Sélimɛ 49 - Sénoufo Nyarafolo

Yakuba 'diba kpíʔile wi jaala mɛ́ bèle

¹ A Yakuba 'wi jaala yeri bèle nɛ̀ gbuʔulo nɛ́ pe yɛ: «Ye‑ gbuʔulo mi táanni mi‑ sí mbànʔa kele juu gèle bè tìɛ yeli nɛ̄, gàli ke bé ba yeli taa gèle.

² Ye‑ sìʔɛrɛ ye kpɔni mi nɛ̄, yeli Yakuba jaala bèle, yéri lúru. Yeri Isirayɛli siɛnrɛ lúru dè, yeli tuu wè.

³ Wurubɛni, muɔ wī mi jaapeliwe wè, mi ŋɔri dè, mi yasɛnbelige gè gàa mi 'taa mi nàyelige lɛ̀lɛ nī lè. Muɔ 'tóri muɔ cɔninɔ nɛ̄ bèle nɛ́ kpuʔɔrɔ ní, nɛ́ ní fànʔa ní.

⁴ Muɔ nɛ fílagi bɛ̀ luʔɔ tíɛlɛ, muɔ sì ní muɔ yéridiʔɛ pélige taa gèʔ, nɛ́ ki cɛ́n muɔ nyɛ́nì muɔ tuu cuɔ nyɔ́gɔ wè saʔa nī nɛ̀ muɔ tuu yasinɛgɛ cúʔɔ gè. ʔé ! Wi nyɛ́nì jíin baa  !

⁵ Simɛyɔ nɛ́ Levii ní wè, peli yē wàa nɛ́ wi luɔ, peli funyɔ yiī nuyɔ. Peli yakpuɔnyɔ yiī fungbɛnyɛ ŋuʔɔnɔ !

⁶ Mi wè nɛ caa bè jíin pe gboli nī lèʔ; mi fungo kiì yɛli ki‑ pínɛ nɛ́ pe níʔ. Nɛ́ ki cɛ́n pe fungbɛnyɛ nī yè, a pe 'nàguɔlɔ kpúu; a pe 'ki kɔ̀rirɔ nɛ̀ nɛ̀piʔɛlɛ kapɛnyɛ celile yè.

⁷ Pe funyɛriyɛ nyáà feliye yè, mi 'dɛ́ngɛ taʔa wè yi nɛ̄, nɛ́ ki cɛ́n yi nyɛ́nì pii nɛ̀ cáanri ! Pe funyɛrigboliyo nyáà feliye yè, mi dɛ́ngɛ taʔa wè yi nɛ̄, nɛ́ ki cɛ́n yi 'núʔɔ nɛ̀ cáanri ! M'bé pe cɛrigɛ Yakuba narigɛ nī gè, bé ní pe yɛ́ligɛ màʔa Isirayɛli kùlo nī lè.

⁸ Zuda muɔ wè, muɔ wī muɔ cɔninɔ pe béri kpóri. Muɔ kɔli ki béri muɔ leguulo kɔ́ri bèle kànyaa mɛ́ gè. Muɔ tuu jaala, pe béri tun de cúbulo muɔ yiʔɛ mɛ́ gè.

⁹ ʔaan, Zuda yē bɛ̀ jàriyɛliwɛ tíɛlɛ. Mi jaa, muɔ nyɛ́nì kɛ́ dèzuʔu nɛ̄ nɛ̀ sɛ́nì kpúu; muɔ nyɛ́nì káguro cáan dè nɛ̀ sínɛ bɛ̀ jàri tíɛlɛ, bɛ̀ jàrinuu tíɛlɛ. Ŋáa wi bé gbɛ̀ wi yɛ̀gɛ ?

¹⁰ Fànʔa kàgbiile niǐ ga tíi yiri Zuda narigɛ nī gèʔ, nɛ̀ pínɛ fànʔa sápile niǐ ga tíi yiri wi kiyɛ nī yèʔ, fúɔ bè taa ni kàfɔli wi ba pɛn, wire ŋáà mɛ́ siɛnfeliye yi béri lúru wè.

