Ŋúnuyɔ 56 - Sénoufo Nyarafolo

Bè mi yaʔa Kulocɛliɛ ní wè, mi wè nɛ fìʔɛ́ʔ

1 Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Gòtolo ni 'pìiri nɛ́ líili mi nɛ̄». Dawuda ŋúnuzɛbɛgɛ gī, gàa wi 'kún lɛ̀lɛ líì nī Filisitiyé pe yé wi cò Gati kàʔa nī gè .

¹ Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Gòtolo ni 'pìiri nɛ́ líili mi nɛ̄». Dawuda ŋúnuzɛbɛgɛ gī, gàa wi 'kún lɛ̀lɛ líì nī Filisitiyé pe yé wi cò Gati kàʔa nī gè.

² Kulocɛliɛ yo, ‑nyinimɛ taa mi nɛ̄ ! Nɛ́ ki cɛ́n siɛnnɛ piyē nɛ mi cìrá. Cɛngɛ ó cɛngɛ piyē nɛ túngu nɛ́ mi ní, níɛ mi wuʔɔ.

³ Lɛ̀lɛ ó lɛ̀lɛ nī mi palilɛfɔlilɔ piyē nɛ mi caa, nɛ́ ki cɛ́n piyē nìʔɛnɛ bàli pe 'pìye nyíɛnɛ mi nɛ̄ wè, níɛ túngu nɛ́ mi ní wè.

⁴ A mi gbɛ̀ni fìʔɛ́ wè, mi nɛ̂ mi sɔ̀ngirɔ taʔa dè muɔ nɛ̄.

⁵ Mi nɛ Kulocɛliɛ tòbiló wè wi siɛnrɛ tire kɛnmɛ nɛ̄ dàa wi 'juu dè. Kulocɛliɛ wire nɛ̄ mi 'mi sɔ̀ngirɔ taʔa dè; mi wè nɛ fìʔɛ́ʔ. Gáa pe bé gbɛ̀ kpíʔile mi nɛ̄, bàli bīɛlɛ lewiile bèle nɛ́ ní yakuʔulo gèle  ?

⁶ Piyē nɛ mi kele córi gèle cɛnguɔmɔ; sɔ̀ngibiire yákuɔ tire dī pe mɛ́ mi kɔli mɛ́ gè.

⁷ Pe nɛ̂ nyuɔ le mi nɛ̄, níɛ̀ nɛ mi palilɛ, piyē nɛ mi yedaʔala ciʔige gèle nɛ wéli bè mi kpúu.

⁸ Bɛ̀ sí ki nyaa pe 'pii mmɛ gè, fǎga ki yaʔa pe‑ suɔ díɛʔ ! Kulocɛliɛ yo, muɔ fundanʔanigɛ nī gè, ‑siɛnnɛ bálì ŋɔrigɔ bèle ma cáan !

⁹ Muɔ wè, muɔ nyɛ́nì mi fáalimɛ kele sɔ́migɔ gèle nɛ̀ ke tɔ́ri. Kire nɛ̄, ma mi yétubiʔɛlɛ tuʔɔ gèle ma le muɔ yalege nī gè; yétubiʔɛlɛ ke mìɛni bìnɛ nyuɔ ki wè sɛbɛgɛʔ lé muɔ sɛbɛkuruwo nī wèʔ ?

¹⁰ Bà mi leguulo pe bé kàduʔu wáa bè núgo mi táanni cɛngɛ gáà m'bé muɔ yeri wè, mi nyɛ́nì ki cɛ́n, Kulocɛliɛ wiī nɛ́ mi ní.

¹¹ Mi nɛ Kulocɛliɛ tòbiló wè wi siɛnrɛ tire kɛnmɛ nɛ̄ dàa wi 'juu dè; ʔaan, wi siɛnrɛ tire kɛnmɛ nɛ̄, mi nɛ Yewe gbùʔɔrɔ́ wè.

¹² Kulocɛliɛ wire nɛ̄ mi 'mi sɔ̀ngirɔ taʔa dè, mi wè nɛ fìʔɛ́ʔ. Gáa pe bé gbɛ̀ kpíʔile mi nɛ̄, bàli bīɛlɛ lewiile bèle nɛ́ ní yakuʔulo gèle  ?

¹³ Kulocɛliɛ yo, m'bé ki kɛn muɔ mɛ́ gàa mi nyuɔ ki 'kún nɛ̀ kɛn gè muɔ mɛ́ wè. Bè ki fori gè, mi bé kacɛ̀ngɛ síɛrilɛ yakɔnrɔ kɔ̀n dè.

¹⁴ Nɛ́ ki cɛ́n muɔ 'mi píle nɛ̀ suɔ kùu mɛ́ wè, muɔ ma 'mi tɔliyɔ yérige yè mi sì kúrugo nɛ̀ tuuʔ, kire ga buu mi de tári muɔ yiʔɛ mɛ́ gè, Kulocɛliɛ, muɔ kpìɛnmɛ nī bè bàa pi sìi kanʔa wè.