1 kurintus 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

a‑ur‑tṣrḍm i‑ngratun

¹ iġ‑illa yan gigun dars kra‑f‑a‑iṣraḍ i‑gʷmas amumn, is‑ra‑izɛm a‑t‑yawi s‑dar kra l‑lqaḍi lli‑ur‑issinn rbbi, ur‑t‑yiwi s‑dar imẓlayn l‑lmasiḥ?

² is‑ur‑tssinm izd imẓlayn l‑lmasiḥ a‑ra‑iḥkam f‑ddunit kullutt? lliġd kunni a‑ra‑iḥkam f‑ddunit, is‑ur‑tẓḍarm a‑ttḥkamm f‑iṣraḍ‑ad mẓẓinin?

³ is‑ur‑tssinm izd nkkʷni a‑ra‑iḥkam f‑lmalayka? imma ġilad is‑ur‑nẓḍar a‑ntḥkam f‑tġawsiwin n‑tudrt‑ad?

⁴ iġ‑darun‑illa kra n‑uṣraḍ, mah̬ a‑ttirim a‑ti‑tsslkmm i‑willi ur‑ginin yat dar‑umnaggar n‑aytmatn?

⁵ is‑kʷn‑ur‑iššḥššim ġayd tskarm? is‑ur‑gigun‑illi yan iṭṭafn lɛaql yiẓḍar a‑issnfaṣal aytmatn n‑umnaggar?

⁶ imma kunni, han sul‑nnit darun aytmatn ar‑ṣraḍn i‑ngratsn. han dar‑willi ur‑ssinnin rbbi a‑s‑a‑yasn‑ṣraḍn.

⁷ iġ‑a‑tṣraḍm ġmkan i‑ngratun iban gigun is‑tffuġm aġaras bahra. is‑ur‑ra‑yaf a‑tṣbarm d‑wanna‑fllawn‑itɛddan? is‑ur‑ra‑yaf a‑tadjm wanna‑yawn‑yukʷrn?

⁸ imma kunni ar‑ttakʷrm ar‑ttɛddam f‑ingratun, wah̬h̬a‑nnit tgam aytmatn.

⁹ is‑ur‑tssinm mayad? ur‑rad‑kšmn mddn ʷh̬šnnin s‑tgldit n‑rbbi. ad‑ur‑tjlum ih̬f‑nnun. ur‑ra‑srs‑ikšm yan itfsadn nġd yan itɛbadn ilahat n‑ddunit‑ad nġd yan itznun nġd yan itfsadn d‑yutman zund ntta

¹⁰ nġd yan išttan wiyyaḍ nġd yan dar iɛzza a‑itamẓ ma‑iggutn i‑ih̬f‑ns nġd yan itnufuln s‑tissi nġd yan irggmn nġd yan itakʷrn.

¹¹ ula kunni, kra gigun ikka‑ttin ar‑iskar ġmkan, walaynni isird‑kʷn siditnnġ yasuɛ lmasiḥ s‑rruḥ n‑rbbi‑nnġ, iẓli‑kʷn iskr sslamt ġ‑gratun d‑rbbi.

tmjjdat rbbi s‑ddat‑nnun

¹² kra n‑mddn ar‑ttinin: «iḥlla dari kraygatt kra.» walaynni ur‑ra‑k‑infɛa kraygatt kra. «iḥlla dari kraygatt kra,» walaynni ur‑rad‑adjġ yat a‑yyi‑ikrs zund ismg‑ns.

¹³ ar‑ttinin mddn: «iga‑umššu win‑udis, ig‑udis win‑umššu,» walaynni rbbi ra‑ihlk adis ula amššu. ġmkad a‑s‑iban is‑ur‑tgi ddat‑nnġ tin lfsad, walaynni tga tin siditnnġ, ig ntta sidis n‑ddat‑nnġ.

¹⁴ rbbi issnkr‑d ddat n‑siditnnġ zġ‑lmut, rad‑aġ‑d‑issnkr ula nkkʷni s‑tḥkimt‑ns itjhhdn.

¹⁵ is‑ur‑tssinm mayad? kud yan gigun, tga ddat‑ns agzzum zġ‑igzman l‑lmasiḥ. is‑tram a‑tawim yan‑ugzzum l‑lmasiḥ tzdim‑t d‑ddat n‑tmggant? ḥaša.

¹⁶ is‑ur‑tssinm, yan izdin d‑tmggant iwrri iga dids yat‑ddat? ġmklli ityaran: «rad‑gn sin yan.»

¹⁷ walaynni yan izdin d‑siditnnġ iwrri iga ntta dids yan‑rruḥ.

¹⁸ rwlat zġ‑kullu ma‑igan lfsad. ddnub yaḍni ur‑a‑ssyʷh̬šann ddat n‑bnadm, walaynni yan itfsadn, hati ar‑issyʷh̬šan ula ddat‑ns.

¹⁹ is‑ur‑tssinm ddat‑nnun is‑tga tigmmi tamẓlayt, izdġ gis rruḥ lqudus lli‑awn‑ifka rbbi. ur‑tgim win ih̬f‑nnun,

²⁰ ašku nttan a‑kʷn‑isġan, ifk fllawn atig‑nnun. illa fllawn ġilad a‑tmjjdm rbbi s‑ddat‑nnun.