Ŋúnuyɔ 91 - Sénoufo Nyarafolo

Yewe nɛ mi ciʔige nɛ wéli

¹ Siɛn ŋáà wī tɛ́niwɛ Kulocɛliɛ láara wè, wire ŋáà wī Duniya wi Mìɛni Nyùgo nɛ̄ gè, wi béri kòri Ŋɔri Ti Mìɛni Kulocɛliɛ nyúmɔ nī bè.

² Mi 'ki juu Yewe mɛ́ nɛ́ jo: «Muɔ yē mi làridiʔɛ, muɔ yē mi làridiʔɛ lìrige gáà gī naamɛ gè, nɛ́ mi Kulocɛliɛ; mi nyɛ́nì mi sɔ̀ngirɔ taʔa dè muɔ nɛ̄.»

³ Kányiʔɛ nɛ̄, wire wi mi suu dèzuuwo wi jùɔ mɛ́ wè, nɛ́ káfaligɛ yaama ní bè, bàa piī nɛ siɛn kpúu wè.

⁴ Wire wi béri muɔ tɔ́ngi majo bɛ̀ gòli cî wi pìile tɔ́n bèle wi fíkɛnyɛ láara yè, wi nyúmɔ nī bè, muɔ bé suɔdiʔɛ taa. Wi kányiʔɛ kaala ni nɛ̂ muɔ màʔa nɛ̀ suʔu bɛ̀ timɔzigege nɛ́ nɛ̀gɛburugo tíɛlɛ.

⁵ Muɔ sǐ ní de fìʔɛ́ pìlige fíɛgbuɔrɔ nɛ̄ dèʔ, nɛ́ ŋaaya ní yè nyàa yi fini cɛnvugo nɛ̄ gèʔ,

⁶ nɛ́ káfaligɛ yaama ní bè bàa pi báan wuɔmɔ nī bèʔ, nɛ́ míɛni yaaguumɔ ní bè bàa pi fuu nɛ tungu siɛnnɛ nɛ̄ bèle cɛnvugo nɛ̄ gèʔ.

⁷ A ki cɛ́nì nyaa wuʔɔgboliyo nyáà yi 'siɛnnɛ sirakogunɔ (1 000) kpúu nɛ̀ cáan muɔ táanni wè, nɛ́ siɛnnɛ siramuʔɔyɔ siin nɛ́ sirakiɛ (10 000) kpúu muɔ kàliige mɛ́ gè, yafiɛn sǐ ga tíi nɔ̀ muɔ nɛ̄ʔ !

⁸ ‑Muɔ nyapigele múgu gèle yákuɔ, bà muɔ bé ki nyaa kɛnmɛ bíì nɛ̄ siɛnpiile pe bé pe sàri taa wè.

⁹ ʔaan, Yewe, muɔ yē mi làridiʔɛ ! A muɔ 'fɔ̀li nɛ̀ Kulocɛliɛ kpíʔile wè muɔ kòridiʔɛ gè, wire ŋáà wī Duniya wi Mìɛni Nyùgo nɛ̄ gè,

¹⁰ kapiʔi káà fáala sǐ ga tíi nɔ̀ muɔ nɛ̄ʔ, kagbɛnnɛ láà fáala sǐ ga tíi sìʔɛrɛ bè kpɔni muɔ kpáa nɛ̄ gèʔ.

¹¹ Nɛ́ ki cɛ́n wi bé muɔ wuʔu juu gè bè gbɛ̀ngɛ nyìʔɛnɛ tundunminɔ mɛ́ bèle peri muɔ wéli muɔ koliyo yi mìɛni nī yè.

¹² Pe bé muɔ tuʔɔlɔ bè cò pe kiyɛ nī yè, kire ga buu muɔ tɔligɔ káà fǎga círi daa kàdɛnigɛ káà nɛ̄ʔ.

¹³ Muɔ bé jàri tánʔana wè nɛ́ wɔ̀mɔri ní wè, muɔ bé jàriyɛliwɛ tɛn wè muɔ tɔligɔ ní gè, nɛ́ wɔ̀biʔi ní gè.

¹⁴ A Yewe jo: «Bɛ̀ ki 'nyaa mi woli ni 'kpúʔɔ wi mɛ́ wè, m'bé wi suɔ, m'béri wi ciʔige de wéli, nɛ́ ki cɛ́n wi nyɛ́nì mi cɛ́n.

¹⁵ A wi 'mi yeri wè, m'bé lúʔu wi mɛ́, m'bé puu nɛ́ wi ní fùrɔgɔ lɛ̀lɛ nī lè, m'bé wi suɔ bé kpuʔɔrɔ taʔa wi nɛ̄.

¹⁶ M'bé wi tín sìi nìʔɛwɛ nɛ̄, bé sí ki yaʔa wi‑ mi suɔlɔ nyaa lè.»