1 kurintus 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ih̬ddamn n‑rbbi

¹ imma kunni ay‑aytma, ġ‑uwssan‑an ur‑ẓḍarġ ad‑didun‑sawlġ ġmklli sawalġ d‑willi dar rruḥ lqudus, ašku sul tmẓẓim ġ‑lmasiḥ, ɛzzunt‑darun‑tġawsiwin n‑ddunit‑ad.

² ġir akkʷfay ad‑awn‑fkiġ, ašku ur‑ta‑tẓḍarm i‑umššu. sul s‑ġilad ur‑as‑tẓḍarm,

³ ašku ar‑sul‑tskarm zund mddn n‑ddunit‑ad. ašku iġ‑a‑ittiri kra a‑yagʷr kra ar‑ttẓim i‑ngratun, iban gigun izd win ddunit a‑tgam ar‑tskarm zund ġmklli kullu skarn mddn n‑ddunit.

⁴ ašku kra gigun ar‑ittini: «giġ win bulus.» kra gigun ar‑ittini: «giġ win abullus.» iġ‑a‑tskarm ġmkan, zund mddn n‑ddunit a‑tgam.

⁵ ma‑iga abullus ula bulus? ih̬ddamn ka‑nga, tamnm f‑imi‑nnġ s‑mklli ifka siditnnġ i‑kud yan ginnġ.

⁶ nkki ẓẓiġ tasġart, abullus isswa‑tt, walaynni rbbi a‑stt‑issmqqurn.

⁷ ġwalli iẓẓan ula ġwalli isswan ur‑igi yat. walaynni rbbi, nttan a‑issmqqurn.

⁸ ġwalli iẓẓan d‑walli isswan, yan ad‑gan. kud yan, rad‑as‑ifk rbbi tiġrad‑ns f‑twuri lli‑iskr.

⁹ nkkʷni nga wid th̬damnin d‑rbbi. imma kunni tgam igr n‑rbbi, tgm tigmmi lli‑as‑nbnnu.

¹⁰ rbbi ibark gigi ifk‑iyi a‑n‑darun‑srsġ llsas zund iġ‑giġ lmɛllm abnnay. ġilad ar‑fllas‑bnnun mddn yaḍni, walaynni illa f‑kud yan a‑stt‑itawi ġ‑mamnk a‑ibnnu.

¹¹ ašku ur‑iẓḍar yan a‑isrs kra llsas yaḍni abla llsas lli‑ittrsn, a‑t‑igan d‑yasuɛ lmasiḥ.

¹² iġ‑a‑ibnnu yan f‑llsas‑an s‑uwrġ nġd nnuqrt nġd iẓran ġʷlanin nġd akššuḍ nġd asaġur nġd alim,

¹³ ra‑di‑tban‑twuri n‑tbnnayt‑ns. ašku tabnnayt n‑kud yan ra‑ttyaram s‑lɛafit ġ‑wass lli‑ġ‑ra‑d‑yašk lmasiḥ. ra‑tban is‑tdus nġd uhu.

¹⁴ wanna mi ur‑ijdir maylli ibna f‑llsas‑an, rad‑as‑ifk rbbi tiġrad‑ns.

¹⁵ imma wanna mi ijdr maylli ibna rad‑as‑laḥ. ur‑rad‑as‑yili yat, walaynni ra‑injm ntta zund iġ‑nnit‑injm i‑lɛafit.

¹⁶ is‑ur‑tssinm izd tigmmi tamẓlayt n‑rbbi a‑tgam, izdġ gigun rruḥ n‑rbbi?

¹⁷ walaynni tigmmi n‑rbbi, iġ‑tt‑ihlk kra n‑yan ra‑t‑ihlk rbbi. ašku ttyawẓlay‑tgmmi n‑rbbi a‑tg tin rbbi, d‑kunni tigmmi‑ns a‑tgam.

¹⁸ a‑ur‑akkʷ‑ijllu yan ih̬f‑ns. wanna iġaln is‑iṭṭaf lɛaql n‑ddunit‑ad, ih̬ṣṣa‑t a‑iwrri zund iġ‑ur‑issin yat baš a‑iṭṭaf lɛaql iṣḥan.

¹⁹ ašku taḥkimt n‑ddunit‑ad, tga zund anufl dar rbbi. ġmklli ityaran: «rbbi ar‑iqqʷay ayt‑lɛaql ġ‑tillay‑nsn.»

²⁰ ityara‑daġ: «issn siditnnġ is‑h̬wan iswingimn n‑ayt‑lɛaql.»

²¹ ih̬ṣṣa‑kʷn a‑ur‑tssfurrugm f‑ma‑iskr ġwad ula ġwan. ašku kullu ma‑illan, kunni a‑mi‑illa,

²² ig‑iyt bulus nġd abullus nġd bṭrus, ig‑iyt ddunit nġd tudrt nġd lmut, ig‑iyt ma‑illan ġilad nġd ma‑ra‑yili. kunni a‑mi‑illa,

²³ tilim i‑lmasiḥ, yili lmasiḥ i‑rbbi.