1 kurintus 15 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tankra l‑lmasiḥ zġ‑lmut

¹ way‑aytma, riġ ad‑awn‑d‑ssktiġ lh̬bar ifulkin lli‑s‑awn‑in‑tbrraḥġ. tsfldm srs tzgam gis

² tnjmm f‑ssibt‑ns iġ‑sul‑tġwim ġ‑wawal n‑tbrraḥt‑inu. han iġ‑ur‑igi ġmkan, han liman‑nnun bla lfaytt.

³ ašku awal ihiyyan lli‑yyi‑d‑ilkmn, sslkmġ‑awn‑t‑in ula kunni, iniġ‑awn is‑immut lmasiḥ a‑yasi ddnub‑nnġ ġmklli ityaran ġ‑warratn n‑rbbi.

⁴ ityawmḍal, ityalal ġ‑wis kraḍ‑uwssan ġmklli ityaran.

⁵ iban‑d ġakudan i‑bṭrus iban‑d ilmma i‑irqqasn s‑sin d‑mraw.

⁶ iban‑d ilmma i‑uggʷar n‑smmus id‑miyya zġ‑aytmatn ġ‑yat‑twal. iggut gisn mad‑sul‑isuln walaynni kra immut.

⁷ iban‑d ilmma i‑yaɛqub, iban‑d ilmma i‑irqqasn kullutn.

⁸ ġ‑isiggʷra iban‑iyi‑d ula nkki zund iġ‑giġ yan iluln bla azmz‑ns.

⁹ nkki mẓẓiġ ġ‑irqqasn. ur‑akkʷ‑sthllaġ ad‑iyi‑ttinin arqqas, ašku kkiġ‑ttin ar‑ssrfufunġ amnaggar n‑rbbi.

¹⁰ walaynni rbbi iskr‑iyi afulki ifk‑iyi ad‑gġ mad‑giġ ġilad. urd bla lfaytt ad‑iyi‑iskr afulki, ašku wrriġ ar‑th̬damġ uggʷar n‑kullu wiyyaḍ, wah̬h̬a urd nkki a‑t‑iskarn walaynni lbaraka n‑rbbi lli‑dari‑illan.

¹¹ zund nkki zund ntni, ġmkad a‑s‑a‑ntbrraḥ, ġmkad a‑s‑tumnm.

tankra n‑willi mmutnin

¹² «inkr‑d lmasiḥ zġ‑lmut.» ġmkad a‑iga‑wawal n‑tbrraḥt‑nnġ. imma kunni, mamnk a‑ra‑yiri kra gigun a‑ittini «ġwilli mmutnin ur‑ẓḍarn ad‑d‑nkrn»?

¹³ iġ‑ur‑iẓḍar bnadm ad‑d‑inkr zġ‑lmut, ur‑d‑akkʷ‑inkir lmasiḥ.

¹⁴ walaynni iġ‑ur‑d‑inkir lmasiḥ, ur‑illi ma‑f‑a‑ntbrraḥ ula illa ma‑s‑a‑ttamnm.

¹⁵ iġ‑ur‑a‑nkkrn ġwilli mmutnin, ur‑akkʷ‑issnkir rbbi lmasiḥ. iġ‑ur‑a‑nkkrn ġwilli mmutnin, ha‑yaġ ar‑nsskirkis f‑rbbi, ašku ar‑nttini issnkr‑t‑id.

¹⁶ iġ‑ur‑iẓḍar bnadm a‑d‑inkr zġ‑lmut, ur‑d‑inkir lmasiḥ.

¹⁷ walaynni iġ‑ur‑d‑inkir lmasiḥ, hatin tumnm bla lfaytt, tilim sul ġ‑ddu lḥukm n‑ddnub‑nnun.

¹⁸ iġ‑ur‑d‑inkir lmasiḥ, tthlkn kullu willi srs umnnin mmtn.

¹⁹ mrad is‑iḥudda rrja‑nnġ ġ‑lmasiḥ ġir i‑tudrt‑ad, nkkʷni a‑ra‑d‑qqann imṭṭawn uggʷar n‑kullu mddn.

²⁰ walaynni s‑lḥqq inkr‑d lmasiḥ zġ‑lmut ig amnzu ġ‑willi ṭṭasnin.

