Ŋúnuyɔ 130 - Sénoufo Nyarafolo

Ye- yeli sɔ̀ngirɔ taʔa dè Yewe nɛ̄

1 Fundaanra tánʔagbuɔlɔ ŋúnugo gī.

¹ Fundaanra tánʔagbuɔlɔ ŋúnugo gī. Mi wuʔɔgɔ laamɛ nī bè, a mi 'kòkuulo wáa muɔ kúrugu, Yewe  !

² Kàfɔli, ‑mi kòkuulo lúʔu lè ! Ma sí líiye cáan bà mi nɛ muɔ fiɛn wè !

³ A ki 'nyaa muɔ Yewe wè, a muɔ yé je weli kolimɔ cò bè weli kúrugu wè, Kàfɔli, ŋáa wi cî gbɛ̀ yéri muɔ yiʔɛ mɛ́ gè ?

⁴ Nɛ̀ ki yaʔa muɔ sí wī ma nyɛ́ni ki yɛri siɛn nɛ̄, kire ga buu siɛnnɛ peri fìʔɛ́ muɔ nɛ̄.

⁵ Mi wè, mi sɔ̀ngirɔ tiī Yewe nɛ̄, mi nɛ wi siri mi fungo ki mìɛni ní, mi 'mi sɔ̀ngirɔ taʔa dè wi siɛnrɛ nɛ̄ dè.

⁶ Mi nɛ Kàfɔli siri wè nɛ̀ tóri kàʔa ki wélifɔli nɛ̄ wè ŋàa wi cî nɛ kpìɛnduumɛ siri bè, ʔaan, nɛ̀ tóri kàʔa wélifɔli nɛ̄ ŋáà wi cî nɛ kpìɛnduumɛ siri bè.

⁷ Isirayɛli siɛnnɛ yo, ye‑ yeli sɔ̀ngirɔ taʔa dè Yewe nɛ̄, nɛ́ ki cɛ́n wire mɛ́ bànguɔ dɛ́nigɛ ki yē, wire yē gbòboriyaʔawa súuri bè yeli fùgu bè suɔ,

⁸ wire wi bága Isirayɛli siɛnnɛ suɔ bèle bè yige pe kolimɔ kele ke mìɛni nī.