṣnam, nssn ma‑fllas‑ttinin mddn: «nṭṭaf kullwaġ ‹tawassna›.» hati tawassna ar‑tssuff bnadm, imma tayri ar‑ti‑tssdus.

² yan iġaln is‑issn kra, ur‑ta‑issin ġmklli‑t‑ih̬ṣṣa a‑yissan.

³ walaynni yan ittirin rbbi, hatin ityawssan dar rbbi.

⁴ imma ġwilli šttanin tifiyi n‑tġrsiw l‑laṣnam, nssn fllasn izd «kullu laṣnam n‑ddunit‑ad ur‑a‑skarn yat.» nissan izd «yan‑rbbi ka‑illan.»

⁵ ur‑nttu larwaḥ n‑ignwan ula win‑wakal lli‑zġ‑a‑skarn mddn ‹id‑rbbi›, ašku ntni ggutn darsn id‑rbbi‑nsn d‑id‑siditsn.

⁶ imma nkkʷni, yan‑rbbi ad‑darnnġ‑illan lli‑mi‑nga wins, a‑t‑igan d‑babatnnġ lli‑ih̬lqn kullu ma‑illan. d‑yan‑siditnnġ ad‑darnnġ‑illan lli‑s‑nlla, a‑t‑igan d‑yasuɛ lmasiḥ lli‑s‑ityawh̬laq kullu ma‑illan.

⁷ walaynni tawassna‑yad ur‑tt‑ssinn kullu mddn. ašku kra gisn imyar laṣnam bahra. iġ‑ddan ġilad ar‑šttan tifiyi‑an rad‑swangmn izd tifiyi l‑laṣnam a‑tga. rad‑asn‑ṭiyyr ar‑ssḥssun is‑ra‑tn‑tssrku, ašku ur‑ta‑ssinn mamnk ad‑ẓẓmẓlayn ma‑ifulkin zġ‑ma‑yʷh̬šnn.

⁸ imma rbbi, urd amššu a‑s‑ra‑t‑nrḍu. ur‑dars‑nʷh̬šin iġ‑t‑nšša, ula nšwa dars iġ‑ur‑t‑nšši.

⁹ walaynni illa fllawn a‑trarm lɛaql iġ‑tram a‑tskarm s‑lḥqq‑nnun, a‑ur‑ttggam tabayḍḍrt i‑willi mi iḍɛf liman‑nsn.

¹⁰ ašku yan ur‑bahra‑issinn ma‑ifulkin zġ‑ma‑yʷh̬šnn, iġ‑k‑iẓra kiyi lli‑dar ‹tawassna› ar‑tšttat ġ‑tgmmi l‑laṣnam, is‑ur‑ra‑t‑izzɛam mayan a‑išš ula ntta tifiyi l‑laṣnam?

¹¹ hati s‑twassna‑nnk a‑s‑ra‑thlkt ġwalli iḍɛfn, igan gʷmak lli‑f‑immut lmasiḥ.

¹² wanna iskrn kra n‑ddnb i‑aytmas, issyaggas ġwilli ur‑ta‑ssinnin mamnk aṭṭun afulki zġ‑lh̬ʷšant, hatin lmasiḥ a‑mi‑iskr ddnb.

¹³ mayad a‑f‑rad‑awn‑iniġ, iġ‑ra‑iḍr gʷma f‑ssibt n‑mad‑šttaġ, ur‑sar‑rad‑ššġ tifiyi, baš a‑ur‑ssḍrġ gʷma.