1 kurintus 16 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

iskr bulus f‑umuddu s‑kurintus

¹ imma lmɛawnt lli‑ra‑taznm i‑imẓlayn n‑rbbi ġ‑urušalim, illa fllawn a‑tskarm ġmklli uṣṣaġ imnaggarn ġ‑tmazirt n‑galaṭiyya.

² kraygatt ass l‑lḥdd illa f‑kud yan gigun a‑issitti kra ġ‑ma‑yumẓ ġ‑tġrad‑ns, unšk nna‑mi‑iẓḍar, iḥḍu‑t, baš a‑ur‑ih̬ṣṣa a‑tssmunm iqaridn ġakud nna‑n‑darun‑uškiġ.

³ lliġ‑n‑ruḥġ rad‑fkġ tibratin n‑twassna i‑willi tstim, aznġ‑tn a‑n‑awin tawafka‑nnun s‑urušalim.

⁴ iġ‑iyi‑d‑iqqan ula nkki, ra‑n‑didsn‑munġ.

⁵ ra‑n‑darun‑aškġ lliġ kkiġ tamazirt n‑makiduniyya, ašku makiduniyya a‑rad‑kġ zwar.

⁶ riġ a‑n‑darun‑gawrġ, ḥaqqan ra‑n‑darun‑zzriġ tagrst, tɛawnm‑iyi ilmma ad‑kmmlġ f‑umuddu‑nu s‑innas rad‑ftuġ tigira.

⁷ ur‑riġ a‑n‑darun‑zzriġ ġir kra n‑uwssan drusnin ġilad, walaynni riġ a‑n‑darun‑gawrġ kigan iġ‑ira rbbi.

⁸ mayan a‑f‑rad‑qamaġ ġ‑afsus ard izri lɛid n‑win smmus id‑mraw,

⁹ ašku rbbi irẓm ġ‑lgddam‑inu yan‑imi yusɛan ad‑skarġ tawuri ihiyyan wah̬h̬a‑nnit ggutn ġwilli‑aġ‑tḍaḍḍanin.

¹⁰ iġ‑n‑yuška timutaws, awiyat‑stt gis f‑a‑ur‑iḥšm ġ‑darun, ašku tawuri n‑siditnnġ a‑iskar ula ntta zund nkki.

¹¹ a‑t‑ur‑iḥgr yan, walaynni ɛawnat‑t a‑ikmml f‑umuddu‑ns s‑sslamt baš a‑d‑iwrri s‑dari. ašku ha‑yyi ar‑srs‑tqlġ ntta d‑aytmatn yaḍni.

¹² imma gʷmatnnġ abullus, sawlġ‑as s‑lmɛqul nniġ‑as ra‑ifulki a‑n‑imun d‑aytmatn yaḍni s‑darun, walaynni ur‑akkʷ‑iri a‑n‑yašk ġilad. ra‑n‑darun‑yašk ġakud nna‑yufa.

¹³ ḍufat tzgam ġ‑uġaras l‑lmasiḥ, tzɛmm tdusm.

¹⁴ kullu ma‑tskarm, skarat‑t s‑lḥnant.

¹⁵ way‑aytma, tssnm izd stifanas d‑ayt‑tgmmi‑ns a‑izwarn is‑umẓn aġaras l‑lmasiḥ ġ‑tmazirt n‑ah̬aya, fkn ih̬fawn‑nsn ad‑th̬damn i‑imẓlayn l‑lmasiḥ.

¹⁶ ḍalbġ‑kʷn ġilad a‑tsflidm s‑mddn zund ġwid ula kullu wanna ith̬damn ar‑itnhataf didnnġ f‑twuri‑ad.

¹⁷ frḥġ ġilad ġ‑d‑yuška stifanas d‑furtunatus d‑ah̬aykus ašku ɛmmrn adġar‑nnun lli‑dari‑ih̬wan,

¹⁸ ssfjjijn ul‑inu ula nkki ġmklli ssfjjijn winnun. tuqqarat mddn zund ġwid.

¹⁹ ar‑n‑fllawn‑tsllamn imnaggarn n‑aytmatn ġ‑tmazirt n‑asiyya. ar‑n‑bahra‑fllawn‑itsllam akila d‑briskilla s‑ism n‑siditnnġ, ntni d‑umnaggar lli‑itmunun ġ‑tgmmi‑nsn.

²⁰ ar‑n‑fllawn‑tsllamn aytmatn kullutn. nsallamat i‑ngratun s‑unsallam n‑tagʷmat.

²¹ nkki bulus, s‑ufus‑inu a‑s‑awn‑in‑uriġ sslam‑ad.

²² a‑ittut lḥukm n‑rbbi f‑wanna ur‑ittirin siditnnġ. ‹maranata›. (ašk‑id a‑siditnnġ.)

²³ ad‑awn‑tili lbaraka n‑siditnnġ yasuɛ lmasiḥ.

²⁴ ar‑kʷn‑bahra‑ttiriġ kullukn ġ‑tamunt l‑lmasiḥ yasuɛ.