Ŋúnuyɔ 146 - Sénoufo Nyarafolo

Yewe wī siɛnfurɔlɔ sáʔafɔli wè

¹ Ye‑ Yewe gbùʔɔrɔ wè ! Mi fungo, te Yewe gbùʔɔrɔ́ wè !

² Bè mi yaʔa sìi nɛ̄ wè, m'béri Yewe gbùʔɔrɔ́ wè. M'béri yakpuɔnrɔ kpúɔn dè mi Kulocɛliɛ mɛ́ wè mi sìi cɛnyɛ yi mìɛni nī.

³ Ye fǎga yeli sɔ̀ngirɔ taʔa dè siɛnkpolilo nɛ̄ bèleʔ, nɛ́ lewiile nɛ̄ bèle, bàli piyě gbɛ̀ siɛn suɔ wèʔ !

⁴ A pe ŋɔ́zɛnnɛ ni kɛ́nì yiri pe nī bèle, a pe 'koli nɛ̀ jíin dàala nī lè, pe kele ke mìɛni nɛ̂ kúɔ nɛ̀ jíin baa nɛ́ pe ní.

⁵ Ŋàa mɛ́ Yakuba Kulocɛliɛ wi yē sáʔafɔli wè, a wi 'wi sɔ̀ngirɔ taʔa dè Yewe wi Kulocɛliɛ nɛ̄ wè, wi wuʔu kiī tànʔa !

⁶ Nɛ́ ki cɛ́n Yewe wi nyɛ́nì nyìʔɛnɛ nɛ́ dàala faan lè, nɛ́ kuʔɔjii ní wè, nɛ́ ti laamɛ yɛrɛ ti mìɛni ní dè. Weli bé gbɛ̀ tɛ́ngɛ wi nɛ̄ lɛ̀lɛ ó lɛ̀lɛ nī.

⁷ Wiī nɛ tànʔa kanʔa bàli mɛ́ siɛnnɛ 'pe wuʔɔ bèle, nɛ yaliire kanʔa bàli nɛ̄ fungo ki yē gè. Yewe nɛ̂ kasuulebile nyùʔɔdiriye celile yè.

⁸ Yewe nɛ̂ fúɔnnɔ nyapigele múgu gèle; bàli bīɛlɛ kùrulo bèle, Yewe nɛ̂ pe yɛ̀gɛ nɛ̀ pe sìɛn. Siɛnsinminɛ pe 'Yewe dɛ́ni wè.

⁹ Yewe nɛ̂ nabɔnminɔ wéli bèle, wi nɛ̂ círile nɛ́ lakicɛlilɛ sáʔa bèle, nɛ̀ ki yaʔa wiī nɛ siɛnpiile koliyo córi yè.

¹⁰ Yewe yē Kùlofɔli lɛ̀lɛ ó lɛ̀lɛ nī. Siyɔn kàʔa yo, wiī muɔ Kulocɛliɛ kɛ̀ngɛlɛ ke mìɛni nī ! Ye- Yewe gbùʔɔrɔ wè  !