¹¹ Wi béri wi sèfɛnnɛ puu lè ɛrɛzɛn tìrige nɛ̄ gè, béri sèfɛnbuɔ puu wè ɛrɛzɛn fétirige nɛ̄ gè gàa gī cɛ̀ngɛ gè. Wi béri wi buruyo jíri yè diviɛn nī wè, béri wi burugbuʔɔ jíri gè ɛrɛzɛn luʔɔ nī gè.

¹² Ɛrɛzɛn diviɛn wi bé wi nyapigele nyɛ́nigɛ gèle, nɛ̀yirimɛ pire bé sí wi gànʔana fílige gèle.

¹³ Zabulɔn wire bé puu tɛ́niwɛ kuʔɔjii gògogo nɛ̄ gè, luʔɔ kɔ́rikpoliyo yi béri báan wi mɛ́ de yèrí kuʔɔjii gògogo nɛ̄ gè. Wi kùlo láʔala ni bé líɛ bè sa nɔ̀ Siidɔn tɛ́nimɛ táanni bè.

¹⁴ Izakari wire yē sèfɛnnɛ tíɛlɛ nàa nī ŋɔri ní dè, nɛ̀ ki yaʔa wiī sínɛwɛ sìnbaduuyo siin sunʔɔmɔ ní.

¹⁵ A wi 'ki nyaa ŋɔ́daala lire yē pɔ́rilɔ, nɛ́ míɛni kùlo ni yē tàanna. Kire nɛ̄ wi nɛ̂ wi fíkɛnnyugo tíʔɛ gè nɛ̀ tugoro tugo dè, nɛ̀ kò sùkulowo nɛ fànʔa baara kúu.

¹⁶ Dan béri wi siɛnnɛ pe kàyuʔu nyu gè, bɛ̀ Isirayɛli saʔa tùlugo káà tíɛlɛ.

¹⁷ Dan wire yē bɛ̀ wɔ̀bugɔ tíɛlɛ gàa gī sínɛgɛ gè koligo nɛ̄ gè, wàfiraso tíɛlɛ ŋàa wiī kobile nɛ̄ lè, níɛ sunʔɔ nɔgi gè tɔligɔ nɛ̄ gè, kire ga buu suɔnfɛwɛ wi‑ láʔa tuu bè cɛ̀li.

¹⁸ ʔé Yewe, suɔlɔ náà muɔ nɛ kanʔa lè, lire nɛ̄ mi 'mi sɔ̀ngirɔ taʔa dè.

¹⁹ Gadi wire wè, siɛngbɛninɛ pe béri wi caa de ŋɔ́gi; wi béri tari pe nɛ̄ pe kàduʔu mɛ́ gè bè pe jáa.

²⁰ Azɛri wire nɛ yaliire fáli nɛ taʔa; wi béri sitaanra sori kùlofɔlilɔ mɛ́ bèle.

²¹ Nafitali wire yē bɛ̀ sùɔ tíɛlɛ ŋàa wi yē wìimɛ nɛ yogi nɛ mári wè; wi béri sàpigele sii cɛ̀ngɛlɛ.

²² Tiige gáà ki sɛngi gè, kire gī Yusufu wè. Pe 'ki cɔ́ri lawiile táanni, a ki lère ti 'yɛ́ligɛ nɛ̀ tuu gungo nɛ̄ gè.

²³ Sandaliyɛ fɔ́lilɔ pe 'wi caa nɛ̀ ŋɔ́, nɛ̀ ŋaaya ŋɔ yè wi nɛ̄, nɛ́ nyabiɛnnɛ kpíʔile nɛ̀ cáan nɛ́ wi ní.

