Ŋúnuyɔ 105 - Sénoufo Nyarafolo

Ye- koli ye sɔ̀ngi Kulocɛliɛ kakpoliyo nɛ̄ yè

¹ Yeri Yewe síɛri wè, yeri wi míʔɛ jáari gè ! Ye‑ ki yaʔa kùlogolo siɛnfeliye yi‑ wi kakpiʔiligele cɛ́n gèle !

² Yeri ŋú wi mɛ́ ! Yeri yakpuɔnrɔ kpúɔn dè wi mɛ́ ! Yeri wi kakpoliyo yi mìɛni wuʔu nyu gè !

³ Yeri yìye kpóri Yewe nī wè, wire ŋáà wi 'nyuɔ nɛ́ ní tiɛlɛ fùn wè ! Bàli pe Yewe caa wè pe fungo nī gè, peri fundaanra kpínʔini !

⁴ Ye‑ yiʔɛ Yewe kɔli mɛ́ gè ye wi ŋɔri caa dè ! Yeri ki caa bè kò nɛ́ wi ní lɛ̀lɛ ó lɛ̀lɛ nī !

⁵ Ye‑ sɔ̀ngi ye taa nɛ́ kakpoliyo ní yè nyàa wi nyɛ́nì kpíʔile yè, nɛ́ wi fìɛlɛ ní bèle, nɛ́ wi kàyuʔujuuro ní dè dàa wi 'juu nɛ̀ kúɔ dè,

⁶ yeli bálì bīɛlɛ Birayima siimɛ bè, Yewe baakuɔwɔ wè, yeli Yakuba pìile bèle, Yewe siɛnnyiɛnɛgɔnminɔ bèle !

⁷ Yewe wire wī weli Kulocɛliɛ wè, wi kàyuʔujuuro tiī nɛ dàala ni mìɛni kàrigí.

⁸ Wiī nɛ sɔ̀ngí nɛ taʔa súuri nɛ́ wi nyakungɛngɛ ní gè, nyafɛnigɛ siɛnrɛ dáà wi 'juu kɛ̀ngɛlɛ sirakogunɔ (1 000) mɛ́ gèle.

⁹ Wi 'nyuɔ kún nɛ̀ kɛn Birayima mɛ́ wè, nɛ́ sí ki juu nɛ̀ fùgu nɛ́ kàlilɛ ní Siaga mɛ́ wè.

¹⁰ Wi 'koli nɛ̀ ki sɔ́migɔ nɛ̀ juu ki‑ kò fànʔa kaala Yakuba mɛ́ wè, nɛ́ Isirayɛli siɛnnɛ ní bèle, ki‑ kò nyakungɛngɛ lɛ̀lɛ ó lɛ̀lɛ nī.

¹¹ A wi 'jo: «M'bé Kanaa kùlo kɛn lè muɔ mɛ́, lire bé puu muɔ mɛ́ liɛlɛ náà muɔ bé taa kɔrigɔ gè, muɔ nɛ́ muɔ siimɛ ní bè.»

¹² Bà pe puu nɛ tíin siɛnnɛ cɛ̀ri yákuɔ wè, kagbuunyɛni lè, nɛ́ ní nabɔnminɔ tɛ́ninɛ kùlo nī lè,

¹³ pe 'puu nɛ waa kùlogolo mɛ́ gèle nɛ mári, nɛ́ yiri kùlofɔligɔ káà nī nɛ̀ kɛ́ siɛnfeliye yáà mɛ́.

¹⁴ Kulocɛliɛ sì siɛn wáà fáala yaʔa a wi 'pe wuʔɔʔ; peli kɛnmɛ nɛ̄ a wi 'juu kùlofɔlilɔ nɛ̄ bèle,

¹⁵ nɛ́ jo: «Ye fǎga cò mi siɛnnyiɛnɛgɔnminɔ nɛ̄ bèleʔ ! Ye fǎga kapiile kpíʔile mi siɛnjuulo nɛ̄ bèleʔ !»

¹⁶ A wi 'fungo cáan dàala nɛ̄ lè, nɛ̀ yaliire ti mìɛni kúɔ.

¹⁷ A wi sí siɛn wáà tun pe yiʔɛ mɛ́: Yusufu wè, ŋàa pe yé pári sùkulowo wè.

¹⁸ A pe 'wi tɔliyɔ puɔ yè nɛ́ nyùʔɔdiriye ní yè, a pe 'timɔri kajinge le wi yétiige nī gè,

¹⁹ fúɔ nɛ̀ pɛ́nì nɔ̀ cɛngɛ gíì Yusufu siɛnrɛ ti 'fori dè, dàa wi yé kíni nɛ̀ juu dè. A ki 'nyaa siɛnrɛ dáà Yewe yé juu dè, a kire ki 'tìɛ tànʔa yé puu Yusufu mɛ́ wè.

²⁰ A kùlofɔli wi 'ki juu nɛ̀ gbɛ̀ngɛ pe‑ wi yaʔa, wire ŋáà wi 'puu kùlogolo kàfɔli wè, a wi 'tí a pe 'wi yaʔa.

²¹ A kùlofɔli wi 'Yusufu tɛ́ngɛ wè wi saʔa nyùgo nɛ̄ gè wi‑ puu wi lɔri ti mìɛni nàʔavɔli,

²² béri kùlofɔli wi siɛnkpolilo tɛnmɛ bèle kɛnmɛ bíì nɛ̄ wi 'ki nyaa a ki 'yɛli gè, bèri kùlofɔli wi liɛlɛ tɛnmɛ bèle sícilimɛ nɛ̄.

