1 bṭrus 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

aẓru iddrn

¹ f‑mayad a‑f‑rad‑awn‑iniġ, luḥat‑n s‑kullu ma‑igan tanuwwašt ula tikrkas. a‑ur‑tskarm ġ‑lgddam n‑mddn ma‑ur‑tgim. ad‑awn‑ur‑ṭiyyr f‑wiyyaḍ ṭṭafnin kra tram i‑ih̬f‑nnun, ula‑da‑trggmm ġ‑yan.

² walaynni gat zund tarwa bḥra lulnin, tirim a‑tsum akkʷfay n‑wawal iġusn, baš a‑srs‑timġurm tnjmm ajnjm ikmmln.

³ ašku «tmḍim afulki n‑siditnnġ.»

⁴ akmurad‑d ġilad s‑walli igan aẓru iddrn. luḥn‑t‑in mddn, walaynni iẓli‑t rbbi, iɛzzu dars.

⁵ fkat ih̬f‑nnun i‑lmasiḥ zund iẓran ddrnin, baš a‑srun‑ibnnu yat‑tgmmi n‑rruḥ, a‑n‑gis‑tsrasm ġ‑lgddam n‑rbbi tiwafkiw n‑rruḥ lli‑s‑ra‑itrḍu ašku ar‑as‑tnti‑takkam s‑ism n‑yasuɛ lmasiḥ.

⁶ ġmklli ityaran, inna rbbi: «hati ra‑n‑zzugzġ ġ‑gr mddn‑inu yan‑uẓru imqqurn igan win‑uġẓu. ẓliġ‑t iɛzzu dari. wanna srs yumnn ur‑sar‑ti‑tʷgraẓ.»

⁷ mayan a‑f‑darun‑iɛzza kunni lli‑srs‑yumnn. walaynni ityara‑daġ f‑willi ur‑rinin ad‑amnn, inna rbbi fllasn: «aẓru lli‑n‑luḥn ibnnayn, nttan a‑iwrrin iga ih̬f n‑uġẓu.»

⁸ ityara‑daġ: «aẓru‑ad ra‑ig tabayḍḍrt i‑mddn, ig ifir lli‑ra‑tn‑issknuki.» ntni ar‑ṭṭarn ġilad ašku agʷin ad‑skarn s‑wawal n‑rbbi. ġmkan a‑tn‑d‑iqqann.

mddn tyawẓlaynin n‑rbbi

⁹ imma kunni, tgam mddn tyawẓlaynin, tgm ayt‑tgldit n‑rbbi, ar‑n‑tsrasm ġ‑lgddam‑ns tiwafkiw lli‑s‑a‑itrḍu. tgm ayt‑rbbi, iẓli‑kʷn a‑tgm wins, baš a‑ttawim lh̬bar i‑mddn f‑kullu ma‑iskr ġwalli‑awn‑d‑iġran zġ‑tillas s‑tifawt l‑lmjd‑ns.

¹⁰ ġayd izrin ur‑tgim yat, imma ġilad ayt‑rbbi a‑tgam. ġayd izrin ur‑tssinm rrḥmt n‑rbbi, imma ġilad rrḥmt‑ns a‑fllawn‑illan.

ih̬ddamn n‑rbbi

¹¹ way‑aytma ɛzzanin, ḍalbġ‑kʷn ġilad a‑tgm ih̬f‑nnun d‑iġribn d‑ibrraniyn ġ‑ddunit‑ad, tluḥm s‑ma‑ttiri ddat n‑bnadm, ašku tiġawsiwin n‑ddat ar‑tmmaġnt d‑uwl iṣfan.

¹² skarat afulki ġ‑gr‑willi ur‑ssinnin rbbi. wah̬h̬a iġ‑a‑gigun‑rggmn rad‑ẓrn is‑ifulki kullu ma‑tskarm, inin ilmma izd rbbi ad‑dar lḥqq ġ‑wass lli‑ġ‑ra‑d‑yašk a‑yut lḥukm.

¹³ sflidat f‑ssibt n‑siditnnġ s‑kraygatt ssulṭa itḥkamn ġ‑dar mddn. sflidat s‑umzwaru lli‑igan agllid,

¹⁴ ula s‑willi‑d‑itazn ad‑utn lɛqubit f‑willi skarnin ma‑yʷh̬šnn, alġn ġwilli skarnin afulki.

¹⁵ ašku rbbi ira gigun a‑bdda‑tskarm ma‑ifulkin, baš a‑ur‑afn mddn fssusnin ssibt ma‑s‑a‑gigun‑sawaln s‑tnuwwašt‑nsn ih̬wan.

¹⁶ zzriyat ussan‑nnun mknna tram, walaynni a‑ur‑ttinim d‑ih̬f‑nnun: «ha‑yaġ nẓḍar a‑nskr mknna nra. nkrat a‑nskr ma‑yʷh̬šnn.» zzriyat ussan‑nnun ġmklli‑d‑iqqann ih̬ddamn n‑rbbi.

¹⁷ uqqrat kullu mddn, ar‑ttirim aytmatun ġ‑lmasiḥ. tawiyat‑stt bahra ġ‑rbbi, ar‑ttuqqarm agllid.

ih̬ddamn d‑id‑siditsn

¹⁸ wa‑ih̬ddamn, sflidat s‑id‑siditun ar‑tn‑bdda‑ttuqqarm. urd ġir ġwilli rh̬anin šwanin walaynni sflidat ula s‑willi šqanin.

¹⁹ ašku rbbi ra‑ibark yan irfufnn iṣbr i‑lbaḍl f‑ssibt n‑ma‑s‑ira a‑irḍu rbbi.

²⁰ walaynni mal‑lfaytt darun illan iġ‑tskrm ma‑yʷh̬šnn tṣbrm i‑ukuray lli‑tššam f‑ssibt l‑lh̬ʷšant‑nnun? walaynni iġ‑tskrm afulki trfufnm tṣbrm, ra‑kʷn‑ibark rbbi.

arfufn l‑lmasiḥ

²¹ rbbi iġra‑yawn‑d a‑tzzraym mayad, ašku lmasiḥ irfufn ula ntta f‑ssibt‑nnun, iml‑awn ma‑ifulkin baš a‑tḍfurm latrt‑ns.

²² ityara fllas: «ur‑akkʷ‑iskir kra n‑ddnb. ur‑jju‑kkint‑tkrkas imi‑ns.»

²³ lliġ‑t‑rgmn, ur‑asn‑d‑irur s‑trggam. lliġ‑t‑ssrfufnn ur‑tn‑ihddid, walaynni itɛnna s‑rbbi lli‑itḥkamn s‑lḥqq.

²⁴ nttan a‑yusin ddnub‑nnġ ġ‑ddat‑ns f‑uggjdi, baš a‑nmmt i‑ddnub nddr i‑ma‑irḍan rbbi. s‑tiggas‑ns a‑s‑tjjim.

²⁵ ġayd izrin tjlam zund ulli, imma ġilad twrrim‑d s‑dar‑umksa lli‑itgabaln ulawn‑nnun.