Ŋúnuyɔ 54 - Sénoufo Nyarafolo

Kulocɛliɛ wī mi sáʔafɔli wè

¹ Ŋúnuŋuminɔ yiɛginiwɛ wuʔu gī. Dawuda sícilimɛ ŋúnugo gī, gàa pe ŋú nɛ́ gɔrilɔ ní bèle.

² Lɛ̀lɛ líì nī Zifii kàʔa wuulo pe pɛ́nì ki juu Sawuli mɛ́ nɛ́ jo: «Dawuda wiī baa làriwɛ weli sunʔɔmɔ nī bè.»

³ Kulocɛliɛ yo, ‑mi suɔ muɔ míʔɛ kire kɛnmɛ nɛ̄ ! Muɔ fànʔa ní gè, ‑tànʔa kɛn m'mɛ́ !

⁴ Kulocɛliɛ yo, ‑mi náarigɛ lúʔu gè, ma líiye cáan mi nyasiɛnrɛ mɛ́ dè.

⁵ Nɛ́ ki cɛ́n nabɔnminɔ pe 'yɛ̀ mi kúrugu, fungbɛnyɛfɔlilɔ bálì pe 'caa bè mi kpúu wè. Pe wè nɛ tɔ́ri nɛ́ muɔ Kulocɛliɛ níʔ. Ye‑ ŋɔ́ cɛ̀.

⁶ Nɛ̀ ki yaʔa, Kulocɛliɛ wī mi sáʔafɔli wè; mi Kàfɔli wire wi ŋɔri nyɔ́gi dè mi nī.

⁷ Ki 'yɛli wuʔɔgɔ‑ ki tuu bàli nɛ̄ pe 'mi palilɛ wè ! ‑Muɔ kányiʔɛ kaala tìɛ lè mi nɛ̄; ma sí pe cúʔɔ péwu !

⁸ Mi béri kinɛdɛnigɛ yakɔnrɔ kanʔa dè muɔ mɛ́. Mi béri muɔ míʔɛ kpóri gè, Yewe, nɛ́ ki cɛ́n muɔ nyɛ́nì nyuɔ.

⁹ Muɔ 'mi suɔ funbiɛnrɛ ti mìɛni mɛ́. Kire nɛ̄ a mi 'mi leguulo tuugɛnmɛ nyaa bè, nyapile nɛ̄.