Ŋúnuyɔ 42 - Sénoufo Nyarafolo

Kulocɛliɛ láa kiī mi nɛ̄

1 Ŋúnuŋuminɔ yiɛginiwɛ wuʔu gī . Kore jaala sícilimɛ ŋúnugo gī .

¹ Ŋúnuŋuminɔ yiɛginiwɛ wuʔu gī. Kore jaala sícilimɛ ŋúnugo gī.

² Majo bɛ̀ lakoliyo luʔɔwuʔɔ cî sùɔ taa kɛnmɛ bíì nɛ̄ bè, bɛ̀ míɛni Kulocɛliɛ láa ki 'mi taa.

³ Kulocɛliɛ wowiiwe láa kiī mi nɛ̄ bɛ̀ luʔɔwuʔɔ tíɛlɛ ! Lɛ̀lɛ líi nī m'bága kɛ́ bè sa nìɛ tìɛ Kulocɛliɛ yiʔɛ mɛ́ gè wi Gbùʔɔrɔsaʔa nī gè  ?

⁴ Pìlige nɛ́ cɛnvugo, mi yéturo tire dī mi suro dè, bɛ̀ siɛnnɛ piyē nɛ ki nyu m'mɛ́ nɛ́ jo: «Sé muɔ Kulocɛliɛ wi yē  ?»

⁵ Bà mi kayaʔa yéturo ti ŋu dè a mi 'sɔ̀ngi nɛ̀ taa lɛ̀lɛ líì nī mi 'puu nɛ tári siɛnniʔɛmɛ sunʔɔmɔ nī bè nɛ waa nɛ́ pe ní fúɔ nɛ̀ sɛ́nì nɔ̀ Kulocɛliɛ Gbùʔɔrɔsaʔa nɛ̄ gè, kire tánʔana náà nɛ̄ lè fundaanra yékponiʔɛrɛ nɛ́ kacɛ̀ngɛcɛ́n kòkuʔulo 'puu nɛ wáari nɛ̀ weli màʔa nɛ̀ suʔu; pe yé puu siɛnniʔɛmɛ báà pi yé pɛn fundaanra mɛ́ dè.

⁶ A mi fungo ki‑ kò funbiɛnrɛ nɛ̄ dè gáa ki bé nyuɔ mi nɛ̄ ? A mi fungo ki- kò funnyaʔamirɛ nɛ̄ dè gáa ki bé nyuɔ mi nɛ̄ ? Mi fungo yo, ma muɔ sɔ̀ngirɔ taʔa dè Kulocɛliɛ nɛ̄ ! Nɛ́ ki cɛ́n m'bé wi gbùʔɔrɔ cígini, wire ŋáà wī mi suɔfɔli wè nɛ́ mi Kulocɛliɛ wè.

⁷ Mi Kulocɛliɛ yo, je mi céri ti 'kùu wī. Kire kɛnmɛ nɛ̄ mi 'yiʔɛ muɔ kɔli mɛ́ bè muɔ náari, mi ŋáà mi 'líili muɔ nɛ̄ wè nɛ́ ní Zurudɛn cáʔa nyùgo kùlo táanni lè, baa Ɛrimɔ nyagurugo nɛ́ Miseyari nyagurugo mɛ́ gè.

⁸ Bɛ̀ luʔɔcuulimɔ cî nɛ luʔɔcuulimɔ páà yeri nɛ́ ki tùnmɔ ní bè níɛ nɛ fúu nɛ tíri nyagurugo nɛ̄ gè, muɔ lakuruyo yi mìɛni nɛ yɛ̀gí nɛ tun nɛ cɛrigi níɛ fúu nɛ tòrí mi nɛ̄ wè.

⁹ Cɛnvugo nɛ̄ gè, Yewe nɛ̂ wi bànguɔ dɛ́nigɛ tìrige gè mi nɛ̄, pìlige nī gè, mi nìɛ náarigɛ ŋúnugo ŋú Kulocɛliɛ mɛ́ wè, wire ŋáà wi sìi kanʔa wè m'mɛ́ wè.

¹⁰ Mi bé ki juu Kulocɛliɛ mɛ́ wè, wire ŋáà wī mi kàdɛnigbaala lè: «Gáa nɛ̄ muɔ fìʔɛ nɛ́ mi ní ? Gáa nɛ̄ mi 'yɛli bèri tári funbiɛnrɛ nī dè, mi leguulo wuʔɔgɔ kire kɛnmɛ nɛ̄ bè ?

¹¹ Mi piɛnnɛ pe tiʔɛligɛlɛ gèle, kiyē nɛ mi nàzɔn cɛnminɛ wè mi nɛ̄, bà pe cî nɛ ki nyu m'mɛ́ súuri níɛ̀ jo: ‹Sé muɔ Kulocɛliɛ wi yē  ?› »

¹² A mi fungo ki‑ kò funbiɛnrɛ nɛ̄ dè, gáa ki bé nyuɔ mi nɛ̄ ? A mi fungo ki- kò funnyaʔamirɛ nɛ̄ dè, gáa ki bé nyuɔ mi nɛ̄ ? Mi fungo yo, ma muɔ sɔ̀ngirɔ taʔa dè Kulocɛliɛ nɛ̄ ! Nɛ́ ki cɛ́n m'bé wi síɛri cígini, wire ŋáà wī mi suɔfɔli wè nɛ́ mi Kulocɛliɛ wè.