1 bṭrus 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tudrt l‑ljdid

¹ mayan a‑f‑rad‑awn‑iniġ, lliġ irfufn lmasiḥ ġ‑ddat‑ns, illa fllawn a‑tbkism a‑trfufnm ula kunni. ašku wanna irfufnn ġ‑ddat‑ns ur‑sul‑a‑itlhu s‑ddnub.

² ur‑sul‑a‑izzray ussan‑ns ġ‑ma‑ittiri bnadm i‑ih̬f‑ns, walaynni ar‑izzray mad‑as‑iqaman ġ‑ddunit‑ad ġ‑ma‑irḍan rbbi.

³ ġayd izrin tkkam‑ttin ar‑tskarm ma‑iɛzzan dar ġwilli ur‑ssinnin rbbi, imma ġilad yuwda‑kʷn ġ‑ma‑yʷh̬šnn. han ntni ar‑tfsadn ar‑tšthun, ar‑ssnufuln ih̬f‑nsn s‑tissi, ar‑tmunun f‑lh̬ʷšant, ar‑skarn lɛib i‑ngratsn, ar‑tɛbadn ilahat n‑ddunit‑ad s‑tjlh̬it‑nsn.

⁴ ar‑gigun‑tɛjjabn ar‑kʷn‑rggmn, ašku ur‑a‑ttirim a‑didsn‑ttmunum f‑tillay‑nsn.

⁵ walaynni iqqan‑tn‑d lḥsab ġ‑dar ġwalli yujadn a‑yut lḥukm f‑willi ddrnin ula ġwilli mmutnin.

⁶ mayan a‑f‑idda lmasiḥ a‑yawi lh̬bar ifulkin i‑willi mmutnin ula ntni lli‑f‑iḍr lḥukm l‑lmut n‑ddat ġmklli iṭṭar f‑kullu mddn, baš ad‑wrrin ddrn s‑tudrt n‑rruḥ ġmklli iddr rbbi.

lḥnant ula lmɛawnt

⁷ hati yakmur‑d isiggʷra n‑kullu ma‑illan. rarat lɛaql tġwim ġ‑ih̬f‑nnun baš a‑ttẓallam ar‑tḍalabm rbbi.

⁸ walaynni taġawsa ihiyyan a‑stt‑igan, a‑ttḥnnum i‑ngratun, ašku lḥnant ar‑tssntal kigan d‑ddnub.

⁹ ssmrḥbat s‑ingratun ġ‑tgʷmma‑nnun bla‑da‑ttngmugm.

¹⁰ illa f‑kraygatt yan a‑iskar s‑twafka n‑rruḥ nna‑yas‑ifka rbbi, ar‑srs‑itɛawan wiyyaḍ s‑nniyt n‑uwl‑ns, baš a‑kullu‑ttmɛawanm i‑ngratun s‑lbarakat n‑rbbi lli‑ggutnin.

¹¹ wanna isawaln, illa fllas a‑isawal s‑mad‑as‑imala rbbi. wanna itɛawann, illa fllas a‑itɛawan wiyyaḍ s‑tẓḍḍart lli‑as‑yakka rbbi. ġmkad a‑s‑rad‑kullu‑alġn mddn rbbi f‑ma‑tskarm s‑ism n‑yasuɛ lmasiḥ. nttan a‑mi‑illa lmjd d‑lquwwa ġilad ula kullu mayd‑d‑iftan, amin.

tarfufnt f‑ssibt l‑lmasiḥ

¹² way‑aytma ɛzzanin, a‑ur‑ttɛjjabm ġ‑lɛafit n‑trfufnt lli‑kʷn‑itarmn, zund iġ‑awn‑ijra kra igan ljdid.

¹³ walaynni frḥat lliġ tkšmm d‑lmasiḥ ġ‑trfufnt, baš a‑tfrḥm s‑uggʷar ġakud lliġ ra‑d‑iban lmjd‑ns i‑kullu mddn.

¹⁴ imbarkin a‑tgam iġ‑a‑kʷn‑rggmn f‑ssibt n‑ma‑tgam win lmasiḥ, ašku igguz‑d fllawn rruḥ l‑lmjd lli‑igan rruḥ n‑rbbi.

¹⁵ walaynni ih̬ṣṣa a‑ur‑irfufn yan gigun f‑ssibt n‑ma‑inġa nġd yukʷr nġd iffuġ zġ‑lqanun nġd ikšm ma‑igan win wiyyaḍ.

¹⁶ walaynni iġ‑irfufn f‑ssibt n‑ma‑iga amasiḥi, illa fllas a‑ur‑iḥšm, walaynni a‑yalġ rbbi ašku mddn ar‑as‑tggan ism lli‑igan win lmasiḥ.

¹⁷ hati ġilad ilkm‑d‑uzmz lli‑ġ‑ra‑yut rbbi lḥukm, ra‑t‑yut zwar f‑ayt‑tgmmi‑ns. walaynni iġ‑srnnġ‑ibda nkkʷni, ma‑s‑ra‑tggʷru i‑willi agʷinin lh̬bar ifulkin n‑rbbi?

¹⁸ ġmklli ityaran: «iġ‑išqa a‑injm yan ifulkin ma‑ra‑ijru i‑yan irurn tiġurdin‑ns s‑rbbi ula yan isalan ddnub?»

¹⁹ mayad a‑f‑rad‑iniġ i‑kullu winna rfufnnin f‑ma‑ira rbbi: fkat ih̬fawn‑nnun ġ‑ufus n‑walli‑kʷn‑ih̬lqn lli‑bdda‑izgan ġ‑wawal‑ns, tzaydm ar‑tskarm afulki.