1 kurintus 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ssufġat wanna iskarn ma‑yʷh̬šnn

¹ ašku sfldġ is‑darun lfsad yʷh̬šnn bahra, uggʷar n‑mad‑skarn ġwilli ur‑ssinnin aġaras n‑rbbi. han illa ġ‑gratun yan‑urgaz ar‑igan d‑tmġart n‑babas.

² illa fllawn a‑tallam, walaynni kunni ar‑tssfurrugm. illa fllawn a‑tssufġm ġwalli iskarn ġayan, a‑ur‑sul‑didun‑itmunu.

³ wah̬h̬a‑d‑fllawn‑yaggug‑uwdm‑inu illa‑n‑didun‑uwl‑inu. ha‑nkki zund iġ‑didun‑lliġ, utġ lḥukm s‑ism n‑siditnnġ yasuɛ f‑urgaz lli‑iskarn ġaylli bahra yʷh̬šnn.

⁴ iġ‑tmunm kullukn ġilad, illa‑didun‑uwl‑inu tili didun ula taḥkimt itjhhdn n‑siditnnġ yasuɛ,

⁵ iqqan‑kʷn‑d a‑n‑tdḥim argaz‑an ġ‑ufus n‑šiṭan, baš a‑tyawhlaknt ššhwat n‑ddat‑ns tnjm rruḥ‑ns ġ‑wass lli‑ġ‑ra‑d‑yašk siditnnġ yasuɛ.

⁶ han ur‑šwin isfurrugn‑nnun. is‑ur‑tssinm izd «tah̬mirt idrusn a‑issktayn lɛjin iggutn.»?

⁷ ssittiyat zġ‑gigun tah̬mirt‑an taqdimt, baš a‑bdda‑tgm arh̬ṣiṣ l‑ljdid ġ‑ur‑tlli‑th̬mirt. ašku ilkm‑d lɛid n‑usurf‑nnġ, ityawġras‑ulqqaġ‑nnġ lli‑igan lmasiḥ.

⁸ yili fllannġ a‑nmun f‑lɛid s‑urh̬ṣiṣ n‑ufulki d‑lḥqq, urd aġrum iktin s‑th̬mirt taqdimt n‑tnuwwašt d‑lh̬ʷšant.

⁹ uriġ‑awn‑in‑yad yat‑tbrat, iniġ‑awn gis a‑ttanfm i‑willi tfsadnin.

¹⁰ walaynni ur‑riġ a‑tanfm i‑mddn n‑ddunit‑ad lli‑tfsadnin nġd mddn n‑ddunit‑ad lli‑dar‑iɛzza ad‑tamẓn ma‑iggutn i‑ih̬f‑nsn, nġd ġwilli gisn takʷrnin nġd ġwilli gisn tɛbadnin ilahat yaḍni. ašku ur‑iẓḍar yan a‑yanf i‑kullu mddn‑an abla‑akkʷ‑iffuġ ddunit.

¹¹ walaynni uriġ‑awn tabrat‑an ad‑awn‑iniġ a‑ttanfm i‑wanna igan ih̬f‑ns d‑gʷmatun amumn walaynni ar‑itfsad nġd ar‑itamẓ ma‑iggutn i‑ih̬f‑ns nġd ar‑itɛbad ilahat yaḍni nġd ar‑irggm ġ‑wiyyaḍ nġd ar‑issnuful ih̬f‑ns s‑tissi iktin nġd ar‑itakʷr. wan ġwad, anfat‑as. ula tirmt, a‑ur‑tt‑dids‑tdrum.

¹² ayt‑brra, ur‑ra‑fllasn‑ḥkamġ nkki, walaynni ayt‑umnaggar l‑lmasiḥ, is‑ur‑fllawn‑illi a‑fllasn‑ttḥkamm?

¹³ rbbi a‑ra‑iḥkam f‑willi llanin ġ‑brra, imma kunni «ssufġat wanna yʷh̬šnn zġ‑gratun.»