1 bṭrus 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tawrut n‑rbbi

¹ rad‑ḍalbġ imġarn ġ‑gratun, nkki‑ad igan amġar zund kunni, gġ inigi f‑urfufn l‑lmasiḥ, ṭṭafġ taġamt ġ‑lmjd lli‑ra‑d‑iban.

² ḍalbġ‑kʷn a‑tksm tawrut n‑rbbi lli‑ifl ġ‑gr ifassn‑nnun. tgablm‑tt urd s‑bzzez walaynni s‑lfrḥ ġmklli ira rbbi, urd baš a‑tamẓm kra i‑ih̬f‑nnun walaynni s‑nniyt iṣfan.

³ a‑ur‑tssimġurm ih̬f‑nnun f‑willi‑awn‑ifka rbbi, walaynni malat i‑tuwrut afulki lli‑s‑a‑tskarm baš ad‑skarn ula ntni ġmkan.

⁴ ġakud lliġ ra‑d‑yašk‑umksa imqqurn rad‑awn‑ifk ttaj l‑lmjd lli‑ur‑ra‑sar‑imdu.

⁵ ġmkan ula kunni a‑iɛyyaln, illa fllawn a‑tsflidm s‑imġarn‑nnun. bkisat kullukn s‑tbannka n‑ṣṣbr baš a‑tth̬damm i‑ngratun. ašku ityara: «rbbi ar‑itḍaḍḍa wanna issimġurn ih̬f‑ns, ar‑itbarak wanna iẓẓimẓayn ih̬f‑ns.»

⁶ knwat ġ‑ddu‑ufus itjhhdn n‑rbbi baš a‑kʷn‑yall ġ‑uzmz nna‑ira.

⁷ luḥat‑n kullu tiġufiwin‑nnun f‑rbbi ašku ar‑gigun‑ithlla.

⁸ amẓat ġ‑ih̬f‑nnun trarm lɛaql, ašku ar‑itlli‑unuwwaš‑nnun iblis zund izm, ar‑inddr ar‑isiggil s‑ma‑iqqʷay.

⁹ ḍaḍḍat iblis tzgam ġ‑liman‑nnun, tissanm izd aytmatun ġ‑ddunit kullutt ar‑zrayn ġ‑trfufnt zund kunni.

¹⁰ walaynni rbbi lli‑bdda‑iran ad‑aġ‑ibark, iġra‑yawn‑d a‑tkšmm s‑lmjd‑ns idumn ġ‑tamunt l‑lmasiḥ. tigira n‑ma‑trfufnm yan imikk, ra‑kʷn‑yawi s‑sslamt ikmmln issdus‑kʷn izzga‑kʷn issbidd‑kʷn f‑llsas iṣḥan.

¹¹ nttan a‑mi‑tlla lquwwa ġilad ula kullu mayd‑d‑iftan, amin.

¹² tabrat‑ad igzzuln uriġ‑awn‑tt‑in f‑ufus n‑silwanus lli‑dari‑igan gʷma ifulkin izgan. araġ‑tt‑in baš a‑kʷn‑zzɛamġ, mlġ‑awn izd ġmkad a‑tga lbaraka n‑rbbi s‑lḥqq. zgayat ġ‑lbaraka‑yad.

¹³ ar‑n‑fllawn‑tsllamn aytmatun ġ‑tmdint n‑babil, iẓli‑tn rbbi ġmklli‑kʷn‑iẓli kunni. ar‑n‑fllawn‑itsllam iwi marqus ula ntta.

¹⁴ nsallamat i‑ngratun s‑unsallam n‑tagʷmat. ad‑awn‑tili sslamt kullukn kunni lli‑igan win lmasiḥ.