Ŋúnuyɔ 23 - Sénoufo Nyarafolo

Yewe nɛ̂ mi nàʔa bɛ̀ sìnbanaʔawa tíɛlɛ

1 Dawuda ŋúnudanʔa gī gàa pe ŋú nɛ́ yakpuɔnrɔ ní dè.

¹ Dawuda ŋúnudanʔa gī gàa pe ŋú nɛ́ yakpuɔnrɔ ní dè. Yewe yē mi nàʔavɔli; yakaa sǐ ga tíi mi laaʔ.

² Wiī nɛ mi tórigi nyàpungo tiʔɛ nī, nɛ mi síngi baa yanyige nɛ̄; nɛ mi kɔ́ri nɛ waa luɔyɔ tiɛyɛ nī nyàa yi wè fúu yèʔ.

³ Wiī nɛ ŋɔvɔnrɔ kanʔa mi pìle mɛ́ lè. Wiī nɛ mi yiʔɛ kínigi kasingele koligo nī gè kire ga buu wi míʔɛ ki‑ tɛ́ni.

⁴ A ki cɛni yē mi nɛ tári gòrigo nī gè baa kùu yebiliwuɔlɔ nī lè, mi nɛ̌ de fìʔɛ́ yafiɛn nɛ̄ʔ, nɛ́ ki cɛ́n muɔ yē nɛ́ mi ní. Muɔ kàgbiile lè nɛ́ muɔ kpògo ní gè, ti 'mi yaʔa mi nɛ sorigi.

⁵ Muɔ nɛ lìigbuɔlɔ tɛ́ngi lè mi táanni mi leguulo pe nyaamɛ nɛ̄. Muɔ nɛ mi kpàlí nɛ nyɔ́gi níɛ nùdaanna sùnmɔ ŋu mi nyùgo nɛ̄ gè; muɔ nɛ mi nɛ̀jogo nyìgí gè ki‑ ŋu.

⁶ Muɔ kacɛ̀ngɛ nɛ́ muɔ bànguɔ dɛ́nigɛ ki bé taʔa mi nɛ̄ bè mi cìra bè cò mi sìi cɛnyɛ yi mìɛni nī yè. Kire nɛ̄ m'bé kò Yewe saʔa nī gè lɛ̀lɛ ó lɛ̀lɛ nī.