²¹ f‑ssibt n‑yan‑urgaz a‑s‑tlla lmut. imma ġilad f‑ssibt n‑yan‑urgaz yaḍni a‑s‑tlla‑tnkra zġ‑lmut.

²² rad‑kullu‑nmmt f‑ssibt n‑ma‑iskr adam, rad‑kullu‑nnkr f‑ssibt n‑ma‑iskr lmasiḥ.

²³ ra‑d‑inkr kraygatt yan s‑twala‑ns. lmasiḥ a‑izwarn ig amnzu. tigira‑ns rad‑nkrn ġwilli ganin wins ġakud nna‑d‑iwrri s‑ddunit‑ad,

²⁴ iruḥ‑d ilmma isiggʷra, ihlk lmasiḥ kullu larwaḥ ula ssulṭat ula lquwwat n‑ignwan irar‑d tagldit i‑rbbi babas.

²⁵ ra‑iḥkam lmasiḥ ard ig rbbi kullu inuwwašn‑ns ġ‑ddu iḍarn‑ns.

²⁶ anuwwaš amggʷaru lli‑ra‑ihlk a‑t‑igan d‑lmut.

²⁷ ašku ityara: «irur‑d kullu ma‑illan ġ‑ddu iḍarn‑ns.» nssn is‑ur‑ra‑yili rbbi ġ‑ddu iḍarn‑ns, walaynni rbbi a‑ra‑irar kullu ma‑illan ġ‑ddu iḍarn l‑lmasiḥ.

²⁸ ġakud lliġ ra‑yili kullu ġ‑ddu l‑lḥukm n‑yus n‑rbbi, ra‑ifk ih̬f‑ns ġ‑ddu lḥukm n‑walli‑d‑irurn kullu ma‑illan ġ‑ddu lḥukm‑ns. ġmkad a‑s‑ra‑iḥkam rbbi f‑kullu ma‑illan.

²⁹ walaynni iġ‑ur‑rad‑d‑nkrn ġwilli mmutnin, mah̬ aylliġ a‑ttirin kra n‑mddn ad‑ddmn s‑udum n‑waman i‑willi‑asn‑mmutnin? mal‑lfaytt a‑rad‑asn‑yili ġ‑udum‑an iġ‑ur‑rad‑d‑nkrn zġ‑lmut?

³⁰ ula nkkʷni, mah̬ aylliġ a‑nttiri a‑bdda‑nskar f‑lmut?

³¹ way‑aytma, ar‑n‑tmnaggarġ d‑lmut kraygatt ass. nniġ‑awn‑t ašku tɛzzam dari bahra ġ‑tamunt l‑lmasiḥ yasuɛ siditnnġ.

³² walaynni ma‑rad‑iyi‑yili iġ‑mmaġġ d‑luḥuš ġ‑tmdint n‑afsus ġir baš ad‑rḍuġ ih̬f‑inu? iġ‑ur‑rad‑nkrn ġwilli mmutnin ra‑yaf a‑nskar ġmklli ttinin mddn: «a‑nšš nsu ġassad ašku azkka tlla lmut.»

³³ ad‑ur‑tjlum ih̬f‑nnun. «gar tamunt a‑iẓẓriẓn ul izddign.»

³⁴ wrryad‑d s‑uġaras inmn, tanfm i‑kullu ma‑igan ddnub. han illa gigun ma‑ur‑akkʷ‑issinn rbbi. is‑kʷn‑ur‑bahra‑iššḥššim ġayan?

ddat n‑ayt‑ignna

³⁵ walaynni ra‑yyi‑isqsa kra n‑yan: «mamnk a‑rad‑nkrn ġwilli mmutnin? mamnk a‑ra‑tg ddat lli‑s‑rad‑nkrn?»

³⁶ walaynni is‑ur‑teṭṭaft lɛaql? amud nna‑tluḥt ur‑ra‑d‑inkr iġ‑ur‑yad‑immut.

³⁷ urd agʷlas a‑n‑tluḥt ġ‑wakal, walaynni ġir yan‑waqqa imẓẓin n‑irdn nġd win kra n‑imndi yaḍni.

³⁸ walaynni rad‑as‑ifk rbbi ddat lli‑iqṣad ntta, ifk i‑kraygatt amud ddat lli‑as‑igan.

