1 bṭrus 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

timġarin d‑irgazn

¹ ġmkan ula kunninti a‑timġarin, illa fllawnt a‑tsflidmt s‑irgazn‑nnunt. ašku iġ‑ur‑iri‑urgaz awal n‑rbbi, ra‑srs‑iwrri bla‑yas‑tnnit yat lliġ a‑itmnad mamnk a‑tskart,

² ašku ra‑iẓr mamnk a‑iġus‑uwl‑nnm s‑luqr iggutn.

³ walaynni a‑ur‑ig‑ufulki‑nnunt afulki n‑iẓri ġ‑dar mddn, zund tallamin n‑wazzar nġd ikʷlan n‑uwrġ nġd timlsa ġʷlanin.

⁴ walaynni ih̬ṣṣa a‑ig‑ufulki‑nnunt afulki intln n‑uwl ihnnan iɛmmrn s‑lḥnant. ur‑sar‑iḍr‑ufulki‑ad, iɛzzu bahra dar rbbi.

⁵ ašku ġmkan a‑sttin kkant‑tmġarin timumnin lli‑trjunin ġ‑rbbi ġayd izrin. ġmkan a‑s‑a‑ssfulkint ih̬fawn‑nsnt ar‑sflidnt s‑irgazn‑nsnt.

⁶ ġmkan‑nnit a‑tga sara, ar‑tsflid s‑ibrahim ar‑as‑ttini «sidi.» ula kunninti ġilad, istis n‑sara a‑tgamt, iġ‑a‑tskarmt afulki bla‑da‑ttiksaḍmt yat.

⁷ ġmkan ula kunni a‑irgazn, illa fllawn a‑tswingimm ġ‑tmġarin‑nnun, tzdġm didsnt bla‑da‑tettum is‑ur‑bahra‑dusnt zund kunni, ar‑tnti‑ttuqqarm ašku wrtnt ula ntnti didun lbaraka n‑tudrt idumn. skarat ġmkan baš a‑ur‑darun‑yili ma‑itḥṣarn tiẓulla‑nnun i‑rbbi.

tarfufnt f‑ssibt n‑ufulki

⁸ imma ġilad rad‑awn‑iniġ, a‑kullu‑tgm yan ġ‑ma‑tswingimm ula ma‑s‑a‑tssḥssum, ar‑ttḥubbum i‑ngratun s‑tayri n‑aytmatn, ar‑di‑ttadrm i‑ih̬f‑nnun ar‑ttḥnnum i‑ngratun.

⁹ iġ‑illa mad‑awn‑iskrn kra yʷh̬šnn, ad‑as‑ur‑trarm s‑lh̬ʷšant. iġ‑illa ma‑kʷn‑irgmn, ad‑as‑ur‑trarm s‑trggam, walaynni iniyat‑as: «a‑k‑ibark rbbi.» ašku iġra‑yawn‑d rbbi ad‑awn‑tili lbaraka.

¹⁰ ityara: «wanna iran a‑izzri tudrt‑ns s‑lfrḥ iẓr ussan l‑lh̬ir, illa fllas a‑ikkis ma‑yʷh̬šnn zġ‑ils‑ns, ikkis tikrkas zġ‑imi‑ns.

¹¹ illa fllas a‑ifl kullu kra igan lh̬ʷšant ar‑iskar afulki, ar‑isiggil s‑sslamt ar‑gis‑itazzal.

¹² ašku siditnnġ ar‑itgabal ġwilli‑f‑irḍa, ar‑isflid i‑mad‑as‑ttinin. imma ġwilli skarnin ma‑yʷh̬šnn, ar‑tn‑itḍaḍḍa.»

¹³ manwa ra‑kʷn‑issrfufn iġ‑tram a‑tskarm afulki?

¹⁴ walaynni iġ‑idda ard trfufnm f‑ssibt l‑lḥqq, hati imbarkin a‑tgam. a‑ur‑ttiksaḍm yan ula‑da‑ttasim taġuft,

¹⁵ walaynni gat lmasiḥ d‑sidis n‑uwl‑nnun, tujadm ġ‑kraygatt tasaɛt a‑di‑trarm awal i‑kullu wanna‑kʷn‑isqsan f‑rrja lli‑gigun‑illan.

¹⁶ walaynni sawlat dids s‑ṣṣbr d‑luqr ula s‑uwl iġusn zġ‑kullu kra igan lɛib, baš ad‑tḥšamn inuwwašn‑nnun iġ‑a‑gigun‑rggmn f‑ufulki lli‑tskarm s‑ism l‑lmasiḥ.

¹⁷ ašku yuf‑awn a‑trfufnm iġ‑ira rbbi f‑ssibt n‑ufulki lli‑tskarm, ula trfufnm f‑ssibt n‑kra tskrm yʷh̬šn.

¹⁸ ašku lmasiḥ, yat‑twal a‑immut f‑ssibt n‑ddnub, immt ġwalli ifulkin f‑ssibt n‑willi ʷh̬šnnin, baš ad‑aġ‑d‑irar i‑rbbi. nġan‑t mddn ġ‑ddat‑ns, issddr‑t rbbi ġ‑rruḥ‑ns.

¹⁹ iddu ilmma yawi lh̬bar i‑larwaḥ tyawkrrafnin,

²⁰ a‑tn‑igan d‑willi rurnin tiġurdin‑nsn s‑rbbi ġ‑uwssan lli‑ġ‑didsn‑iṣbr bahra. ġ‑uwssan‑an a‑ġ‑iskr nuḥ anaw, njmn gis kra n‑mddn drusnin zġ‑waman, tam mddn ad‑gan.

²¹ maylli ijran ġ‑uwssan‑an irwas i‑udum ġ‑waman lli‑s‑tnjmm kunni, urd s‑irid n‑irkan n‑ddat‑nnun walaynni iga tamatart n‑is‑iwrri iġus‑uwl‑nnun, tfkm ih̬f‑nnun i‑rbbi, tnjmm f‑ssibt n‑ma‑d‑inkr yasuɛ lmasiḥ zġ‑lmut.

²² nttan a‑ikšmn ilmma s‑ignna, iskiws ġilad f‑ufasi n‑rbbi, ilin kullu lmalayka d‑ssulṭat d‑lquwwat n‑ignwan ġ‑ddu‑ufus‑ns.