1 bṭrus 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bṭrus arqqas n‑yasuɛ lmasiḥ, i‑imẓlayn n‑rbbi lli‑akutnin, gn iġribn ġ‑tmizar n‑buntus ula galaṭiyya ula kabadukiyya ula asiyya ula bitiniyya.

² iẓli‑kʷn rbbi babatnnġ s‑tḥkimt n‑rruḥ lqudus ġmklli iqṣad zġ‑isizwar, baš a‑tskarm s‑iwaliwn n‑yasuɛ lmasiḥ tġusm s‑idammn‑ns. ad‑awn‑tigat lbaraka d‑sslamt.

rrja iddrn

³ ar‑bahra‑ntalġ rbbi babas n‑siditnnġ yasuɛ lmasiḥ, ašku s‑rrḥmt‑ns iggutn a‑s‑aġ‑ifka a‑nlal talalit n‑tudrt l‑ljdid. iɛmmr‑aġ s‑rrja iddrn lliġ‑d‑issnkr yasuɛ lmasiḥ zġ‑lmut.

⁴ ifk‑aġ yal‑lwrt lli‑ur‑ra‑ifnu ula ra‑ih̬sr ula ra‑imdu, iḥḍa‑yawn‑t ġ‑ignna.

⁵ s‑tḥkimt‑ns itjhhdn a‑s‑a‑kʷn‑issntal kunni lli‑srs‑umnnin, ard tnjmm s‑ujnjm ikmmln lli‑rad‑awn‑yili ġ‑isiggʷra n‑ddunit.

⁶ frḥat s‑kullu mayad, wah̬h̬a iġ‑d‑iqqan ad‑awn‑ṭiyyr yat‑tasaɛt f‑ssibt n‑tnukmut ula tassast lli‑kʷn‑itarmn.

⁷ izri fllawn mayan baš a‑tissanm is‑iṣḥa liman‑nnun. ašku iɛzza liman‑nnun bahra, uggʷar n‑uwrġ lli‑ifnnun wah̬h̬a‑da‑itṣfu s‑lɛafit. ašku ġmkan a‑s‑ra‑kʷn‑yalġ rbbi issattuy‑kʷn issimġur‑kʷn ġakud lliġ ra‑d‑yašk yasuɛ lmasiḥ ibayyn.

⁸ nttan, wah̬h̬a ur‑jju‑ti‑tẓrim, iɛzza darun bahra. wah̬h̬a ur‑a‑ti‑ttmnadm ġilad, tumnm srs. ar‑srs‑ttfraḥm s‑lfrḥ iggutn aylliġ ur‑akkʷ‑tufim iwaliwn mad‑as‑ttinim.

⁹ ašku rbbi ifka‑yawn ġilad maylli tram ġ‑liman‑nnun, ifk‑awn ajnjm n‑ih̬f‑nnun.

¹⁰ hati lanbiya lli‑sawlnin ġayd izrin f‑lbaraka lli‑rad‑awn‑yili, ar‑swingimn ar‑sqsan f‑ujnjm‑ad.

¹¹ ar‑sqsan man azmz a‑ġ‑ra‑yili ula mamnk a‑ra‑ig‑uzmz lli‑f‑a‑ittini rruḥ l‑lmasiḥ lli‑gisn‑illan lliġ a‑yasn‑imala arfufn lli‑ġ‑ra‑izri lmasiḥ ula lmjd lli‑rad‑as‑yili tigira.

¹² walaynni issbayyn‑asn‑d rbbi is‑urd f‑ssibt n‑ih̬f‑nsn a‑f‑a‑sawaln f‑tġawsiwin‑ad walaynni f‑ssibt‑nnun. imma ġilad tsfldm f‑kullu mayad f‑imi n‑willi‑awn‑in‑iwinin lh̬bar ifulkin, ar‑darun‑tbrraḥn s‑tḥkimt n‑rruḥ lqudus lli‑d‑ityazann zġ‑ignna. imma tiġawsiwin‑ad, ula lmalayka ar‑bahra‑ttirin ad‑issann mamnk ad‑gant.

uġus n‑uwl

¹³ f‑mayan a‑f‑rad‑awn‑iniġ, bkisat ih̬f‑nnun trarm lɛaql, tzgam bahra ġ‑rrja lli‑s‑a‑ttrjum f‑lbaraka lli‑rad‑awn‑yili ġakud lliġ ra‑d‑yašk yasuɛ lmasiḥ ibayyn.

¹⁴ skarat s‑wawal n‑rbbi, ġmklli skarn tarwa s‑wawal n‑ayt‑darsn. a‑ur‑sul‑ttlhum s‑ġaylli sttin tkkam ar‑ttirim i‑ih̬f‑nnun lliġ ur‑ta‑tssinm lḥqq.

¹⁵ walaynni skarat kullu s‑uwl iġusn, ġmklli iġus rbbi lli‑awn‑d‑iġran.

¹⁶ ašku ityara inna rbbi: «illa fllawn a‑tġusm, ašku giġ nkki wad iġusn.»

¹⁷ tmyarm kunni a‑ttinim: «wa‑rbbi babatnnġ,» walaynni a‑ur‑tettum izd nttan a‑itraran i‑kraygatt yan f‑ma‑iskar, ur‑a‑itmnad udmawn. awiyat‑stt gis bahra kullu ussan‑ad tzzraym zund iġribn ġ‑ddunit.

¹⁸ ašku tssnm is‑kʷn‑d‑ifra zġ‑tnbaḍin h̬wanin lli‑awn‑d‑fln imzwura‑nnun. ašku urd s‑ma‑ifnnun zund nnuqrt nġd urġ a‑s‑kʷn‑d‑ifra,

¹⁹ walaynni s‑idammn ɛzzanin l‑lmasiḥ zund idammn n‑yan‑ulqqaġ iġusn bla lɛib.

²⁰ mayad, iqṣad‑t srs rbbi lliġ ur‑ta‑ih̬lq yat, yazn‑t‑id ilmma ibayyn‑d f‑ssibt‑nnun ġ‑uwssan‑ad ggʷranin.

²¹ hati f‑ssibt l‑lmasiḥ a‑s‑tumnm s‑rbbi lli‑t‑id‑issnkrn zġ‑lmut issattuy‑t s‑lmjd. d‑ġmkad a‑s‑izga liman‑nnun d‑rrja‑nnun ġ‑rbbi.

²² hati tssġusm ulawn‑nnun lliġ tumẓm aġaras l‑lḥqq, ar‑ttḥubbum aytmatun s‑nniyt iṣfan. imma ġilad, tḥnnwat i‑ngratun zġ‑ttmi n‑uwl‑nnun.

²³ ašku tlulm talalit n‑tudrt l‑ljdid, urd s‑wamud lli‑ifnnun walaynni s‑wamud lli‑ur‑ra‑ifnu, a‑t‑igan d‑wawal n‑rbbi, ig awal iddrn iqama‑bdda.

²⁴ ašku ityara: «bnadm iga zund tuga, tg lhibt‑ns zund ajddig n‑tuga. tsllaw tuga yasus‑ujddig,

²⁵ imma awal n‑siditnnġ izga‑bdda.» awal‑ad iga lh̬bar ifulkin lli‑mi‑tsfldm.