³⁹ ašku tifiyi urd‑yat a‑tga. tlla‑tfiyi n‑bnadm tili tin lbhaym tili tin igḍaḍ tili ula tin islman.

⁴⁰ illa ma‑izdġn ġ‑ignwan, yili ma‑izdġn f‑wakal. illa‑ufulki n‑ma‑izdġn ġ‑ignwan, yili‑ufulki n‑ma‑izdġn f‑wakal.

⁴¹ yili‑ufulki n‑tafukt yili‑ufulki n‑wayyur yili‑ufulki n‑itran, iẓli‑ula‑ufulki n‑itri f‑itri.

⁴² ġmkad a‑ra‑tg‑tnkra n‑willi mmutnin. tmmut ddat lli‑iḍrn ġ‑wakal, walaynni ur‑ra‑sar‑tmmt ddat lli‑ra‑d‑inkr.

⁴³ ttyawmḍal th̬sr, tnkr‑d tfulki. ttyawmḍal tḍɛf, tnkr‑d s‑lquwwa.

⁴⁴ ttyawmḍal ddat n‑ddunit‑ad, tnkr‑d tg ddat n‑ignna. nssn is‑tlla ddat n‑ddunit‑ad tili ula tin‑ignna.

⁴⁵ ġmkad a‑ityaran ġ‑warra n‑rbbi: «argaz amzwaru adam iwrri iga yal‑lh̬lq iddrn.» imma adam amggʷaru iga yan‑rruḥ issddrn.

⁴⁶ urd bab n‑rruḥ a‑d‑izwarn walaynni bab n‑ddat n‑ddunit‑ad, iggʷru‑as‑d ilmma bab n‑rruḥ.

⁴⁷ argaz amzwaru ityawskar zġ‑idqqi, ig win‑wakal. imma argaz wis sin iga zġ‑ignna.

⁴⁸ zund win‑wakal ad‑gan ayt‑wakal, walaynni zund win‑ignna ad‑gan ayt‑ignna.

⁴⁹ ġilad nga zund win‑wakal, tigira ra‑ng zund win‑ignna.

⁵⁰ riġ ad‑awn‑iniġ ay‑aytma, ur‑tẓḍar ddat n‑tfiyi d‑idammn a‑twrt tagldit n‑rbbi, ula iẓḍar ma‑igan win lmut a‑iwrt ma‑rad‑bdda‑iddr.

^51-52 rad‑awn‑iniġ kra intln. ur‑rad‑kullu‑nmmt, walaynni rad‑aġ‑kullu‑ibddl rbbi, ḥayna ġ‑nnffar iggʷran, ur‑ta‑tmmussi tiṭ. ašku ra‑ittut nnffar nkrn‑d ġwilli mmutnin f‑ad‑ddrn s‑tudrt idumn. ġakudan rad‑aġ‑ibddl.

⁵³ ašku iqqan‑d ddat‑ad itrkamn a‑ttyawbddal s‑ma‑rad‑bdda‑idum, iqqan‑d ddat‑ad itmtatn a‑ttyawbddal s‑ma‑rad‑bdda‑iddr.

⁵⁴ ġakudan ġ‑iwrri idum ma‑itrkamn iddr ma‑itmtatn, ra‑yili ma‑ityaran ġ‑warra n‑rbbi: «nnra lmut, ur‑sul‑fllannġ‑tlli.» «wa‑lmut, ma‑tnrit? wa‑lmut, ma‑sul‑issiwid‑usaqs‑nnm?»

⁵⁶ asaqs l‑lmut a‑t‑igan d‑ddnub. imma tawda n‑ddnub a‑stt‑iskrn d‑ššrɛ.

⁵⁷ walaynni ar‑bahra‑ntalġ rbbi ašku ifka‑yaġ a‑nnru kullu mayan f‑uwdm n‑siditnnġ yasuɛ lmasiḥ.

⁵⁸ way‑aytma ɛzzanin, mayad a‑f‑rad‑awn‑iniġ: dusat tzgam ar‑bdda‑ttlhum s‑twuri n‑siditnnġ, tissanm is‑urd bla lfaytt a‑s‑a‑ttnhatafm s‑ism n‑siditnnġ.