Ŋúnuyɔ 75 - Sénoufo Nyarafolo

Kulocɛliɛ wi 'kàyuʔu juu gè nìɛnyiɛnigɛfɔlilɔ nɛ̄ bèle

1 Ŋúnuŋuminɔ yiɛginiwɛ ŋúnugo gī. Pe 'ki ŋú nɛ́ yékpoli ní nàa ni 'jo: «Fǎga ki cúʔɔ gèʔ .» Asafi ŋúnudanʔa gī gàa pe ŋú nɛ́ yakpuɔnrɔ ní dè.

¹ Ŋúnuŋuminɔ yiɛginiwɛ ŋúnugo gī. Pe 'ki ŋú nɛ́ yékpoli ní nàa ni 'jo: «Fǎga ki cúʔɔ gèʔ.» Asafi ŋúnudanʔa gī gàa pe ŋú nɛ́ yakpuɔnrɔ ní dè.

² Kulocɛliɛ yo, weli nɛ muɔ gbùʔɔrɔ́ níɛ muɔ síɛri, nɛ́ ki cɛ́n muɔ nyɛ́nì kpɔni weli nɛ̄; siɛnnɛ piyē nɛ muɔ kakpoliyo nyu yè.

³ Kulocɛliɛ 'jo: «Lɛ̀lɛ náà mi 'nyíɛnɛ nɛ̀ kɔ̀n lè, a ni kɛ́nì nɔ̀ wè, m'bé kàyuʔu juu gè nɛ́ sínmɛ ní.

⁴ A dàala ni kɛ́ni cúungu lè nɛ́ ni siɛnnɛ pe mìɛni ní bèle, mi wè, m'bé ni cò bè yérige ni kàkpuɔnnɔ nɛ̄ bèle. Ye‑ ŋɔ́ cɛ̀.

⁵ Mi 'ki juu nìɛnyiɛnigɛfɔlilɔ mɛ́ bèle nɛ́ jo: ‹Ye fǎri fungboliyo kpínʔini yèʔ !› nɛ́ ki juu siɛnpiile mɛ́ bèle: ‹Ye fǎga yeli yiɛyɛ waʔa yèʔ !

⁶ Ye fǎga yiɛyɛ waʔa yè bè tóri mmɛ gèʔ ! Ye fǎga de nyu bèri yìye nyíɛnɛʔ !› »

⁷ Nɛ́ ki cɛ́n, cɛngɛnyɛnifoligɔli mɛ́ bɛ̀ʔ, nɛ́ cɛngɛnyɛnijiingɔli mɛ́ bɛ̀ʔ, nɛ́ míɛni waama kùlo nī bɛ̀ʔ, kpuɔmɔ piī nɛ kɔ́ngiʔ.

⁸ Kulocɛliɛ wire nigbe wi kàyuʔu nyu gè: wi nɛ̂ wàa tìrige, níɛ̀ wàa yɛ̀gɛ.

⁹ Nɛ́ ki cɛ́n nɛ̀jogo kiī Yewe kɔli nī gè; diviɛn tanʔaniwɛ ŋáà pe 'nyaʔami wè, wiī ki nī. Wiī nɛ ki kàyuʔujuu diviɛn ŋu wè dàala siɛnpiile nɛ̄ bèle; pe mìɛni 'yɛli bè wi gbuɔ fúɔ bè sa nɔ̀ nɛ̀jogo táanmɛ gè.

¹⁰ Gàa ki 'mi kúɔ wè, m'béri ki nyu súuri, m'béri yakpuɔnrɔ kpúɔn dè bèri Yakuba Kulocɛliɛ gbùʔɔrɔ́ wè.

¹¹ A Kulocɛliɛ 'jo: «M'bé siɛnpiile nyɛgɛlɛ ke mìɛni kabari gèle; bé siɛnsinminɛ peli kpúʔɔ.»