Ŋúnuyɔ 24 - Sénoufo Nyarafolo

Kpuʔɔrɔ Kùlofɔli wiī nɛ jiin

1 Dawuda ŋúnudanʔa gī gàa pe ŋú nɛ́ yakpuɔnrɔ ní dè.

¹ Dawuda ŋúnudanʔa gī gàa pe ŋú nɛ́ yakpuɔnrɔ ní dè. Yewe mɛ́ duniya wi mìɛni yē, nɛ́ wi laamɛ yɛrɛ ní dè, dàala lè nɛ́ ni tɛ́nivɔlilɔ ní bèle.

² Nɛ́ ki cɛ́n wire wi 'dàala kàkpuɔnnɔ cɔ́ri bèle lakpoliyo naamɛ gè, lakpoliyo nyáà yī baa dàala láara lè; wi 'dàala sɔ́migɔ lè nɛ̀ yérige lakoliyo nɛ̄ yè.

³ Ŋáa wi bé jáa bè tánʔa Yewe nyagurugo nɛ̄ gè ? Ŋáa wi bé jáa bè yéri wi saawalidɛngɛgɛ nī gè ?

⁴ Ŋàa kiyɛ yiì núʔɔ yèʔ, á wi ní funviige ní gè, ŋàa wi wè tári káfinɛrɛ nɛ̄ dèʔ, nɛ́ míɛni wi wè nɛ kàlí bè siɛn fáanniʔ.

⁵ Yewe bé diba taʔa wè kire siɛn nɛ̄ wè; wi suɔfɔli Kulocɛliɛ wi bé tànʔa kɛn wi mɛ́.

⁶ Kire kɛ̀nnɛ gboli ni yē, bàli pe 'pìye puɔ muɔ nɛ̄ bèle níɛ muɔ yiʔɛ caa gè, peli bīɛlɛ Yakuba narigɛ gè kányiʔɛ nɛ̄  ! Ye‑ ŋɔ́ cɛ̀.

⁷ Nàkpaanwiʔile, ye‑ gbòbori, ye‑ nyùyɔ yɛ̀gɛ yè ! Bànguɔ kɔ̀riyɔ, ye‑ múgu ! Ye‑ tí Kpuʔɔrɔ Kùlofɔli wi‑ jíin !

⁸ Ŋáa sí wī kire Kpuʔɔrɔ Kùlofɔli wè ? Yewe wī, ŋɔrifɔli wè nɛ́ ní nàgalirige gè, Yewe wè, nàgalirige gè kapiɛnnɛ nī lè !

⁹ Nàkpaanwiʔile, ye‑ gbòbori, ye‑ nyùyɔ yɛ̀gɛ yè ! Bànguɔ kɔ̀riyɔ, ye‑ múgu ! Ye‑ tí Kpuɔmɔ Kùlofɔli wi‑ jíin !

¹⁰ Ŋáa sí wī kire Kpuɔmɔ Kùlofɔli wè ? Yewe ŋáà wī Nyìʔɛnɛ Kapiɛngbuɔnnɔ Kàfɔli wè, wire wī Kpuɔmɔ Kùlofɔli wè. Ye‑ ŋɔ́ cɛ̀.