Ŋúnuyɔ 114 - Sénoufo Nyarafolo

Isirayɛli yirile nɛ́ wi suɔlɔ lɛ̀lɛ nī lè

¹ Bà Isirayɛli siɛnnɛ pe 'yiri Ezipiti kùlo nī lè, ʔaan, Yakuba narigɛ gè ki 'yiri siɛnfelige gáà sunʔɔmɔ nī bè gàa siɛnrɛ piyè puu nɛ lúru dèʔ,

² Zuda wi yé kò wi saawalidɛngɛgɛ, a Isirayɛli míɛni wi 'kò wi kùlofɔligɔ.

³ A kuʔɔjii wi 'pe nyaa, a wi 'fɛ̀, a Zurudɛn cáʔa ki 'koli nɛ̀ sùnʔɔrɔ kàduʔu mɛ́.

⁴ A nyaguruyo yi 'yo bɛ̀ sìnbapɔlilɔ tíɛlɛ, a nyagurupigele ke 'yo bɛ̀ sìnbapɛngɛlɛ tíɛlɛ.

⁵ Kuʔɔjii yo, gáa kɛnmɛ nɛ̄ muɔ 'fɛ̀ ? Zurudɛn cáʔa yo, gáa kɛnmɛ nɛ̄ muɔ 'koli nɛ̀ sùnʔɔrɔ kàduʔu mɛ́ ?

⁶ Nyaguruyo yo, gáa kɛnmɛ nɛ̄ yeli 'koli nɛ yogi bɛ̀ sìnbapɔlilɔ tíɛlɛ ? Nyagurupigele yo, gáa kɛnmɛ nɛ̄ yeli 'koli nɛ yogi bɛ̀ sìnbapɛngɛlɛ tíɛlɛ ?

⁷ Dàala yo, te cúungu Kàfɔli wi yiʔɛ mɛ́ gè, te cúungu Yakuba Kulocɛliɛ wi yiʔɛ mɛ́ gè,

⁸ wire ŋáà wi 'kàdɛnigbaala yiʔɛ lè a ni 'kò pìndiʔɛ gè, nɛ́ kàdɛnigbaala fìile 'kpíʔile lè lawiile lè.