Ŋúnuyɔ 138 - Sénoufo Nyarafolo

Mi nɛ Yewe kányiʔɛ kaala tòbiló lè

1 Dawuda wuʔu gī.

¹ Dawuda wuʔu gī. Yewe yo, mi nɛ muɔ tòbiló nɛ́ mi fungo ki mìɛni ní; nyìʔɛnɛ fànʔafɔlilɔ yiʔɛ mɛ́ gè, m'béri muɔ gbùʔɔrɔ́ bèri ŋú nɛ́ yakpuɔnrɔ ní dè.

² Mi nɛ tun nɛ cúbulo muɔ Gbùʔɔrɔsaʔa wàlidɛngɛgɛ kɔli mɛ́ gè, mi nɛ muɔ míʔɛ kpóri gè muɔ bànguɔ dɛ́nigɛ nɛ́ muɔ kányiʔɛ kaala wuʔu nɛ̄ gè. Nɛ́ ki cɛ́n muɔ nyɛ́nì muɔ míʔɛ kpúʔɔ gè nɛ́ muɔ siɛnrɛ sɔ́migɔ dè nɛ̀ fori kire ga buu ti‑ tóri yɛrɛ ti mìɛni nɛ̄.

³ Cɛngɛ gíì mi 'muɔ yeri wè, a muɔ 'lúʔu mi mɛ́, a muɔ 'nɛ̀zorilo kɛn mi mɛ́ nɛ̀ ŋɔri nyɔ́gɔ mi nī.

⁴ Yewe yo, ‑ki yaʔa dàala kùlofɔlilɔ pe mìɛni de muɔ gbùʔɔrɔ́ a pe 'muɔ nyasiɛnrɛ lúʔu dè !

⁵ Dí pe sí de ŋú Yewe kakpiʔiligele wuʔu nɛ̄ gè, nɛ́ ki cɛ́n Yewe kpuɔmɔ pi nyɛ́nì niʔɛ !

⁶ Yewe wiī naamɛ, nɛ̀ ki yaʔa wiī nɛ màamafɔlilɔ nyaʔa bèle; fungbuʔɔfɔlilɔ bèle, wiī nɛ pe nyaʔa liilige nɛ̀ pe cɛ́n.

⁷ A mi yē fùrɔgɔ sunʔɔmɔ nī bè, muɔ nɛ̂ ki kpíʔile mi‑ kò sìi nɛ̄, muɔ nɛ̂ muɔ kɔli sáʔa gè nɛ̀ taʔa mi leguulo pe funyɛrigbuʔɔ nɛ̄ gè, á muɔ kàliige kɔli kiī nɛ mi suu.

⁸ Yewe bé mi kele nyuɔ gèle bè fori. Yewe yo, muɔ bànguɔ dɛ́nigɛ kiī baa súuri  ! Fǎga kàduʔu wáa muɔ siɛnnɛ mɛ́ bèle bàli muɔ faan bèleʔ !