Ŋúnuyɔ 132 - Sénoufo Nyarafolo

Yewe diba wiī Dawuda saʔa nɛ̄ gè súuri

1 Fundaanra tánʔagbuɔlɔ ŋúnugo gī.

¹ Fundaanra tánʔagbuɔlɔ ŋúnugo gī. Yewe yo, sɔ̀ngi ma taa nɛ́ Dawuda ní wè nɛ́ wi fùrɔgɔ ki mìɛni ní.

² Dawuda wire wi 'kàli Yewe nɛ̄, wi 'nyuɔ kún nɛ̀ kɛn Yakuba Kulocɛliɛ Ŋɔrifɔli mɛ́ wè,

³ a wi 'jo: «Miǐ je ga jíin mi fɛ̀ni saʔa nī gè baa mi nɛ kòrí wèʔ, mi sǐ je sínɛ mi yasinɛgɛ nɛ̄ gèʔ,

⁴ miǐ ga tíi mi nyapigele tɔ́n gèleʔ nɛ́ míɛni miǐ ŋɔ́ni bè nyaa púloʔ

⁵ fúɔ bè taa mi pa tiʔɛ taa Yewe mɛ́ gàa ki bé puu kòridiʔɛ Yakuba Kulocɛliɛ Ŋɔrifɔli mɛ́ wè.»

⁶ Bà weli yé puu Efirata kàʔa nī gè, wéli nyɛ́nì nyakungɛngɛ finʔɛgɛ wuʔu lúʔu gè, a weli sɛ́nì ki nyaa baa Yaari kàʔa siiye nī yè.

⁷ Yeri báan we‑ kɛ́ Yewe kòridiʔɛ mɛ́ gè, we sa tuu we cúbulo wi tɔliyɔ taʔadiʔɛ yiʔɛ mɛ́ gè !

⁸ Yewe yo, yɛ̀ mari báan muɔ ŋɔ́daala tiʔɛ mɛ́ gè, muɔ wè, nɛ́ muɔ finʔɛgɛ ní gè, gàa ki 'muɔ ŋɔri tìí dè.

⁹ ‑Ki yaʔa sínnɛ ni‑ puu muɔ kacuɔnrilɔ nɛ̄ bèle bɛ̀ buruyo tíɛlɛ, dí siɛnnɛ bálì pe 'pìye puɔ muɔ nɛ̄ wè, peri fundaanra yékpuʔulo wáari gèle !

¹⁰ Muɔ baakuɔwɔ Dawuda kɛnmɛ nɛ̄ bè, muɔ fǎga cíi kùlofɔli nɛ̄ wè, muɔ siɛnnyiɛnɛgɔnwɔ wèʔ !

¹¹ Yewe nyɛ́nì kàli nɛ̀ kɛn Dawuda mɛ́, kányiʔɛ nɛ̄, wiǐ ní ga tíi koli ti nɛ̄ʔ, nɛ́ jo: «M'bé ki kpíʔile muɔ tíimɛ siimɛ wuu wáà bé tɛ́ni muɔ kùlofɔlilɔ kácunʔɔ nɛ̄ gè.

¹² A muɔ jaala pe fɔ̀li nɛ mi nyakungɛngɛ siɛnrɛ cògí dè, nɛ́ mi kajuʔulo ní gèle gàli nɛ̄ mi 'pe tɛnmɛ gèle, pe jaala míɛni pe béri tɛ̀ní muɔ kùlofɔlilɔ kácunʔɔ nɛ̄ gè súuri lɛ̀lɛ ó lɛ̀lɛ nī.»

¹³ Nɛ́ ki cɛ́n Yewe nyɛ́nì Siyɔn kàʔa nyíɛnɛ gè nɛ̀ kɔ̀n; ki kaala ni 'wi dɛ́ni ki‑ kò wi tɛ́nidiʔɛ.

¹⁴ A wi 'ki juu nɛ́ jo: «Mi ŋɔ́daala tiʔɛ gī súuri lɛ̀lɛ ó lɛ̀lɛ nī. M'bé tɛ́ni baa, nɛ́ ki cɛ́n ki kaala ni 'mi dɛ́ni.

¹⁵ M'bé diba taʔa wè ki síkaanya yaliire nɛ̄ dè ti‑ niʔɛ, mi bé ki fɔ̀ngɔfɔlilɔ tín bèle suro nɛ̄ dè.

¹⁶ M'bé ki kpíʔile Siyɔn kàʔa kacuɔnrilɔ pe‑ suɔlɔ taa lè, nɛ́ ki siɛnnɛ bálì pe 'pìye puɔ mi nɛ̄ wè, pe béri fundaanra yékpogbuʔɔlɔ wáari gèle  !

¹⁷ Baa kire tiʔɛ nī gè, m'bé Dawuda ŋɔri yige dè bɛ̀ nyɛnɛ tíɛlɛ, m'bé ki kpíʔile mi siɛnnyiɛnɛgɔnwɔ wi béri càanná bɛ̀ fètinnɛ kpìɛnmɛ tíɛlɛ.

¹⁸ M'bé fìɛrɛ buruyo le yè wi leguulo nɛ̄ bèle; gàa ki 'wire kúɔ wè, wi kùlofɔli ndɔ̀ngɔ ki béri nyíʔɛnɛ wi nɛ̄.»