Ŋúnuyɔ 83 - Sénoufo Nyarafolo

Kulocɛliɛ yo, pa weli leguulo cúʔɔ bèle

¹ Ŋúnugo gī. Asafi ŋúnudanʔa gī gàa pe ŋú nɛ́ yakpuɔnrɔ ní dè.

² Kulocɛliɛ yo, kiì yɛli muɔ kò pìiriwe mmɛ gèʔ ! Fǎga pìiri píaa mmɛ gèʔ ! Fǎga ki yaʔa muɔ sǐ yakaa kpíʔileʔ !

³ Nɛ́ ki cɛ́n muɔ leguulo piyē nɛ tùngú nɛ mári; bàli muɔ 'biɛn bèle, piyē nɛ fíkɛnyɛ wúʔuro yè.

⁴ Piyē nɛ pìye nyaʔa nɛ sícilibiʔi kele nyu muɔ siɛnnɛ nɛ̄ bèle, piyē nɛ nyalere kele kpínʔini bàli nɛ̄ pe woli ni 'kpúʔɔ muɔ mɛ́ lè.

⁵ Pe nɛ̂ ki juu níɛ̀ jo: «Yeri báan we pa pe cɛrigɛ pe fǎga ní kò kùlo cíginiʔ ! Kiì yɛli siɛn ní sɔ̀ngi bè taa nɛ́ Isirayɛli míʔɛ ní gèʔ !»

⁶ Kire siɛnnɛ bálì bèle pe 'ki juu làrimɛ nī nɛ̀ bìɛ ti nɛ̄ nɛ̀ nyakungɛngɛ kpíʔile muɔ nɛ̄:

⁷ Edɔmiyé bèle, nɛ́ Simayirayé bèle, nɛ́ Mowabiyé bèle nɛ́ Agariyé bèle,

⁸ nɛ́ Gebali wuulo bèle, nɛ́ Amɔyé bèle, nɛ́ Amalɛkiyé bèle, nɛ́ Filisitiyé bèle nɛ̀ fàri Tiiri kàʔa tɛ́nivɔlilɔ nɛ̄ bèle,

⁹ nɛ́ míɛni Asiri kùlo ni 'fàri pe nɛ̄, bè Lɔti siimɛ sáʔa bè nɛ́ pe ŋɔri kɔli ní gè.

¹⁰ ‑Pe cò ma yɛli nɛ́ kɛnmɛ bíì ní muɔ yé Madiyanyé cò bèle, bà míɛni muɔ cé kapiɛngbuɔnnɔ kàfɔli Sisera cò wè, nɛ́ kùlofɔli Yabɛn ní wè, baa Kisɔn kápaligɛ tiʔɛ nī gè.

¹¹ Muɔ nyɛ́nì pe cúʔɔ baa Ɛni Dɔri kàʔa tɛ́nimɛ nī bè, a pe 'kò nɛ̀junʔɔ dàala nɛ̄ lè.

¹² Ma pe siɛnkpolilo kpíʔile bèle kɛnmɛ bíì nɛ̄ muɔ cé kàfɔli Worɛbi nɛ́ kàfɔli Zebi kpíʔile wè, nɛ́ pe fànʔafɔlilɔ pe mìɛni ní bèle, kɛnmɛ bíì nɛ̄ muɔ cé kàfɔli Zebaki nɛ́ kàfɔli Salimuna kpíʔile wè.

¹³ Peli bálì pe puu nɛ ki nyu nɛ́ jo: «We‑ Kulocɛliɛ kòridiɛyɛ líɛ yè yi‑ kò weli woyo.»

¹⁴ Kulocɛliɛ yo, ‑pe kpíʔile bɛ̀ káfalijuulo cúbugo tíɛlɛ, bɛ̀ nyàsige tíɛlɛ gàa káfaligɛ ki 'líɛ gè,

¹⁵ majo bɛ̀ kákpuɔ tíɛlɛ gàa kàsun ki sórigi gè, bɛ̀ nyaguruyo tíɛlɛ nyàa kàsunjemunɔ cî pɛ́nì sórigo péwu gè.

¹⁶ Ma taʔa pe nɛ̄ nɛ́ muɔ káfaligbuʔɔ ní gè ! ‑Fíɛrɛ wáa pe nɛ̄ nɛ́ muɔ kàsakpiile káfaligɛ ní gè !

¹⁷ ‑Ki yaʔa fìɛrɛ‑ tɔ́n pe yiɛyɛ nɛ̄ yè, kire ga buu pe‑ sí yiʔɛ muɔ Yewe kɔli mɛ́ gè !

¹⁸ ‑Ki yaʔa pe‑ faʔama taa, dí fíɛgbuɔrɔ‑ pe cò súuri, dí fìɛrɛ‑ tɔ́n pe nɛ̄ pe‑ sí kùu !

¹⁹ Pe‑ sí ki cɛ́n muɔ nigbe wī Yewe wè, muɔ nigbe wī Duniya wi Mìɛni Nyùgo nɛ̄ gè, dàala ni mìɛni nɛ̄ lè !