Ŋúnuyɔ 125 - Sénoufo Nyarafolo

Yewe nɛ̂ wi siɛnsinminɛ màʔa bèle nɛ̀ suʔu

1 Fundaanra tánʔagbuɔlɔ ŋúnugo gī.

¹ Fundaanra tánʔagbuɔlɔ ŋúnugo gī. Bàli pe 'pe sɔ̀ngirɔ taʔa dè Yewe nɛ̄ wè, piyē bɛ̀ Siyɔn nyagurugo tíɛlɛ gè, gàa kiǐ gbɛ̀ cúungo gèʔ, kiī baa súuri.

² Nyaguruyo yi 'Zerizalɛmi kàʔa màʔa gè nɛ̀ suʔu, bɛ̀ ki yē Yewe míɛni nɛ̂ wi siɛnnɛ màʔa bèle nɛ̀ suʔu, píra ŋáà nī wè nɛ́ lɛ̀lɛ ó lɛ̀lɛ nī.

³ Siɛnpiile fànʔa kàgbiile niǐ gbɛ̀ sìɛn bè yaʔa siɛnsinminɛ kùlo nɛ̄ lèʔ, kire ga buu siɛnsinminɛ pe fǎga pe kiyɛ sáʔa yè bè kolimɔ kpíʔile bèʔ.

⁴ Yewe yo, mari kacɛ̀ngɛ kpínʔini bàli mɛ́ pe 'nyuɔ bèle, bàli funyɔ yī sínyɛ yè.

⁵ Nɛ̀ ki yaʔa bàli sí bīɛlɛ pe 'láʔa muɔ koligo nɛ̄ gè bèri waa kobuunniyo nī yè, ki 'yɛli Yewe‑ pe cìra bè yige baa nɛ́ bàli ní pe kapiʔile kpínʔini gèle ! Yanyige ki‑ puu Isirayɛli kùlo nɛ̄ lè !