Ŋúnuyɔ 60 - Sénoufo Nyarafolo

Kire nɛ́ ki mìɛni, Kulocɛliɛ bé kapiɛnnɛ kpúɔn lè weli mɛ́

1 Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: « Nyakungɛngɛ siɛnrɛ ti luʔɔ kácunʔɔ .» Dawuda ŋúnuzɛbɛgɛ gī, bè tɛnmɛnɛ kɛn. 2 Lɛ̀lɛ líì nī Dawuda 'kapiɛnnɛ kpúɔn lè nɛ́ Aramiyé ní bèle, Mɛsopotamii kùlo wuulo bèle, nɛ́ Soba tɛ́nimɛ wuulo ní bèle, bà Zowabi yé koli nɛ̀ pɛn nɛ̀ pɛ́nì kapiɛnnɛ kpúɔn lè nɛ́ Edɔmi kùlo kapiɛngbuɔnnɔ siramuʔɔyɔ taanri (12 000) ní yè, nɛ̀ pe jáa, baa Yasuʔɔgɔ jùlɔgɔ tiʔɛ nī gè .

¹ Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Nyakungɛngɛ siɛnrɛ ti luʔɔ kácunʔɔ.» Dawuda ŋúnuzɛbɛgɛ gī, bè tɛnmɛnɛ kɛn.

² Lɛ̀lɛ líì nī Dawuda 'kapiɛnnɛ kpúɔn lè nɛ́ Aramiyé ní bèle, Mɛsopotamii kùlo wuulo bèle, nɛ́ Soba tɛ́nimɛ wuulo ní bèle, bà Zowabi yé koli nɛ̀ pɛn nɛ̀ pɛ́nì kapiɛnnɛ kpúɔn lè nɛ́ Edɔmi kùlo kapiɛngbuɔnnɔ siramuʔɔyɔ taanri (12 000) ní yè, nɛ̀ pe jáa, baa Yasuʔɔgɔ jùlɔgɔ tiʔɛ nī gè.

³ Kulocɛliɛ yo, muɔ nyɛ́nì weli wáa, nɛ́ weli kapiɛngbuɔnnɔ gboli jaa lè ! Muɔ fungo ki 'yɛ̀ weli kúrugu; koli ma weli pínɛ !

⁴ Muɔ nyɛ́nì dàala cúungo lè nɛ̀ ni cɛnminɛ; ‑ni nɔmiyɔ puʔɔ yè, nɛ́ ki cɛ́n niī nɛ cúungu.

⁵ Muɔ nyɛ́nì ki yaʔa a muɔ siɛnnɛ pe 'kagbɛnyɛ nyaa yè, majo bɛ̀ muɔ cî diviɛn sungbɛnmɛ kɛn bè weli mɛ́ a weli 'gbuɔ nɛ̀ tín nɛ fíigi wè.

⁶ Bàli pe fìʔɛ́ muɔ nɛ̄ wè, a muɔ 'káfali kɛn pe mɛ́ fìɛ pe‑ fɛ̀, kire ga buu leguu wi sandali ŋaʔa ki fǎga nɔ̀ pe nɛ̄ʔ. Ye‑ ŋɔ́ cɛ̀.

⁷ Te báan ma pa weli píle ma suɔ nɛ́ muɔ kàliige kɔli ní gè, kire ga buu bàli pe 'muɔ dɛ́ni bèle peli‑ muɔ suɔlɔ nyaa lè. Ma lúʔu weli mɛ́  !

⁸ Kulocɛliɛ wi 'juu, baa wi saawalidɛngɛgɛ nī gè, nɛ́ jo: «M'bé fànʔa taa bè Sikɛmi kàʔa tɛ́nimɛ líɛ bè, bè pi liɛlɛ, bé Sukɔti jùlɔgɔ simɛ gè, bè ki liɛlɛ.

⁹ Galaadi tɛ́nimɛ pire yē mi wobo, Manase tɛ́nimɛ pire yē mi wobo, Ɛfirayimi tɛ́nimɛ pire yē mi kapiɛngbuɔn ndɔ̀ngɔ, Zuda tɛ́nimɛ pire yē mi fànʔa kàgbiile.

¹⁰ Mowabi kùlo lire yē m'mɛ́ tasaa ŋáà nī mi nɛ gbínni wè, Edɔmi kùlo tɛ́nimɛ pire yē mi wobo báà nī mi nɛ mi tɔriyɔ wáari yè. M'bé sí fànʔa taa bè kòkuulo wáa lè Filisiti kùlo nɛ̄ lè.»

¹¹ Ŋáa wi bé mi kɔ́ri nyɔ́gɔ gunliriye kàʔa nī gè ? Ŋáa wi bé mi kɔ́ri nyɔ́gɔ Edɔmi kùlo nī lè  ?

¹² Muɔ bɛ̀ʔ lé, Kulocɛliɛ ? Nɛ̀ sí ki taa muɔ sì weli wáaʔ lé ? Muɔ ní wè nɛ weli kapiɛngbuɔnnɔ yiʔɛ kínigi gèʔ.

¹³ Te báan ma pa weli sáʔa weli parifɔlilɔ nɛ̄ bèle ! Nɛ́ ki cɛ́n sáʔala náà ni kɔ́ngi lewiile mɛ́ bèle, lire wè kányiʔɛʔ.

¹⁴ Nɛ́ Kulocɛliɛ ní wè, weli bé pe jáa ! Wire wi bé weli parifɔlilɔ tánʔana bèle bè pe tirige.