Ŋúnuyɔ 11 - Sénoufo Nyarafolo

Yewe wire wī mi làridiʔɛ gè

1 Ŋúnuŋuminɔ yiɛginiwɛ wuʔu gī. Dawuda wuʔu gī.

¹ Ŋúnuŋuminɔ yiɛginiwɛ wuʔu gī. Dawuda wuʔu gī. Mi 'líʔire jó Yewe mɛ́. Gáa nɛ̄ yeli bé sí ní mi yɛ mi de fini bɛ̀ sínjapile tíɛlɛ nyagurugo nɛ̄ gè ?

² Nɛ́ ki cɛ́n ki n'gɛ, siɛnpiile pe nyɛ́nì sandali píle gè nɛ́ ŋaʔa kɔ̀n gè nɛ̀ taʔa kpàtaan nɛ̄ wè bè ki ŋɔ yebilige nī gè siɛnsinminɛ nɛ̄ bèle.

³ A kùlo ni kàkpuɔnnɔ pe 'cúʔɔ bèle o, gáa siɛnsinwɛ wi bé ní gbɛ̀ kpíʔile ?

⁴ Yewe wiī baa wi nàkpaanjɛngɛ nī gè, wiī tɛ́niwɛ wi kùlofɔlilɔ kácunʔɔ nɛ̄ gè nyìʔɛnɛ nī lè. Wi nyapigele kiyē nɛ nyaʔa; wiī nɛ lewiile ciʔige bèle nɛ wéli.

⁵ Yewe nɛ̂ siɛnsinminɛ ciʔige bèle nɛ̀ wéli nɛ́ míɛni siɛnpiile ní bèle. Siɛn ŋáà wī fungbɛngɛ kele ke 'wi dɛ́ni gèle, ki siɛn wi nyɛ́nì Yewe biɛn.

⁶ Wi bé kàsunsindari nɛ́ tabiɛnmiige tìrige gè nyìʔɛnɛ nī lè bè wo siɛnpiile nɛ̄ bèle; pe liɛlɛ ni bé puu káfalifuugo.

⁷ Nɛ́ ki cɛ́n Yewe nyɛ́nì sín, kasingele ke 'wi dɛ́ni; siɛnsinminɛ pe bé wi yiʔɛ nyaa gè.