Ŋúnuyɔ 108 - Sénoufo Nyarafolo

Nɛ́ Kulocɛliɛ ní wè, weli bé weli parifɔlilɔ jáa bèle !

¹ Ŋúnugo gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.

² Kulocɛliɛ yo, mi 'mi sɔ̀ngirɔ taʔa dè muɔ nɛ̄ kányiʔɛ ní ! M'béri yakpuɔnrɔ kpúɔn dè béri gbùʔɔrigɔ ŋúnudanʔa ŋú gè nɛ́ mi fungo ki mìɛni ní  !

³ Màʔagɛlɛ bɔ̀licɛrigɛ yo, muɔ nɛ́ gɔripile ní lè, ye‑ yɛ̀ ! Sínbiniwuuro nī dè, m'bé ŋú bè cɛngɛnyɛni foli lè.

⁴ Yewe yo, m'bé muɔ tòbilo duniya siɛnfeliye sunʔɔmɔ ni bè ! M'bé yakpuɔnrɔ kpúɔn dè bè muɔ gbùʔɔrɔ kùlogolo sunʔɔmɔ nī bè !

⁵ Nɛ́ ki cɛ́n muɔ bànguɔ dɛ́nigɛ ki 'kpúʔɔ nɛ̀ tóri fúɔ nɛ̀ sɛ́nì jíin nyìʔɛnɛ nī lè, a muɔ kányiʔɛ kaala ni 'yɛ̀ nɛ̀ kpàʔala nɛ̀ tóri kàsadibarɛ nɛ̄ dè.

⁶ Kulocɛliɛ yo, ‑muɔ míʔɛ kpúʔɔ gè ma tóri nyìʔɛnɛ kpúʔɔgɛnmɛ nɛ̄ bè ! Muɔ kpuɔmɔ pi‑ dàala ni mìɛni nyì !

⁷ Te báan ma pa weli píle ma suɔ nɛ́ muɔ kàliige kɔli ní gè, kire ga buu bàli pe 'muɔ dɛ́ni bèle, peli‑ muɔ suɔlɔ taa lè. Ma lúʔu m'mɛ́  !

⁸ Kulocɛliɛ wi 'juu, baa wi saawalidɛngɛgɛ nī gè, nɛ́ jo: «M'bé fànʔa taa bé Sikɛmi kàʔa tɛ́nimɛ líɛ bè, bé Sukɔti jùlɔgɔ simɛ gè, bé ki liɛlɛ.

⁹ Galaadi tɛ́nimɛ pire yē mi wobo, Manase tɛ́nimɛ pire yē mi wobo, Ɛfirayimi tɛ́nimɛ pire yē mi kapiɛngbuɔn ndɔ̀ngɔ, Zuda tɛ́nimɛ pire yē mi fànʔa kàgbiile,

¹⁰ Mowabi kùlo lire yē m'mɛ́ piʔɛ gáà nī mi nɛ gbínni wè, Edɔmi kùlo tɛ́nimɛ pire yē mi wobo báà nī mi nɛ mi tɔriyɔ wáari yè, m'bé sí fànʔa taa bè kòkuulo wáa lè Filisiti kùlo nɛ̄ lè.»

¹¹ Ŋáa wi bé mi kɔ́ri nyɔ́gɔ gunliriye kàʔa nī gè ? Ŋáa wi bé mi kɔ́ri nyɔ́gɔ Edɔmi kùlo nī lè  ?

¹² Muɔ bɛ̀ʔ lé, Kulocɛliɛ ? Nɛ̀ sí ki taa muɔ sì weli wáaʔ lé ? Muɔ ní wè nɛ waa nɛ́ weli kapiɛngbuɔnnɔ ní bèleʔ.

¹³ Te báan ma pa weli sáʔa weli parifɔlilɔ nɛ̄ bèle ! Nɛ́ ki cɛ́n sáʔala náà ni kɔ́ngi lewiile mɛ́ bèle, lire wè yafiɛnʔ.

¹⁴ Nɛ́ Kulocɛliɛ ní wè, weli bé pe jáa ! Wire wi bé weli parifɔlilɔ tánʔana bèle bè pe tirige.