²⁴ Kire nɛ́ ki mìɛni wi sandali kiì puu nɛ fúnʔ, a wi kiyɛ yi 'kò lìriye Yakuba Kulocɛliɛ Ŋɔrifɔli wi barigɛ nī, wire ŋáà wī Nàʔavɔli wè nɛ́ ní Kàdɛnigbaala náà nɛ̄ Isirayɛli tɛ́ni lè,

²⁵ muɔ tuu Yakuba wire Kulocɛliɛ kɛnmɛ nɛ̄, wire ŋáà wi muɔ suu wè, Ŋɔri Ti Mìɛni Kulocɛliɛ wire kɛnmɛ nɛ̄, wire ŋáà wi diba tari wè muɔ nɛ̄. Wi‑ diba taʔa wè muɔ nɛ̄ wire ŋáà wi kɔ́ngi nyìʔɛnɛ nī lè ! Wi‑ diba taʔa wè muɔ nɛ̄ wire ŋáà wi kɔ́ngi lakpuʔɔ sícuugo nī gè, gàa gī sínɛgɛ dàala táanmɛ gè ! Wi‑ yírile tɛ́ni lè muɔ nɛ̄, bè muɔ cesiʔi múgu gè !

²⁶ Diba ŋáà muɔ tuu wiī nɛ kpínʔini muɔ mɛ́ wè, wi nyɛ́nì tóri nyagurusuɔnyɔ nɛ̄ nɛ́ nyagurubiliʔɛlɛ yacɛ̀nrɛ nɛ̄ dè. Ki diba wi‑ puu Yusufu nyùgo nɛ̄ gè nɛ́ wi gbɛlɛ nɛ̄ lè, wire ŋáà wī wi lɔbilɔ kàfɔli wè !

²⁷ Bɛnzamɛ yē bɛ̀ sàndiɛn tanʔaniwɛ tíɛlɛ nɛ wi kaara káa dè sínbinimɛ táanni bè; cɛnguʔɔ táanni gè, dàa pe 'taa dè, wi nɛ̂ wi liɛlɛ tíla lè.»

²⁸ Bàli pe mìɛni kiɛ nɛ́ siin yē saaya tùluyo, Isirayɛli nī wè. Siɛnrɛ dáà tire tuufɔli wi 'juu pe mɛ́ nyasiɛnsɛnrɛ dè. Wi 'diba kpíʔile we pe mìɛni nigbe nigbe mɛ́ nɛ̀ yɛli nɛ́ pe kɛnmɛ ní bè.

Yakuba wi 'kùu

²⁹ A Yakuba wi 'ki juu nɛ̀ gbɛ̀ngɛ pe mɛ́, nɛ́ jo: «M'bé kɛ́ mi tobilo kúrugu bèle. Ye‑ sa mi tɔ́n mi tobilo táanni bèle nyaguruwiʔi nī gè, gàa gī baa Efurɔn siʔi nī gè, Etiyé wuu wè,

³⁰ nyaguruwiʔi gáà gī baa Makpela siʔi nī gè, baa Mambire tiʔɛ táanni gè, Kanaa kùlo nī lè. Kire siʔi kire Birayima 'suɔ Efurɔn mɛ́ wè, Eti wuu wè, ki‑ kò wire siɛnnɛ tɔ́ndiʔɛ gè.

³¹ Kire tiʔɛ kire nī pe 'Birayima nɛ́ wi cuɔ Sara tɔ́n wè. Kire tiʔɛ kire míɛni nī pe 'Siaga nɛ́ wi cuɔ Erebɛka tɔ́n wè. Kire tiʔɛ kire míɛni nī mi nyɛ́nì mi cuɔ Leya tɔ́n wè.

³² Siʔi gáà gī baa gè, nɛ́ nyaguruwiʔi ní gè, Birayima nyɛ́nì ki suɔ wī, Eti siɛnnɛ mɛ́ bèle.»

³³ Bà Yakuba 'tunduro dáà juu dè nɛ̀ kúɔ dè nɛ́ wi jaala ní bèle, a wi 'wi tɔliyɔ yɛ̀gɛ yè nɛ̀ taʔa wi yasinɛgɛ nɛ̄ gè, nɛ́ sínɛ nɛ̀ kùu nɛ̀ kɛ́ wi tuuliɛyɛ kúrugu yè.