²³ Kire kàduʔumɛ a Isirayɛliyé pe pɛ́nì jíin Ezipiti kùlo nī lè. Peli bálì bīɛlɛ, Yakuba wuulo bèle, peli 'tɛ́ni nɛ̀ lɛ̀lɛ láà kúɔ Kami kùlo nī lè.

²⁴ Kulocɛliɛ wi yé cesiʔi tɛ́ni gè wi siɛnnɛ nɛ̄ bèle, a wi 'pe kpíʔile ŋɔrifɔlilɔ nɛ̀ tóri pe túnvɔlilɔ nɛ̄ bèle.

²⁵ A wi 'Ezipitiyé funyɔ yiʔɛ yè pe kúrugu kire ga buu pe‑ wi siɛnnɛ pari bèle, peri pe fáanni.

²⁶ A wi 'wi baakuɔwɔ Misa tun wè pe kúrugu, wire nɛ́ Arawɔn ŋáà wi yé nyíɛnɛ nɛ̀ kɔ̀n wè.

²⁷ Baa Ezipiti kùlo nī lè, a pe 'Kulocɛliɛ fìɛlɛ kpíʔile bèle nɛ́ wi kakpoliyo ní yè Kami kùlo siɛnnɛ yiʔɛ mɛ́ gè.

²⁸ A Kulocɛliɛ wi 'yebiliwuɔlɔ nyɔ́gɔ lè kùlo nī lè cɛnvugo nɛ̄ gè, a yebiliwuɔlɔ ni 'tìgi dɛ́ndɛn; siɛn wáà fáala sì jáa nɛ̀ wi siɛnrɛ cíi dèʔ.

²⁹ A wi 'pe luɔyɔ yiʔɛ yè a yi 'kò sìsiɛn, nɛ̀ fúɔlɔ kpúu bèle.

³⁰ A kpìile 'yiri nìʔɛnɛ nɛ̀ pe kùlo nyì lè, a ti 'jíin míɛni pe kùlofɔli wi nàkpanʔa saaya nī yè.

³¹ Wi 'juu, a gbùu wi 'yiri, nàfiɛn wi 'kùlo tiɛrɛ ti mìɛni kpàri.

³² A wi 'kàsasindari tìrige pe nɛ̄ kàsaʔa sìndiʔɛ nī, nɛ́ ki kpíʔile a kàsakpɛnigɛ nyíʔɛnimɛ nɛ́ kàsun tuu dàala nɛ̄ lè.

³³ Wi 'pe ɛrɛzɛn fétiride nɛ́ sàanfiidiiye kpúɔn yè, nɛ̀ pe kùlo tiire kabari dè.

³⁴ Wi 'juu a kàbaridɛ ti 'pɛn, nɛ́ kòto ŋáà wiī nìʔɛwɛ, wiǐ gbɛ̀ tɔ́ri dèʔ.

³⁵ Tire ti 'nyàʔa ki mìɛni káa pe kùlo nī lè, nɛ́ yaliire ti mìɛni ní siiye nī yè.

³⁶ A wi 'pe kùlo jaafɔpelile pe mìɛni kpúɔn nɛ̀ kpúu, pe nàgapunmɔ lɛ̀lɛ pìpelile bèle.

³⁷ A wi 'ki kpíʔile a wi siɛnnɛ pe 'walifiiwe nɛ́ tiɛ tugo wè nɛ̀ yiri kùlo nī lè. Pe saaya tùluyo nī yè, wàa fáala sì yé fùrɔ nɛ̀ kò wiì gbɛ̀ni tánʔaʔ.

³⁸ Ezipiti kùlo ni yé puu fundaanra nɛ̄ pe yirile wuʔu nɛ̄ gè, nɛ́ ki cɛ́n fíɛgbuɔrɔ ti yé pe cò.

³⁹ A Yewe wi 'kàsadibagɛ káà tíʔɛ nɛ̀ pe tɔ́n, nɛ́ kàsun kpìɛnmɛ cáan bè pìlige nī gè.

⁴⁰ Pe nyɛ́nì náari, a Kulocɛliɛ wi 'tingbɛniserire kɛn dè pe mɛ́, nɛ̀ pe kɛn a pe 'lìi nɛ̀ tín nɛ́ nyìʔɛnɛ yaliire ní dè.

⁴¹ A wi 'kàdɛnigbaala kpúɔn lè nɛ̀ jaa, a luʔɔ yɛ̀ nɛ cɛ̀ri nɛ yigi ni nī, a luʔɔ ki 'fúu bɛ̀ lakoligo tíɛlɛ waama kùlo nī lè.

⁴² Nɛ́ ki cɛ́n wi 'puu nɛ sɔ̀ngí nɛ taʔa nɛ́ wi nyakungɛngɛ siɛnrɛ ní dè, dàa wire Kulocɛliɛ tíimɛ wi yé juu wi baakuɔwɔ Birayima mɛ́ wè.

⁴³ Bà wi yé wi siɛnnɛ yige bèle, pe 'puu fundaanra nɛ̄, wi siɛnnyiɛnɛgɔnminɔ pe 'puu nɛ fundaanra yékpuʔulo wáari gèle.

⁴⁴ A wi 'kùlogolo kálì dàʔala kɛn pe mɛ́, a pe 'tɔ̀ni taa siɛnfeliye yáà baara nī dè,

⁴⁵ kire ga buu pe‑ wi fànʔa kele cò gèle bé sí de lúru wi fànʔa kajuʔulo mɛ́ gèle. Ye- Yewe gbùʔɔrɔ wè  !