1 kurintus 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lḥnant

¹ iġ‑a‑sawalġ s‑iwaliwn n‑bnadm ula win lmalayka d‑nkki ur‑a‑tḥnnuġ, ur‑giġ abla zund nnaqus d‑tqrqawin s‑tṣtnnanayt d‑uqqryan.

² iġ‑ẓḍarġ a‑ttiniġ s‑mad‑iyi‑imala rbbi, iġ‑ssnġ lmɛna n‑kullu ma‑intln ula kullu ma‑illan, iġ‑umnġ aylliġ ssittiġ iwrar bla‑da‑tḥnnuġ, ur‑giġ yat.

³ iġ‑fkiġ kullu ma‑dari‑illan fkġ ula ddat‑inu ar ajddar bla‑da‑tḥnnuġ, ur‑rad‑iyi‑yili yat.

⁴ imma yan ġ‑tlla lḥnant, ar‑itṣbar ar‑itfulki d‑wiyyaḍ. ur‑a‑itḥsad ula‑da‑issimġur agayyu‑ns ula‑da‑itfššiš.

⁵ ur‑ibassl ula‑da‑itrḍu ih̬f‑ns ula‑da‑itqlaqal d‑wiyyaḍ ula‑da‑d‑iswingim lɛib lli‑gis‑skrn.

⁶ ur‑a‑itfraḥ s‑ma‑yʷh̬šnn, walaynni ar‑itfraḥ s‑lḥqq.

⁷ ar‑kullu‑itasi ar‑kullu‑itamn ar‑kullu‑itrju ar‑kullu‑itṣbar.

⁸ lḥnant ur‑dars ttmi. ra‑d‑yašk yan‑uzmz ġ‑ur‑ra‑yili ma‑ittinin s‑mad‑as‑imala rbbi, ula illa ma‑isawaln s‑iwaliwn iġribn, ula illa ma‑iṭṭafn tawassna.

⁹ ašku tḥudda‑twassna lli‑darnnġ‑illan, iḥudda mad‑aġ‑imala rbbi.

¹⁰ walaynni iġ‑d‑yuška ma‑ur‑dar ttmi, ra‑issitti ma‑iḥuddan.

¹¹ ġakud lliġ giġ aḥšmi ar‑sawalġ zund aḥšmi ar‑ssḥssuġ zund aḥšmi ar‑swingimġ zund aḥšmi, walaynni lliġ wrriġ giġ argaz flġ‑n tiġawsiwin n‑iḥšmay.

¹² ašku kullu mayd nẓrra ġilad, iga zund iġ‑a‑ntmnad ġ‑lmri illasn, imma ġ‑uzmz‑an ra‑nẓr udm s‑uwdm. ssnġ ġilad imikk, imma ġ‑uzmz‑an rad‑issanġ kullu ġmklli‑yyi‑issn rbbi.

¹³ imma ġilad, iqama‑sul liman d‑rrja d‑lḥnant, ntni s‑kraḍ, walaynni tamzwarut gisn a‑stt‑igan d‑lḥnant.