Ŋúnuyɔ 99 - Sénoufo Nyarafolo

Kùlofɔli Yewe wiī tiɛlɛ fùn

¹ Yewe wiī Kùlofɔli! Kùlogolo siɛnfeliye yiī nɛ fún nɛ yàʔará. Wi kùlofɔlilɔ kácunʔɔ kiī seribɛnnɛ naamɛ gè. Dàala niī nɛ cúungu.

² Yewe wire wī kpuɔwɔ wè, Siyɔn kàʔa nī gè. Wiī naamɛ wómiwomi nɛ̀ tóri kùlogolo siɛnnɛ pe mìɛni nɛ̄.

³ Ki 'yɛli peri muɔ kpóri, muɔ ŋáà ma 'kpúʔɔ á muɔ míʔɛ ki ní fíɛrɛwuʔu gè ! ʔaan, Yewe wiī tiɛlɛ fùn !

⁴ Kùlofɔli wiī ŋɔri ní; ki 'wi dɛ́ni kàyuʔujuumɔ pi de kpínʔini nɛ́ sínmɛ ní. ʔaan, Yewe muɔ ma 'kányiʔɛ kele sɔ́migɔ gèle nɛ̀ tɛ́ngɛ, muɔ ma 'ki kpíʔile Yakuba siimɛ pi‑ kàyuʔu nyu gè nɛ síngi nɛ kasingele kpínʔini.

⁵ Yeri Yewe weli Kulocɛliɛ kpóri wè, yé tuu ye cúbulo wi tɔliyɔ taʔadiʔɛ ki yiʔɛ mɛ́ gè ! ʔaan, Yewe wiī tiɛlɛ fùn !

⁶ Misa nɛ́ Arawɔn pe yé puu wi kacuɔnrilɔ pálì, Samiyɛli wire yé puu nɛ́ bìli ní pe wi náari wè. Pe 'puu nɛ Yewe náari; Yewe nɛ̂ pe náarigɛ cò gè.

⁷ Wi 'puu kàsadibagɛ nī gàa ki 'tɔni nɛ̀ cùungu gè, a wi 'juu nɛ́ pe ní; pe 'puu nɛ lúru wi nyakungɛngɛ siɛnrɛ mɛ́ dè nɛ́ wi fànʔa kaala ní lè nàa wi yé tìɛ pe nɛ̄ lè.

⁸ Yewe weli Kulocɛliɛ, muɔ wī ma nyɛ́nì lúʔu pe mɛ́. Muɔ yé puu pe mɛ́ Kulocɛliɛ ŋáà wi ki yɛri gè, nɛ̀ ki yaʔa muɔ cé puu nɛ pe kapiʔile fuʔɔ tɔ́ngi gè pe nɛ̄.

⁹ Yeri Yewe weli Kulocɛliɛ kpóri wè, yé tuu ye cúbulo wi nyagurugo wàlidɛngɛgɛ yiʔɛ mɛ́ gè. Nɛ́ ki cɛ́n Yewe weli Kulocɛliɛ wiī tiɛlɛ fùn !