1 kurintus 12 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tiwafkiw zġ‑rruḥ lqudus

¹ imma tiġawsiwin n‑rruḥ lqudus ay‑aytma, riġ a‑tissanm lḥqq fllasnt.

² swangmad‑d mamnk a‑tjlam ġ‑uwssan lli‑ġ‑ur‑ta‑tssinm rbbi, yili gigun ma‑kʷn‑itawin a‑ttɛbadm laṣnam iẓnẓam.

³ ġayan a‑f‑riġ a‑tissanm mayad: yan isawaln s‑tḥkimt n‑rruḥ n‑rbbi ur‑ra‑yini «tlla nnɛlt f‑yasuɛ,» ula iẓḍar kra n‑yan a‑ittini «yasuɛ iga sidi» abla s‑tḥkimt n‑rruḥ lqudus.

⁴ ggutnt‑twafkiw, walaynni yan‑rruḥ a‑illan.

⁵ ggutnt‑twuriw, walaynni yan siditnnġ a‑illan.

⁶ ggutn iskkirn, walaynni yan‑rbbi a‑tn‑iskarn ġ‑kraygatt yan.

⁷ ar‑yakka i‑kud yan taḥkimt n‑rruḥ lqudus a‑srs‑itɛawan wiyyaḍ.

⁸ yan, ar‑as‑yakka awal l‑lfhmt s‑rruḥ lqudus. yan yaḍni, ar‑as‑yakka awal n‑twassna s‑rruḥ lqudus.

⁹ yan yaḍni, ar‑as‑yakka s‑rruḥ‑ad a‑bahra‑yamn. yan yaḍni, ar‑as‑yakka s‑rruḥ‑ad a‑ijjujji imuḍan.

¹⁰ ar‑yakka i‑yan a‑iskar lmɛjizat, ar‑yakka i‑yan a‑ittini s‑mad‑as‑imala rbbi, ar‑yakka i‑yan a‑itakʷz ma‑igan win rruḥ lqudus zġ‑win larwaḥ yaḍni. ar‑yakka i‑yan a‑isawal s‑iwaliwn iġribn, ar‑yakka i‑yan a‑yissan lmɛna n‑iwaliwn iġribn.

¹¹ walaynni kullu mayad, ar‑t‑iskar rruḥ lqudus lli‑igan yan, ar‑yakka i‑kud yan ġmklli ittiri ntta.

igzman n‑ddat

¹² kraygatt ddat teṭṭaf igzman ggutnin. ġmkad a‑iga lmasiḥ ula ntta. wah̬h̬a yat‑ddat ad‑dars‑illan, ggutn igzman‑ns.

¹³ ašku nddm kullwaġ s‑udum n‑yan‑rruḥ baš a‑nwrri ng yat‑ddat, ng‑iyt ayt‑yudaya nġd ayt‑tmizar yaḍni, ng‑iyt ismgan nġd win ih̬f‑nnġ. kullwaġ zġ‑yan‑rruḥ a‑zġ‑aġ‑isswa.

¹⁴ ašku ddat teṭṭaf igzman ggutnin. urd ġir yan‑ugzzum a‑tga.

¹⁵ iġ‑inna‑uḍar «ur‑giġ zġ‑ddat ašku ur‑giġ afus,» izd s‑ṣṣaḥt urd ddat a‑zġ‑iga?

¹⁶ iġ‑inna‑umẓẓuġ «ur‑giġ zġ‑ddat ašku ur‑giġ tiṭ,» izd s‑ṣṣaḥt urd ddat a‑zġ‑iga?

¹⁷ mrad is‑tga ddat kullu tiṭ, ma‑s‑ra‑tsflid? mrad is‑tga ddat kullu amẓẓuġ, ma‑s‑ra‑tkḍḍu?

¹⁸ walaynni iskr rbbi igzman n‑ddat, kraygatt agzzum ġmklli‑t‑ira ntta.

¹⁹ mrad is‑kullu‑nga yan‑ugzzum, ur‑ra‑tili ddat.

²⁰ walaynni nssn is‑ggutn igzman, munn kullutn ġ‑yat‑ddat.

²¹ ur‑ra‑tiẓḍar tiṭ a‑tini i‑ufus «ur‑k‑ḥtajjaġ,» ula‑ra‑yiẓḍar‑ugayyu a‑yini i‑iḍarn «ur‑kʷn‑ḥtajjaġ.»

²² ur‑a‑ttinin ġmkan ašku igzman lli‑f‑nġal is‑ḍɛfn, nḥtajja‑tn bahra.

²³ ula igzman lli‑ntḥgar, ar‑tt‑gisn‑ntawi s‑uggʷar. ula igzman lli‑aġ‑ššḥššamnin, ar‑asn‑nsslsa ibrdan lli‑ur‑d‑iqqann a‑tn‑nssls i‑igzman yaḍni.

²⁴ ġmkad a‑f‑issngadda rbbi ddat, ifk luqr s‑uggʷar i‑igzman lli‑f‑nġal ur‑gin yat.

²⁵ iskr ġmkad baš ad‑kullu‑tmɛawann igzman n‑ddat, a‑ur‑sar‑bḍun i‑ngratsn.

²⁶ iġ‑illa yan‑ugzzum yuḍn, rad‑aḍnn igzman kullutn. iġ‑ityawuqqar yan‑ugzzum, rad‑frḥn igzman kullutn.

²⁷ kunni tgam ddat l‑lmasiḥ, d‑kraygatt yan gigun iga agzzum ġ‑ddat‑ns.

²⁸ ġmkad a‑iskr rbbi ġ‑igzman n‑umnaggar: imzwura gan irqqasn. wis sin gan ġwilli ittinin s‑mad‑asn‑imala rbbi. wis kraḍ gan imslmdn. ilin‑daġ ġwilli skarnin lmɛjizat, d‑willi dar tawafka ad‑jjujjin imuḍan, d‑willi tɛawannin d‑willi tguwwadnin d‑willi sawalnin s‑iwaliwn iġribn.

²⁹ walaynni izd irqqasn ad‑gan kullutn? is‑gan kullutn wid ittinin kra‑yasn‑imala rbbi? is‑gan kullutn imslmdn? is‑gan kullutn wid skarnin lmɛjizat?

³⁰ is‑gan kullutn wid jjujjinin imuḍan? is‑gan kullutn wid sawalnin s‑iwaliwn iġribn? is‑gan kullutn wid ssbayyannin lmɛni n‑iwaliwn iġribn?

³¹ uhu, walaynni iriyat bahra ad‑awn‑ilint‑twafkiw timzwura. imma ġilad rad‑awn‑mlġ yan‑uġaras lli‑yufn kullu mayan.