Ŋúnuyɔ 144 - Sénoufo Nyarafolo

Bàli mɛ́ Yewe yē Kulocɛliɛ wè, peli wuʔu kiī tànʔa !

1 Dawuda wuʔu gī.

¹ Dawuda wuʔu gī. Kpuʔɔrɔ 'yɛli de tari Yewe nɛ̄ wè, mi kàdɛnigbaala lè, wire ŋáà wi 'mi kiyɛ tɛnmɛ yè kapiɛnnɛ nɛ̄ lè nɛ́ mi kabiʔɛlɛ ní gèle kàsii kpúɔngɛnmɛ nɛ̄ bè.

² Wire wī mi Kulocɛliɛ ŋáà mi nyɛ́nì dɛ́ni wè, wire wī mi làridiʔɛ lìrige nɛ́ ní mi líʔirejodiʔɛ gè, wire ŋáà wi 'mi píle nɛ̀ suɔ wè. Wiī mi timɔzigege; wire láara mi nɛ fé nɛ làrí; wire wi kùlogolo siɛnnɛ cɛ́rigi bèle mi mɛ́.

³ Yewe yo, ŋáa wī siɛn wè, dí muɔ de wi wéli wè, lewiile bèle, dí muɔ de sɔ̀ngí de taʔa nɛ́ pe ní  ?

⁴ Siɛn wiī bɛ̀ ŋɔ́nɔ tíɛlɛ; wi cɛnyɛ yiī bɛ̀ nyúmɔ tíɛlɛ bàa pi tóri bè.

⁵ Yewe yo, ma muɔ nyìʔɛnɛ múgu lè ma tìgi, cò ma taa nyaguruyo nɛ̄ yè, yi de wírigi.

⁶ Ma kàsakpɛnigɛ nyíʔɛnimɛ tìrige bè, ma leguulo cɛrigɛ bèle ! ‑Muɔ ŋaaya ŋɔ yè ma pe cìra pe fɛ̀  !

⁷ Bè muɔ yaʔa nyìʔɛnɛ nī lè, ‑muɔ kiyɛ sáʔa yè ma tìrige ma mi suɔ, ma mi cò ma yige lasicuuyo nī yè nɛ́ nabɔnminɔ pe kiyɛ nī yè,

⁸ bàli bīɛlɛ pe nyuɔyɔ yi káfinɛrɛ nyu dè, bàli piyē nɛ pe kàliige kiyɛ yɛ̀gí yè lɛ̀lɛ líì nī piyē nɛ kàlí bèri siɛnnɛ fáanni bèle.

⁹ Kulocɛliɛ yo, je m'béri ŋúnuvɔngɔ ŋú muɔ mɛ́, béri màʔagɛlɛ kiɛ bɔ̀licɛrigɛ kpúɔn gè muɔ mɛ́.

¹⁰ Muɔ ŋáà wī kùlofɔlilɔ pe suɔfɔli wè; muɔ ma 'muɔ baakuɔwɔ Dawuda suɔ wè kapiɛngbuɔn ŋɔsii mɛ́ wè ŋàa wi kùu kanʔa wè.

¹¹ Ma mi suɔ, ma mi cò ma yige nabɔnminɔ pe kiyɛ nī yè, bàli nyuɔyɔ yi káfinɛrɛ nyu dè, bàli piyē nɛ pe kàliige kiyɛ yɛ̀gí yè lɛ̀lɛ líì nī piyē nɛ kàlí bèri siɛnnɛ fáanni bèle.

¹² Bà ki bé puu dí weli jaala bèle, pe nàgapunmɔ lɛ̀lɛ nī lè, pe bé puu bɛ̀ tiipunyɔ tíɛlɛ nyàa yi yɛ̀gí nɛ sìɛn yè. Weli pórilo pe bé puu bɛ̀ tiindugugolo tíɛlɛ gàli pe 'tɛn gèle bè nàkpanʔa fèri gè.

¹³ Weli síkaanya yi bé nyì yaliire ti mìɛni feliye nɛ̄, weli sìnbatoyo yi bé sii bè niʔɛ, nìʔɛboyo nìʔɛboyo, bè yi nàʔadiɛyɛ nyì yè.

¹⁴ Weli nìɛyɛ yi bé kpólilo bè sùnmɔ le. Weli leguulo piyě gbɛ̀ jaa bè tuu weli nɛ̄ bè weli cò fànʔa nɛ̄ bè kɛ́ nɛ́ weli níʔ. Funwuɔrɔ kɔnrɔ sǐ ní wáa weli kàaya dàliyɛ nī yèʔ.

¹⁵ Siɛnnɛ bálì mɛ́ ki kpínʔini mmɛ gè, peli wuʔu kiī tànʔa  ! Bàli mɛ́ Yewe yē pe Kulocɛliɛ wè, peli wuʔu kiī tànʔa  !