1 kurintus 14 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

skarat f‑ma‑ra‑issdus amnaggar

¹ skarat kullu s‑lḥnant, tirim bahra ad‑awn‑ilint‑twafkiw n‑rruḥ lqudus, s‑uggʷar a‑ttinim s‑mad‑awn‑imala rbbi.

² yan isawaln s‑iwaliwn iġribn, rbbi ayn‑d‑a‑isawal urd mddn, ašku ur‑ssinn mddn lmɛna n‑iwaliwn‑ns. ntta s‑tḥkimt n‑rruḥ lqudus a‑s‑a‑isawal f‑ma‑intln.

³ imma yan ittinin s‑mad‑as‑imala rbbi ar‑isawal i‑mddn baš a‑tn‑itɛawan ntni, ar‑tn‑izzɛam ar‑issfjjij ulawn‑nsn.

⁴ yan isawaln s‑iwaliwn iġribn, ar‑issdus ġir ih̬f‑ns, imma yan ittinin s‑mad‑as‑imala rbbi ar‑issdus aytmatn n‑umnaggar kullutn.

⁵ riġ a‑kullu‑tsawalm s‑iwaliwn iġribn, walaynni riġ uggʷar a‑ttinim s‑mad‑awn‑imala rbbi. yan ittinin s‑mad‑as‑imala rbbi yugʷr yan isawaln s‑iwaliwn iġribn iġ‑ur‑illi ma‑iẓḍarn a‑issbayyn lmɛna n‑iwaliwn‑an baš a‑issdus aytmatn n‑umnaggar.

⁶ way‑aytma, mal‑lfaytt a‑ra‑yili iġ‑n‑darun‑uškiġ ar‑sawalġ ġir s‑iwaliwn iġribn? lfaytt ur‑ra‑tili abla iġ‑awn‑in‑sslkmġ kra n‑wawal zġ‑rbbi nġd kra n‑twassna nġd kra‑yyi‑imla rbbi nġd kra n‑ulmmud.

⁷ ẓrat taɛuwwatt ula rribab, urd bnadm ad‑gan, walaynni iġ‑ur‑ngaddan ma‑ra‑yissan ma‑iqṣad‑uɛuwwad ula bu‑rribab?

⁸ ula nnffar, iġ‑ur‑inm‑wawal‑ns ma‑ra‑inkr iskr f‑imiġ?

⁹ ula kunni, ma‑ra‑ifhm ma‑ttinim iġ‑a‑tsawalm s‑iwaliwn iġribn? iġ‑ur‑a‑ttban lmɛna n‑ma‑ttinim, ar‑tsawalm ġir ġ‑lhawa.

¹⁰ nssn is‑ggutn iwaliwn lli‑s‑a‑sawaln mddn ġ‑tmizar n‑ddunit kullutnt. kraygatt awal iṭṭaf kra l‑lmɛna,

¹¹ walaynni yan sri isawaln, rad‑dars‑gġ abrrani iġ‑ur‑ssinġ lmɛna n‑ma‑ittini, ig dari abrrani ula ntta.

¹² imma kunni, ssnġ is‑a‑bahra‑ttirim tiġawsiwin n‑rruḥ lqudus, walaynni iriyat s‑uggʷar a‑tskarm f‑ma‑ra‑issdus amnaggar n‑aytmatn.

¹³ mayad a‑f‑illa f‑kud yan isawaln s‑iwaliwn iġribn a‑iḍalb rbbi ad‑as‑issbayyn lmɛna‑nsn.

¹⁴ iġ‑a‑tẓallaġ s‑iwaliwn iġribn, hati ul‑inu a‑itẓallan imma lɛaql‑inu ur‑as‑illi yat.

¹⁵ ma‑rad‑skarġ? rad‑tẓallaġ zġ‑uwl‑inu, ẓẓallġ ula s‑lɛaql‑inu. rad‑tasiġ amarg zġ‑uwl‑inu, asiġ amarg ula s‑lɛaql‑inu.

¹⁶ walaynni iġ‑a‑ttškart rbbi ġir zġ‑uwl‑nnk isfld‑ak yan ur‑issinn ma‑illan, mamnk ra‑yiẓḍar a‑yini «amin» iġ‑ur‑issin ma‑f‑a‑ttškart rbbi?

¹⁷ wah̬h̬a tfulki‑tẓallit‑nnk ur‑srs‑tɛawnt ġwalli yaḍni.

¹⁸ imma nkki škrġ‑t i‑rbbi, ar‑sawalġ s‑iwaliwn iġribn uggʷar‑nnun kullukn.

¹⁹ walaynni yuf dari ad‑iniġ smmus iwaliwn s‑lɛaql‑inu ġ‑umnaggar baš ad‑sslmadġ wiyyaḍ, uggʷar n‑mraw id‑walf n‑iwaliwn iġribn.

²⁰ way‑aytma, a‑ur‑tswingimm zund tarwa mẓẓinin. illa fllawn a‑tmẓẓim ġ‑ma‑yʷh̬šnn, walaynni imġurat ġ‑lɛaql‑nnun.

