Ŋúnuyɔ 76 - Sénoufo Nyarafolo

Kulocɛliɛ wi 'wi leguulo jáa bèle

1 Ŋúnuŋuminɔ yiɛginiwɛ ŋúnugo gī. Asafi ŋúnudanʔa gī gàa pe ŋú nɛ́ yakpuɔnrɔ ní dè, gɔrilɔ bèle .

¹ Ŋúnuŋuminɔ yiɛginiwɛ ŋúnugo gī. Asafi ŋúnudanʔa gī gàa pe ŋú nɛ́ yakpuɔnrɔ ní dè, gɔrilɔ bèle.

² Kulocɛliɛ wiī cɛ́nwɛ Zuda kùlo nī lè; wi míʔɛ ki 'kpúʔɔ Isirayɛli kùlo nī lè.

³ Wi fobile niī Salɛmi kàʔa nī gè, á wi kòridiʔɛ ní gè Siyɔn kàʔa nī gè.

⁴ Kire tiʔɛ nī wi 'wi leguulo pe kàsun ŋaaya kabari yè, nɛ́ pe timɔzigeye ní yè, nɛ́ kapiɛngbuɔn ŋɔsiile ní bèle, nɛ́ kapiɛngbuɔn yasɛnrɛ ní dè. Ye‑ ŋɔ́ cɛ̀.

⁵ Kulocɛliɛ, muɔ yē nɛ nyíʔɛnɛ nɛ́ ní kpìɛnmɛ; muɔ kpuɔmɔ pi 'tóri nyaguruyo nɛ̄ yè nyàa yī faʔa faʔa wè.

⁶ Kapiɛngbuɔn sànbalilɛ bèle, pe yé pe fùʔuro; peli 'pe ŋɔ́nizɛnmɛ ŋɔ́ni bè. Kire nàgaliriye nyáà yi mìɛni, yiì gbɛ̀nɛ jáa nɛ́ yi kiyɛ yɛ̀gɛ yèʔ.

⁷ Yakuba Kulocɛliɛ yo, bà pe kɛ́nì muɔ kapiɛngbuɔn yékpoli lúʔu lè, suɔnfɛbilɛ bèle nɛ́ suɔnyɔ ní yè, a yi 'tuu nɛ̀ círige.

⁸ Cíʔ ! Muɔ wè, muɔ yē fíɛrɛ wuu díɛ ! Ŋáa wi bé gbɛ̀ yéri muɔ yiʔɛ mɛ́ a muɔ fungo ki 'yɛ̀ kpuʔɔ gè ?

⁹ Bè muɔ yaʔa baa nyìʔɛnɛ nī lè, a muɔ 'ki juu nɛ̀ ceri gàa ki bé puu siɛnpiile wuʔɔgɔ gè; duniya wi 'puu nɛ fìʔɛ́ muɔ nɛ̄, a wi 'pìiri yéwu,

¹⁰ bà Kulocɛliɛ kɛ́nì yɛ̀ wè nɛ̀ kàyuʔu juu gè nɛ̀ ceri gè, bè fuunmɔfɔlilɔ pe mìɛni suɔ bèle dàala nɛ̄ lè. Ye‑ ŋɔ́ cɛ̀.

¹¹ Siɛnnɛ pe béri muɔ gbùʔɔrɔ́ muɔ fundanʔanigɛ kàyuʔujuuro tire kɛnmɛ nɛ̄ siɛnnɛ nɛ̄ bèle, a muɔ 'fundanʔanigɛ kapiɛnnɛ bururo le dè.

¹² Yeri nyakungɛnrɛ kpínʔini Yewe yeli Kulocɛliɛ mɛ́ wè, ye sí de ki siɛnrɛ forigi dè. Yeli bálì ye 'wi màʔa nɛ̀ suʔu wè, yeri báan nɛ́ kpuʔɔrɔ ní bògaara Kulocɛliɛ mɛ́ wè, wire ŋáà nɛ̄ we 'yɛli bèri fìʔɛ́ wè.

¹³ Wire wiī nɛ fànʔafɔlilɔ fungboliyo tìrigí yè, wiī nɛ fíɛgbuɔrɔ wáari duniya kùlofɔlilɔ nɛ̄ bèle.