²¹ ityara ġ‑warra n‑rbbi: «f‑imi n‑ayt‑iwaliwn iġribn ula f‑infurn n‑ibrraniyn a‑f‑rad‑sawlġ s‑mddn‑inu, walaynni ur‑ra‑sri‑sfldn. ġmkad a‑s‑inna sidi rbbi.»

²² mayad a‑f‑nssn iwaliwn iġribn ur‑gin tamatart i‑willi umnnin, walaynni gan tamatart i‑willi dar idrus liman. imma aynna imla rbbi a‑t‑ittini yan i‑wiyyaḍ, ra‑ig tamatart i‑willi umnnin, urd willi dar idrus liman.

²³ walaynni iġ‑munn ayt‑umnaggar kullutn ar‑kullu‑sawaln s‑iwaliwn iġribn, ma‑ra‑ijru? iġ‑n‑kšmn kra n‑mddn ur‑ssinn ma‑illan nġd kra n‑mddn dar idrus liman, rad‑inin «kra n‑rruḥ a‑gigun‑illan.»

²⁴ walaynni iġ‑a‑kullu‑ttinim s‑mad‑awn‑in‑imala rbbi, iġ‑n‑ikšm kra n‑yan dar idrus liman nġd kra n‑yan ur‑issinn ma‑illan, ra‑issḥssu s‑ddnub‑ns yissan is‑fllas‑illa lḥukm,

²⁵ iban kullu ma‑intln ġ‑uwl‑ns. ra‑iḍr s‑wakal yalġ rbbi yini «s‑ṣṣaḥt illa rbbi ġ‑wammas‑nnun.»

skarat kullu s‑tnbaṭṭ izgan

²⁶ ma‑ra‑nskar ay‑aytma? ġakud nna‑tmunm i‑ngratun kud yan ra‑dars‑tili kra n‑talġat nġd kra n‑ulmmud nġd kra‑yas‑issbayyn rbbi nġd kra n‑iwaliwn iġribn nġd lmɛna n‑iwaliwn iġribn. kullu ma‑tskarm, illa fllawn a‑srs‑tssdusm ayt‑umnaggar.

²⁷ iġ‑illa ma‑iran a‑isawl s‑iwaliwn iġribn, ih̬ṣṣa a‑ur‑sawaln uggʷar n‑sin mddn nġd kraḍ, kud yan s‑twala‑ns. ih̬ṣṣa yan a‑issbayyan lmɛna n‑iwaliwn‑nsn.

²⁸ walaynni iġ‑ur‑illi ma‑iẓḍarn a‑issbayyn lmɛna, illa fllasn ad‑fssan ġ‑wammas n‑umnaggar isawl kud yan s‑ih̬f‑ns ula s‑rbbi.

²⁹ adjat sin mddn nġd kraḍ a‑ttinin s‑mad‑asn‑imala rbbi, ar‑tuzzann wiyyaḍ awal‑nsn.

³⁰ walaynni iġ‑issbayyn rbbi kra yaḍni i‑yan igawrn ġin, illa f‑walli isawaln a‑ifssa.

³¹ ašku tẓḍarm a‑kullu‑ttinim mad‑awn‑imala rbbi yan s‑yan baš ad‑kullu‑tlmdm tzɛmm.

³² imma wanna ittinin s‑mad‑as‑imala rbbi, illa fllas a‑itnbaḍ ġ‑rruḥ‑ns.

³³ ašku rbbi ur‑igi bu‑iruwwayn. bu‑sslamt a‑iga.

³⁴ illa f‑tmġarin ad‑tfssant ġ‑darun ġmklli tfssant ġ‑kullu imnaggarn n‑imẓlayn. ur‑asnt‑ityawfka ad‑sawalnt. ġmklli ittini ššrɛ n‑musa, ur‑izri a‑ttḥkamnt f‑wiyyaḍ.

³⁵ iġ‑rant ad‑issannt kra, illa fllasnt ad‑sqsant irgazn‑nsnt ġ‑tgmmi. iġ‑tsawl‑tmġart ġ‑wammas n‑umnaggar, han lɛib ayn tskr.

³⁶ ma‑tnnam? izd darun a‑zġ‑d‑yuška‑wawal n‑rbbi? izd kunni waḥdukn ka‑t‑issnn?

³⁷ wanna gigun ittinin is‑a‑yas‑imala rbbi awal nġd tlla‑dars‑tḥkimt n‑rruḥ lqudus, iqqan‑t‑id a‑yini izd luṣit n‑siditnnġ ayd‑awn‑in‑uriġ.

³⁸ iġ‑ur‑iqbil mayad, ur‑ityawqbal ntta.

³⁹ imma ġilad ay‑aytma, iriyat bahra a‑ttinim s‑mad‑awn‑imala rbbi. a‑ur‑tḥṣarm yan isawaln s‑iwaliwn iġribn,

⁴⁰ walaynni skarat kullu ġmklli‑d‑iqqann s‑tnbaṭṭ izgan.